بعد سقوط امبراطور الدهب.. ايه اللي حصل في عابدين

ايه اللي حصل في عابدين من شوية.. وايه علاقته باللي حصل في الصاغة من يومين وليه تجار العملة والدهب عايشين في حالة الرعب اليومين دول.. كل ده هنعرفه مع بعض في الفيديو ده
 

من يومين أجهزة الأمن وجهة ضربة كبيرة لمافيا الدولار والدهب في السوق السودا لما وقع في أيدها اكبر تاجر في الصاغة أو امبراطور الدهب زي ما بيسموه ومسكوه ومتلبس ومعاه 160 كيلو دهب مرة واحدة والمفاجأة أن الدهب اللي معاه مش مدموغ وشوية شوية اكتشفت أجهزة الأمن مفاجأة من العيار التقيل وهي إن امبراطور الدهب بيشتري الدهب الخام من تجار التنقيب عن المعادن في اسوان واللي بيكون جاي بطريقة غير مشروعة وإن الموضوع كبير اووي وداخل فيه تجار وشبكات كتير من الاسكندرية لاسوان وطبعا محلاتهم اتشمعت والتحقيقات شغالة وبعد القبض على امبراطور الدهب الشرطة ضبطت جزء تاني من عصابته وهما بيستلموا صفقة دولارات في الجيزة ومن ساعتها القبض على التاجر الكبير ده بقي حديث الصاغة وسوق العملة..

زي ما قلنا بعد سقوط امبراطور الدولار والذهب حصلت مفاجأة تانية في عابدين وهي إن أجهزة الأمن كانت محضرة ضربة جديدة وقوية لتجار العملة وقدرت تقبض على عصابة. كبيرة بتاجر في للدولار وهي في حالة تلبس بمبالغ كبيرة من العملة الأمريكية في منطقة عابدين بالقاهرة وطبعا العملية التانية لرجال الأمن وأجهزة الرقابة سمعت بشكل كبير في سوق العملة والدهب وخلى تجار ومتعاملين في الأسواق الغير شرعية يخاف ويبعد لأن أي تاجر بتثبت عليه تهمة الاتجار في النقد الأجنبي بيتم مصاردة المبالغ اللي عنده وفي نفس الوقت بيتشاف مصدر ثروته فين وممكن يخسرها كلها بسبب تجارة العملة.

أهمية الحملات الأمنية على تجار العملة والدهب إنها بترجع الامل للناس في القبض على كل المضاربين وفي نفس الوقت استمرارها بشكل كبير بيعمل حالة من الخوف والتراجع عند ناس كتير بتتعامل مع السوق السوداء وخاصة المغتربين واللي اتعلموا يغيروا الدولارات بتاعتهم في السوق السوداء عشان فرق الأسعار.. والحملات دي جزء من إجراءات كتير البنك المركزي المصري والحكومة شغالين عليها من فترة كبيرة لمحاصرة سوق النقد السري في مصر وعشان كده ارتفعت أسعار العملة الأمريكية في الساعات اللي فاتت وبعدها ارتفع سعر الدهب لان فيه متداولين كتير اختفوا من السوق وخافوا تضيع مكاسبهم وفلوسهم اللي لموها في الشهور الأخيرة لكن اللي جاي أسود على كل التجار والمضاربين وهنسمع كل يوم عن عصابة جديدة ومصادرة أموال .