تعليمات رئاسية جديدة .. والمركزي يفتح الملفات الخطيرة

متابعينا الكرام  على منصات بانكير أهلا وسهلا بكم وتحليل جديد لأهم الموضوعات والتقارير اللي قدمتها وحدة أبحاث بانكير على مدار اليوم الاثنين 25 ديسمبر 2023.

البداية مع تقرير مهم وتحليلي عن التحديات اللي بتواجه البنك المركزي المصري في 2024،
وعرض التقرير أكتر من ملف ساخن في انتظار الحسم بالسنة الجديدة أهمها حجم الديون الخارجية المستحقة بالدولار الأمريكي في السنة الجديدة، ومصير خفض قيمة الجنيه المصري مرة تانية أو "التعويم"، خاصة بعد تأجيل مراجعة صندوق النقد الدولي لبرنامج الإصلاح، اللي كانت مقررة في سبتمبر الماضي ودا غير التضخم والتصنيف الدولي وتعدد أسعار الصرف وتدبير حصيلة زيادة من العملة الأمريكية.

وكشف التقرير حجم التحديات اللي واجهها المركزي في 2023  ومنها الصراع الشرس مع السوق السودا للدولار والمضاربين وتجار الدهب الجشعين واللي بيخزنوا السلع وازاي بيواجه وكالات تصنيف دولية ليها أجندات خاصة، دا غير محاولات تخريب السوق، وحصار الدولة وتهريب الدولار وتزوير العملة وكم اشاعات يفوق الوصف كل يوم وحاجات تانية كتير، وفوق دا مطلوب منه توفير النقد الأجنبي سواء للاستيراد أو سداد الديون والقروض ومستحقات الشركات الأجنية واستيراد لوازم الإنتاج غير هم المستوردين وأصحاب الشركات اللي في أمس الحاجة للدولار ودا غير إنه مطلوب منه يردم فجوة دولارية بحوالي 17 مليار دولار وسط أزمات دولية ونار مولعة حولينا من كل حتة.
 

منصاات بانكير عرضت كمان فيديو مهم جدا عن ترويج العملات المزيفة على مواقع التواصل الاجتماعي.

وسلط التقرير الضوء على عرض فلوس مصرية مضروبة من أكتر من فئة على صفحات الفيس وغيرها من المنصات ومش كده كمان دا وصلت الجرأة بالمزورين أنهم يعرضوا نماذج من الفلوس المزيفة دي على الصفحات وكمان بكلام ترويجي زي اللي حصل في صفحة اسمها اسكندرية اون لاين خطوة بخطوة واللي عرضت فلوس مزورة وكمان بإعلان ترويجي زي أن الفلوس المعروضة والمغلفة مزورة يمكن الليزر ونوعية الورق الخشن وكمان عارض سعر الالف ب350 جنيه.

طبعا أجهزة الداخلية مش بتسيب الصفحات دي ومباحث الأموال العامة مع مباحث الإنترنت بتجيب اللي بيعمل كده وغالبا بيكون داخل بحساب واسم مضروب عشان محدش يقدر يجيبه لكن على الأقل الداخلية بتقفف الصفحات دي وغالبا بتوصل لطرف خيط وبتقبض على المتهمين.

معروف بالتاكيد أن تزوير العملة جريمة خطيرة والقانون بيعاقب عليها بشدة لأنها بتدمير الاقتصاد المصري وناس كتير بتوقع ضحية لما بيتعاملوا بالفلوس المزورة وهما مش عارفين وممكن دا يعرضهم للخطر رغم أنهم ملهمش ذنب.. لكن فيه جريمة تانية بتتم بواسطة الفلوس المضروبة وهي إن مزوري العملة بيشتروا بيها دولار من السوق السوداء وبيضاربوا في سعر الدولار ومش فارق معاهم طبعا حتى لو هيشتروا الدولار ب100 جنيه لأن كده كده الفلوس المصري مزورة ودا سبب من اسباب ارتفاع سعر الدولار في السوق الموازية ودا حصل وبيحصل فعلا وانتشرت الفلوس المزورة في سوق العملة السودا وفيه متعاملين كتير فيها اتنصب عليهم وباعوا دولار وخدوا فلوس مزورة بإتقان شديد.

