بنوك مصر المتينة.. حصيلة خيالية لشهادات الادخار الجديدة 96 ساعة
إيه اللي حصل في البنوك من يوم الجمعة لغاية نهاردة وايه الرسالة اللي بين السطور وبتقول إن البلد دي فيها مؤسسات قوية وسيستم شديد وتقدر تتعامل مع أي ملف وتتصرف تحت أي ظرف وإيه الحاجة الغريبة اللي عند المصريين ومش بتظهر غير في أوقات معينة.. كل دا وغيره هنقوله لحضراتكم بعد الفاصل
أوقات كتير تفتكر إن المصريين مش مدركين اللي بيحصل حوليهم أو مش متابعين ولا متفاعلين لكن في الحقيقة بيتحركوا زي البرق لما يكون فيه مشروع جماعي ولو ناسين نفكركم باللي حصل في قناة السويس الجديدة لما السيسي أعلن عن المشروع وبعدها البنوك عملت شهادة استثمار للقناة في ساعات المصريين هجموا على البنوك من أسوان للإسكندرية ودفعوا في ساعات 64 مليار جنيه عشان البلد تعمل مشروع القناة الجديدة.
اللي حصل النهاردة قدام البنوك بيفكرنا باللي حصل قبل كده وبيقول رسالة مهمة جدا وهي إن المصريين متابعين أدق التفاصيل في البلد وعلى وعي تام باللي بيحصل في الاقتصاد والأسواق، والنهاردة الاف المصريين راحوا فروع بنك مصر والبنك الأهلي عشان يشتروا شهادتي ادخار 27% و 23.5%
اللي أعلنوا عنها يوم الخميس والحقيقة كان مشهد يشرف وفيه تفاعل ومرونة وأمل في بكرة.
الجديد بقي إن المصريين دفعوا 45 مليار جنيه في 4 أيام بس لشراء الشهادات بواقع 15 مليار جنيه لصالح بنك مصر و 30 مليار جنيه لصالح البنك الاهلي المصري، لكن فيه حاجة مهمة وهي إن أغلب الناس اللي اشترت الشهادات اشترتها من يوم الجمعة لغاية امبارح الأحد وكانوا أيام أجازات عن طريق الاون لاين ودا بيدينا رسالة مهمة جدا بردوا وهي قوة ومتانة ومرونة سيستم البنوك اللي قدر يستوعب كل العدد دا ويجري كل العمليات دي من غير ما يوقع أو يحصله أي عطل ودي رسالة إن البنوك المصرية بقت في مصاف المصارف العالمية من ناحية الرقمنة والتكنولوجيا المالية.
رئيس بنك مصر المصرفي الكبير محمد الاتربي توقع تجاوز حصيلة الشهادات الجديدة ل 500 مليار جنيه، على أن يستمر الاكتتاب في فبراير نظرًا لتزامنه مع مواعيد استحقاق شهادات تانية.
