صدمة نهاية العام فى السوق السوداء للدولار.. أمر يحدث لأول مرة

قبل ساعات من نهاية 2023 حرفيا فيه جنون بيحصل فى السوق السودا للدولار وسعر العملة الأمريكية وصلت لمستويات محدش كان ممكن يصدقها قبل كده ومحدش عارف فوضى سوق الصرف دي هتوصل فين وممكن تخلص امتى .. فيا ترى ايه اللى بيحصل فى السوق الموازية ؟ وليه سعر الدولار وصل الى مستويات 55 جنيه مرة واحدة ؟ وهل الحكومة والبنك المركزي هيفضلوا يتفرجوا على اللي بيحصل ده كتير ؟ وايه الاجراءات اللى ممكن تتاخد للقضاء على السوق السودا للعملة؟

فى الساعات الأخيرة ارتفع سعر الدولار بالسوق السوداء إلى مستوى قياسي جديد  بالتزامن مع ارتفاعات غير مسبوقة في أسعار الدهب بالسوق المحلية مع تسعير دولار الدهب بأكتر من 60 جنيه رغم ان السعر الرسمي للدولار مستقر فى البنوك من شهر مارس اللى فات عند حدود 31 جنيه.

والارتفاعات القوية لدولار السوق الموازية والدهب في مصر جت متأثرة بزيادة الطلب علي الدولار والدهب الأيام اللى فاتت فى ظل انتشار كلام كتير عن تعويم محتمل للجنيه وده اللى بيخلي ناس كتير تحاول التحوط وحفظ قيمة مدخراتهم بشراء الدهب باعتباره ملاذ آمن وكمان الدولار

وزي ما كلنا عارفين مصر بتواجه ضغوط كبيرة جدا  بسبب نقص العملات الأجنبية خلال الفترة الأخيرة بعد خروج استثمارات أجنبية غير مباشرة بقيمة 22 مليار دولار خلال النص الأول من 2022  نتيجة للتأثيرات السلبية للتوترات العالمية الناجمة عن الصراع الروسي الأوكراني.. ونتيجة لكده سجل سعر الدولار ارتفاع بنسبة 96% رسميًا في البنوك المصرية خلال الـ 21 شهر اللى فاتت من خلال 3 تخفيضات لقيمة الجنيه فى محاولة لسد الفجوة التمويلية

ومؤخرا صدرت تعليمات من البنك المركزي بشأن تشديد رقابي للتدفقات النقدية الداخلة للبنوك من الدولار وفى الوقت نفسه قرر بعض البنوك تقييد حركة المدفوعات الدولارية لبطاقات الائتمان المصرية الصادرة .

وشملت الضوابط الجديدة للبنك المركزي عمليات الإيداع أو السحب بمبالغ نقدية كبيرة أو متكررة غير متوافقة مع المعلومات المتوفرة عن العميل، وعمليات الإيداع اللى بيقوم بيها أشخاص أو جهات مختلفة في حسابات أحد العملاء لغرض غير واضح أو دون وجود علاقة بين الأشخاص والجهات دي وبين العميل وكمانعمليات شراء وبيع العملات الأجنبية بمبالغ كبيرة نقدا أو متكررة دون مبرر واضح.

وقررت بعض البنوك تعليق استخدام البطاقات الائتمانية الجديدة في الخارج لفترة تصل إلى 6 شهور من تاريخ إصدارها في حين اكتفت بنوك تانية بتقديم قرار مشابه لمدة 3 شهور فقط.

و الخطوات دي كلها بتأتى في إطار تنفيذ القيود اللي وضعتها البنوك استجابةً لتوجيهات البنك المركزي  بهدف وقف سوء الاستخدام اللي تم رصده في التعاملات بالعملة الأجنبية، سواء داخل أو خارج البلاد، من خلال استخدام البطاقات الائتمانية.

ارتفاعات دولار السوق السوداء والدهب مدفوعة كمان بتوقعات تعويم الجنيه من مؤسسات وبنوك دولية و رفع بنك HSBC توقعاته لسعر الدولار مقابل الجنيه في الربع الأول من 2024  وتوقع  أن سعر الدولار يتراوح بين 40 و45 جنيهً.. فى نفس الوقت توقعت مؤسسة (موديز أناليتكس تخفيض إضافيً كبير في قيمة الجنيه المصري أمام العملات الأجنبية، من غير ما تحدد نسبة الخفض

ومن أيام توقع بنك "مورجان ستانلي" قيام الحكومة المصرية بتخفيض جزئي لقيمة الجنيه خلال الربع الأول من 2024 وقال ان سعر الدولار فى البنوك هيوصل إلى حوالي 39 جنيه