خميس المفاجآت الكبرى

هو ايه اللى ممكن يحصل يوم الخميس الجاي؟ وايه القرارات الحاسمة اللي ممكن يعلن عنها البنك المركزي لمواجهة التضخم والقضاء على فوضى سوق الصرف؟ وايه الحالة الوحيدة اللى ممكن يحصل فيها تعويم للجنيه؟ وليه مش متوقع اوى رفع اسعار الفايدة فى الاجتماع الجاي للجنة السياسة النقدية؟

قبل 48 ساعة من اول اجتماع للجنة السياسة النقدية فى 2024 كشفت مؤسسة "كابيتال إيكونوميكس" في تقرير حديث  ليها ان بعد زيارة مسؤولين من صندوق النقد الدولي لمصر خلال الأيام اللى فاتت لمناقشة حزمة تمويل جديدة ان فيه اتفاق مبدئي حصل بين الحكومة المصرية وصندوق النقد حوالين زيادة قرض ال 3 مليار دولار اللى كانت مصر اتفقت عليهم مع الصندوق فى ديسمبر 2023 .

التقرير اكد انه رغم عدم الكشف عن تفاصيل محددة حوالين المفاوضات بين الجانبين لكن واضح ان فيه اتفاق جديد هيتم الاعلان عن تفاصيله بالكاملة الفترة الجاية وانه من المحتمل ان ده يتزامن مع تخفيض قيمة الجنيه المصري أمام الدولار في وقت قريب من اجتماع لجنة السياسة النقدية بالبنك المركزي.

"كابيتال إيكونوميكس" قالت ان فيه تكهنات بتشير إلى أن حجم الاتفاق الجديد ممكن يتراوح بين 8 و12 مليار دولارمقارنة بالاتفاق السابق .. وقالت أن زيادة حجم الاتفاق معناها إقرار شروط أكثر صرامة بشأن الركائز ال 3  لاتفاق قرض ال 3 مليار مع الصندوق، وهي تخارج الدولة من الاقتصاد والتمسك بضبط وتشديد الأوضاع المالية وتحرير سعر صرف الجنيه.

وكابيتال إيكونوميكس هي مؤسسة أبحاث اقتصادية مستقلة مقرها في لندن بتنتج الشركة مقالات مكتوبة من الأبحاث الاقتصادية بالإضافة إلى تقديم الخدمات الاستشارية والندوات والمؤتمرات والمشاريع البحثية.

واتوقعت  "كابيتال إيكونوميكس" تثبيت  البنك المركزي أسعار الفايدة دون تغيير في اجتماع الخميس الجاي لو ما تمش الكشف عن اتفاق جديد مع صندوق النقد الدولي يتضمن زيادة في قيمة التمويل يتزامن مع خفض جديد لقيمة الجنيه.

وأكدت المؤسسة أن فيه توقعات بحدوث تطور مهم قريبا خصوصا بعد الاجتماعات اللي جرت في واشنطن والقاهرة مؤخرًا وأكدت ان اجتماع الخميس مهم جدا لمعرفة خارطة طريق تعامل الحكومة مع المشاكل والازمات اللى بتحاصرها مؤخرا.

وفي حالة الإعلان عن اتفاق جديد مع صندوق النقد الدولي بتتوقع كابيتال إيكونوميكسأن يتخذ البنك المركزي إجراءات فورية بما فيها خفض قيمة الجنيه بنسبة 23% إلى 40 جنيه للدولار كخطوة أولية قبل التعويم الكامل .. وقالت ان الخطوة دي ممكن تكون متزامنة مع زيادة حادة في أسعار الفائدة، ممكن تصل إلى ما لا يقل عن 300 نقطة أساس لتصل إلى 22.25%.

وقرر البنك المركزي المصري الشهر اللى فات الإبقاء على أسعار الفائدة لعائد الإيداع والإقراض لليلة واحدة عند مستويات 19.25% و20.25% على التوالي.