مافيا الذهب تشعل الأسواق.. وعيار 21 يسجل أرقام تاريخية

فيه حاجة غريبة بتحصل فى سوق الدهب بقالها كام يوم.. والتجار وبتوع الصاغة رجعوا تاني يعملوا مضاربات على سعر الدولار.. وفى الوقت اللى سعر الدولار الرسمي فى البنك المركزي والبنوك المصرية ما تعداش ال 31 جنيه بتوع الدهب بيسعروا الدولار على أكتر من ٦٠ جنيه..فيا ترى ايه اللى بيحصل فى سوق الصاغة؟ وهل الحكومة هتسيب الوضع يستمر وترجع ؟ ولا هتتدخل باجراءات وعقوبات رادعة ضد مافيا الدهب فى مصر؟ وإزاى اصلا السعر العالمي للدهب مستقر وفى مصر الاسعار بتقفز قفزات جنونية؟
 

 
فيه تلاعب وحاجات مش طبيعية بتحصل فى سوق الدهب فى مصر فى الفترة وفجأة بعد ما كانت الأسعار مستقرة بدأت تحصل قفزات مش طبيعية لدرجة ان في يوم واحد سعر جرام الدهب عيار 21 زاد أكتر من ١٥٠  جنيه مرة واحدة رغم ان مفيش حاجة حصلت تخلى الاسعار تزيد بالشكل ده مرة واحدة...والنهاردة وصل سعر الجرام لحوالى ٣٢٠٠ جنيه للعيار 21 الأكتر انتشارا فى مصر 
ولو جبت آلة حاسبة وحاولت تعرف تجار الصاغة مسعرين الدولار على كام وحسبت فرق السعر المحلي مع السعر العالمي هتلاقي ان تجار الدهب مسعرين الدولار على حوالى ٦٠ جنيه رغم ان السعر الرسمي فى البنوك لسه ما وصلش ل 31 جنيه 
اللى بيحصل فى سوق الدهب بيقول ان السوق الموازي للدولار بدأ يرجع وان فيه ناس جشعة كل اللى يهمها تحقيق الثروات على حساب البلد وعلى حساب العملة الوطنية لأن مفيش اى مبرر انك ترفع سعر الدولار بالشكل ده فى ظل ان أزمة نقص العملة بدأت تتراجع فى الفترة الأخيرة والبنوك بقت بتوفر الدولار لأى حد محتاجه 
لكن فيه وجهة نظر تانية بتقول ان تجار الدهب بيتحوطوا فى تحديد سعر المعدن النفيس وان مؤسسات التمويل الدولية بتتوقع انخفاض جديد فى سعر الجنيه المصري وان الدولار قبل نهاية الربع الاول من ٢٠٢٤ مرحبا هيوصل ل  ٤٥ جنيه في البنوك وان فيه تخفيض كبير فى قيمة العملة المحلية مش هيقل عن ٢٠%.

بس مين المافيا اللي بتحدد السعر.. وليه مش مرتبط بالسعر العالمي؟

زي ما قلنا قبل كده في  لحضراتكم إن الدهب قي في مصر حالة خاصة جدا يعني سوق مع نفسه بيرفع وينزل حسب عوامل ملهاش علاقة بالسعر العالمي وده لغز كبير الحقيقة لكن اللي عارف أسرار السوق هيعرف الأسباب

أسعار الدهب في مصر بتتحدد من اتجاهات السوق يعني العرض والطلب وكمية المعروض من المعدن بصرف النظر عن سعره بره ودا غير تدخلات كبار تجار السوق اللي بيحددوا للتجار الأصغر اتجاه السعر بجانب عمليات المضاربة اللي بتم في سوق المعدن الأصفر وعلاقتها بالدولار في السوق السودا لأن الحاجتين مرتبطين ببعض والدهب كان ليه دور كبير في إشعال أزمة الدولار من خلال الابواب الخلفية وعمليات التهريب واخفاء دولار السوق السوداء في تجارة المعدن الأصفر.

طيب ازاي بيتحدد سعر الدهب عالميا عشان نعرف قد إيه السوق المصري والمشتري  مظلوم ؟
شوف حضرتك هي عملية حسابية بسيطة بتمشي بيها أغلب أسواق الدهب بره عشان كده الأمور مستقرة في الخارج على عكس مصر إللي بيحصل فيها مضاربات واحتكار وتخزين المعدن لتعطيش السوق.
وسعر الدهب عالمياً بتتحدد ملامحه  في بورصة أمام الدولار يطلع وينزل حسب مؤشر البورصة دي ووحدة الدهب المعتمدة هنا بتكون الأونصة أو الأوقية ودي وحدة عالمية يعني وزنها موحد  وهو 31.1 جرام من عيار 24 وهي دهب صافي وسعرها حاليا في  علي سبيل المثال حالياً الأونصة  حوالي ٢٠٤٠ دولار وسعر الدهب محلياً في أي بلد بيكون ناتج ضرب الأونصة في سعر الدولار حسب عملة البلد يطلع سعر الأونصة بالعملة المحلية ولو طبقنا المثل دا على مصر مش هنلاقي الحسبة مظبوطة ابدا لان الدولار ليه اكتر من ٤ اسعار إلى جانب سعره الرسمي في البنوك

وزي ما قلنا في مصر فيه عوامل تانية بتدخل في حساب سعر الدهب غير سعره في البورصة العالمية زي سعر الدولار في السوق الموازي والعرض والطلب المحلي، ومن هنا نعرف إن نكبة الدهب سببها السوق السوداء اللي مسعره الدولار بشكل اكبر بكتير من السعر الرسمي في البنوك عشان كده الأسعار رفعت بشكل كبير في الشهور اللي فاتت بجانب زيادة العرض ودي بتسبب زيادة إضافية في سعر الدهب

بجانب طبعا جشع حيتان الصاغة وفرض اسعار مالهاش علاقة لا بسعر دولار السوق السودا ولا السعر العالمي للدهب.. وكل ده بيحصل والحكومة واقفة تتفرج ومخدتش اي اجراء لوقف جنون الدهب.