من أين لك هذا؟.. البنوك تطارد عصابات الدولار

 
البنك المركزي بالتعاون مع البنوك المصرية بدأ مؤخرا تحركات موسعة لمطاردة عصابات الدولار وتضيق الخناق على تجار العملة والمضاربين وفيه كام اجراء اتعملوا هيكون ليهم تأثير قوي جدا على السوق الموازية وهيقللوا من المضاربة على العملة الأمريكية كان أولهم يوم الخميس اللى فات لما بدأ عدد من البنوك تحقيقات موسعة بواسطة إدارات الاحتيال المصرفي بشأن البطاقات الائتمانية اللي تم استخدامها من قبل العملاء لسحب الدولار من الخارج.. خصوصا وان فيه طلبات كتيرة لوقف البطاقات الائتمانية اللي ما مرش على استخراجها أيام وتم سحب الدولار من خلالها.. وفي اليومين اللى فاتوا البنوك خدت قرار تانى مهم في اطار محاصرة السوق السودا فيا ترى ايه القرار الجديد وازاى ممكن يساهم في حل أزمة الدولار في مصر؟ 
 

 
في الفترة الأخيرة ووفقا لمتعاملين في السوق الموازية للصرف رجعت البنوك من تانى تطلب المصدر الرسمي للحصول على الدولار وفي حال عدم توفير ما يفيد الحصول عليها بشكل رسمي وشرعي بيتم رفض إيداعها في الحسابات البنكية.
مصادر في القطاع المصرفي أكدت ان بعض البنوك بدأت بالفعل خلال الساعات اللى فاتت سؤال المودعين سواء الأفراد أو الشركات عن مصادر الحصول على الدولار وفي حال عدم تقديم ما يفيد الحصول عليها بشكل رسمي وقانوني فإنه لن يتم قبول إيداعها في الحسابات البنكية الرسمية.. وقالت ان الخطوة دي بتأتي في إطار تخفيف حدة المضاربات على الدولار في السوق الموازية واللي تسببت في ارتفاع أسعار صرف الدولار إلى مستويات قياسية وتاريخية.
وبسبب التحركات اللى بيعملها البنك المركزي بالتعاون مع البنوك تراجعت أسعار صرف الدولار في السوق الموازية خلال الساعات اللى فاتت إلى مستوى 51 جنيهاً مقارنة بحوالى 55  جنيه قبل اتجاه البنوك للتعامل بالآلية الجديدة.
وتداولت الصفحات اللي بتتابع أسعار الصرف في مصر على مواقع التواصل الاجتماعي الأخبار بخصوص إجراءات البنوك وده اتسبب في زيادة المعروض من الدولار مع عدم  وجود طلب على الرغم من تراجع أسعار صرف الدولار في التعاملات الأخيرة.
وفي السوق الرسمية استقر سعر صرف الدولار مقابل الجنيه في التعاملات الأخيرة وفي أكبر بنكين من حيث الأصول والتعاملات البنك الأهلي وبنك مصر استقر سعر صرف الدولار عند مستوى 30.75 جنيه للشراء و30.85 جنيه للبيع.
وفي البنوك الخاصة استقر سعر صرف الورقة الأمريكية الخضراء عند مستوى 30.85 جنيه للشراء و30.95 جنيه للبيع بالبنك التجاري الدولي مصر ولدى البنك المركزي المصري استقر سعر صرف الدولار عند مستوى 30.84 جنيه للشراء و30.93 جنيه للبيع