وحدة أبحاث بانكير سلطت الاهتمام في تقرير ليها على فرمان الرئيس  السيسي الأخير لحكومة مدبولي بجانب تفاصيل الاجتماع الحاسم في الرئاسة ..
وقال التقرير إنه في الساعات الأخيرة اجتمع الرىئيس السيسي برئيس الوزراء ومعاه وزير المالية وطبعا اجتماع زي دا وتوقيته مهم جدا بسبب الظروف الاقتصادية والسياسية الصعبة اللي بتمر بيها البلد والرئيس رغم مشغولياته الضخمة في ملفات تتعلق بالأمن القومي المصري لكن بيدخل في الوقت المناسب عشان يحط النقط على الحروف

تعليمات الرئيس للحكومة الفترة الجاية كانت واضحة وصريحة  وهي تحسين أحوال المواطنين ورفع مستوى معيشتهم، وبناء دولة قادرة على توفير جودة حياة لائقة وكريمة، بشكل مستدام، لجميع مواطنيها.
الرئيس عبد الفتاح السيسي أدى تعليمات كمان بالاستمرار في تطوير الأداء ورفع كفاءة تنفيذ المشروعات بما يصب في تحسين مؤشرات الموازنة العامة وتخفيض العجز الكلي للموازنة وكان التوجيه واضح بخصوص تخفيض عجز الموازنة ودا اللي ركز عليه الرىئيس وعجز الموازنة هو الفرق بين المصروفات والايرادات ودا لما بيحصل بيبقى فيه خلل مالي واضح .
الرئيس أصدر تعليماته لمدبولي كمان بتكثيف العمل في مختلف المشروعات التنموية والخدمية ذات العائد المباشر على المواطنين، وكمان مواصلة دعم برامج الحماية الاجتماعية، بعد وصول عدد المستفيدين من برنامج تكافل وكرامة إلى 22 مليون مواطن بواقع أكثر من 5 ملايين أسرة، في مختلف محافظات الجمهورية، أخذاً في الاعتبار أن الفوائد المتحققة من البرنامج لا تقتصر على توفير المعاش النقدي بل تمتد للعديد من الجوانب الاجتماعية الهامة، ومنها خفض نسبة الأمية بين المستفيدين.
 

التقرير الأخير معانا في لايف النهاردة بخصوص خبر سار جدا  بيتعلق بقناة السويس ومستقبل الملاحة فيها بعد التطورات السلبية الأحيرة في جنوب البحر الأحمر.

شركة الشحن الدنمركية ميرسك عملاق الشحن العالمي أعلنت  النهاردة إنها بتستعد لاستئناف عملياتها في البحر الأحمر وخليج عدن بعد نشر قوة عسكرية بقيادة الولايات المتحدة تهدف إلى ضمان سلامة التجارة في المنطقة..

وكانت شركة الشحن العملاقة وقفت مؤقتا إرسال السفن عبر مضيق باب المندب الشهر ده بسبب الهجمات على سفنها وبعد تعرضها لتهديدات شديدة بسبب هجمات مليشيات الحوثيين

وبكده هترجع سفن ميرسك للعبور من قناة السويس خصوصا ان تكلفة الطرق البديلة أعلى بمراحل كبيرة جدا.

وأعلنت الولايات المتحدة التلات اللى فات إطلاق عملية متعددة الجنسيات لحماية التجارة في البحر الأحمر من هجمات الحوثيين اليمنيين المدعومين من إيران اللى بيطلقوا طائرات مسيرة وصواريخ على السفن الدولية من الشهر اللى فات ردا على الحرب الإسرائيلية في غزة.