ايه حكاية دولار الـ GDR والدولارات الوهمية في الدهب وتأثيرها على السوق السوداء
ايه حكاية الدولارات الوهمية في سوق الصاغة ..وايه هو دولار الـGDR في لندن وعلاقتهم بالسوق السوداء للعملة.. وايه اللي هيحصل في الأيام الجاية بسوق العملات.. تفاصيل كتيرة هتعرفوها معانا بعد الفاصل.. خليكم معانا ..
في الفترة الأخيرة ولما الناس تابعت كويس الاخبار الاقتصاديه والأسواق والأزمات وتحديدا الدولار والدهب لأن الحاجتين دول اكتر حاجة بيأثروا على الناس وبيتابعوهم لحظة بلحظة وفي نفس الفترة الناس سمعت عن دولار الدهب أو دولار الصاغة دولار الحديد دولار العقود الآجلة والدولار الرسمي وفيه متخصصين كتير عارفين إنه فيه دولار تاني وهو دولار بريطاني لكن يخص السوق المصرية هو دولار ال جي دي ار وهو سعر السهم لشركات مصرية في بورصة لندن...
خليكم معانا واحدة واحدة ونبدأ الأول بدولار الصاغة ودا دولار ظهر في الفترة الأخيرة وكان من اختراع تجار الدهب الكبار بسبب اختلاف وتعدد أسعار السوق السوداء للدولار وعشان كده قرروا يخترعوا دولار خاص بيهم ويتسعر عليه سعر الدهب المصري في السوق وكمان عشان تجار الدهب يحافظوا على مكاسبهم من اي تقلبات قرر ا يكون سعر دولار الدهب أو الصاغة أعلى من سعر دولار السوق السوداء للدولار يعني لو دولار السوق السوداء كان بـ50 جنيه ممكن سعر دولار الصاغة يكون ب55 جنيه وهكذا كل ما يتغير سعر الدولار في السوق الموازية دولار الصاغة بيتحرك في نفس الوقت وبقيمة اعلي منه ودا كان سبب الارتفاع الكبير في أسعار الدهب في الفترة الحالية بجانب الطلب الكبير على شراء الدهب خوف من تعويم الجنيه.
نيجي بقى لدولار شهادات الايداع الدولية ببورصة لندن أو الـ GDR، وعشان نفهم ببساطة ايه هي شهادات الإيداع وعلاقتها بالدولار فهي ياحضرات عبارة عن إعادة تغليف للأسهم المصدرة عن الشركات في سوقها الأم، وبيتم تداولها في سوق تاني او خارجي بعملة مختلفة، والاسهم دي تحفظ في شركات حفظ عالمية، ويكون الغرض منها تيسير الاستثمار في الأسهم المحلية عبر طرحها للمستثمرين الأجانب في سوقهم... يعني دي أسهم مصرية بيتم طرحها عبر وسيط في شكل شهادات إيداع دولية وبيعها في سوق خارجي بالدولار..
ومثلا فيه اكتر من 10 شركات مصرية عندها شهادات إيداع متداولة في بورصة لندن، زي شهادة إيداع البنك التجاري الدولي (CIB)، كل شهادة منها عبارة عن سهم واحد في البورصة المصرية، وبيتم تحويل الأسهم المصرية لشهادات إيداع بعد تقديم طلب إلى شركة مصر للمقاصة والإيداع والقيد المركزي ثم تبدأ الإجراءات تحويله.
ونظريا بيتم شراء سهم البنك التجاري الدولي في البورصة المصرية بسعر 69.5 جنيه، واعادة بيعه في بورصة لندن بسعر 1.2 دولار، وإعادة تحويل ناتج البيع للسوق المصري وبالتالي الاستفادة من حاجة اسمها المراجحة السعرية على السهم، والعكس صحيح.
رغم إن شهادات الإيداع في بورصة لندن عملية اقتصادية بحتة لكن للاسف تجار العملة والسوق السوداء بيستغلوا سعر شهادات الإيداع المصرية في الخارج وجمبها سعر دولار الصاغة واللي بيتحدد سعره بشكل وهمي في نشر الإشاعات والمضاربة على الدولار في السوق السودا وعشان يقولوا للمتداولين شوفوا سعر الدولار في الصاغة وفي لندن واحنا بتبيع بأقل منهم والحقيقة سعر الصاغة عامل زي اللي كدب كدبة كبيرة وصدقها لما اخترعوا دولار وهمي بسعر بيتحدد في الخيال.
