عملاق الشحن العالمي يعيد رحلاته لقناة السويس.. إيه اللى بيحصل فى البحر الأحمر؟

يا ترى ايه اللى بيحصل فى البحر الأحمر فى الأيام الأخيرة؟ وايه تاثيره على حركة التجارة العالمية ؟ وهل مهاجمة السفن التجارية ممكن يؤدي الى ارتفاع تكلفة النقل والشحن وبالتالى ارتفاع اسعار السلع المنقولة ؟ وهل اللى بيحصل ممكن يكون ليه تأثير على حركة المكلاحة فى قناة السويس أهم ممر مائي فى العالم؟ وهو ليه أصلا فيه ناس بتهاجم السفن اللى بتدخل البحر الأحمر؟

شركة الشحن الدنمركية ميرسك عملاق الشحن العالمي أعلنت  النهاردة إنها بتستعد لاستئناف عملياتها في البحر الأحمر وخليج عدن بعد نشر قوة عسكرية بقيادة الولايات المتحدة تهدف إلى ضمان سلامة التجارة في المنطقة.

وأوقفت شركة الشحن العملاقة مؤقتا إرسال السفن عبر مضيق باب المندب الشهر ده بسبب الهجمات على سفنها وبعد تعرضها لتهديدات شديدة بسبب هجمات مليشيات الحوثيين

وقالت ميرسك في بيان اعتبارا من اليوم الأحد 24 ديسمبر 2023 تلقينا تأكيدا بأن المبادرة الأمنية متعددة الجنسيات المعلن عنها مسبقا باسم ’حارس الازدهار’ تأسست ونُشرت للسماح للتجارة البحرية بالمرور عبر البحر الأحمروخليج عدن والعودة مرة تانية لاستخدام قناة السويس كبوابة بين آسيا وأوروبا ومع تفعيل المبادرة نستعد للسماح للسفن المتجهة إلى الشرق والغرب باستئناف العبور عبر البحر الأحمر.

وأعلنت ميرسك يوم التلات اللى فاتإعادة توجيه السفن حول أفريقيا عبر رأس الرجاء الصالح وقالت إنها هتفرض رسوم إضافية على الحاويات للشحنات المتجهة من آسيا لتغطية التكاليف الإضافية الناجمة عن زيادة مدة الرحلة.

وبكده هترجع سفن ميرسك للعبور من قناة السويس خصوصا ان تكلفة الطرق البديلة أعلى بمراحل كبيرة جدا.

وأعلنت الولايات المتحدة يوم التلات اللى فات إطلاق عملية متعددة الجنسيات لحماية التجارة في البحر الأحمر من هجمات الحوثيين اليمنيين المدعومين من إيران اللى بيطلقوا طائرات مسيرة وصواريخ على السفن الدولية من الشهر اللى فات ردا على الحرب الإسرائيلية في غزة.

ويوم السبت تم استهداف سفينة تجارية تابعة لإسرائيل واتسبب الهجوم فى اندلاع حريق على متن السفينة التجارية ولحد دلوقتى شنت ميليشيات الحوثيين أكتر  من 100 هجوم بالطائرات المسيرة والصواريخ الباليستية ضد سفن الشحن في البحر الأحمر وباب المندب على خلفية الحرب الدائرة بين غزة وإسرائيل.

واتهم البيت الأبيض إيران بالتورط بشكل كبير في التخطيط للعمليات ضد السفن التجارية بالبحر الأحمر

ومن الشهر اللى فات هاجمت مليشيات الحوثي المدعومة من إيران سفن تجارية تبحر في البحر الأحمر ردا على الهجوم الإسرائيلي على غزة وده دفع كبرى شركات الشحن إلى تغيير مساراتها عن المرور في الخط الملاحي عبر باب المندب.