لعبة بطاقات الـ Debit.. تفاصيل خطة تهريب والاتجار بالدولار عبر البنوك
مفيش كلام في الأوساط البنكية والعملاء إلا على قرار بعض البنوك المصرية بوقف بطاقات الائتمان في الخارج. والحقيقة فيه لبس كبير في الموضوع وناس كتير مش فاهمة أسباب القرار وإيه هي البطاقات اللي وقفت ولغاية امتي خليكم معانا في الفيديو ده هنشرحلكم بالتفصيل وببساطة ايه اللي حصل.
أولا أي معاملة بين البنك والعميل بتكون بناء على اتفاق وشروط مسبقة لأنك لما تروح تفتح حساب في اي بنك بيديك أوراق بتمضي عليها ودي بتكون قوانين وارشادات بيقولك البنك اللي ليك واللي عليك لكن كتير مننا مش بيدقق في الورق اللي بيمضي عليه، ومن بين الورق اللي حضرتك بتمضي عليه الالتزام بمعايير العمل في البنك وعدم استخدام الحساب في أي نشاط مشبوه وحقوق البنك ساعتها لو أخليت بشروط الاتفاق وعشان كده اي إجراء بياخدوا البنك ضد حضرتك بتكون ماضي عليه بالموافقة ومفيش قرار بنكي بيصدر إلا وفق سند قانوني ولوائح البنك اللي انت وافقت عليها يعني مفيش بنك هياخد أي إجراء ضدك إلا من وحي القانون.
طيب نيجي بقي لقرارت البنوك الأخير وهيئة البريد بوقف بعض أنواع البطاقات.. شوف حضرتك فيه عملاء استغلوا أزمة الدولار في مصر واستغلت بطاقات الدفع اللي معاها بحساباتها بالدولار ولأنه يقدر يسحب أي مبالغ دولارية من الفيزا دي فبقي يسحب بكميات كبيرة ويتاجر بيها في السوق السودا عشان يكسب من فرق السعر، وفي نفس الوقت بيعتبر تهريب للعملة خارج البلد باستخدام خدمات البنوك يعني هنا البطاقة أو الفيزا استغلت في غير الغرض منها ولأن المووضوع كان بناء على معلومات وظاهرة بتحصل على أرض الواقع وكشفت المعلومات إنه في استخدام كثيف جدا لبطاقات الدفع للسحب بالدولار وخاصة للبطاقات اللي صدرت بعد 21 ديسمبر الجاري يعني الهدف منها كان واضح وصريح وهو التلاعب والاتجار في العملة عشان كده البنوك وقفت البطاقات دي تحديدا ونركز في تحديدا دي لان البطاقات اللي صدرهم قبل كده محدش هيجي ناحيته لانهم عملاء قدامي وسحوباتهم الدولارية معقولة.
طيب إيه هي البطاقات اللي وقفت عشان فيه لبس كبير في النقطة دي.. شوف حضرتك البطاقات اللي وقفت هي خاصة بالمعاملات اللي بتم من خلال بطاقات الخصم لكل البنوك والمعاملات اللي بتتم خارج وداخل مصر، وقرار الوقف بيشمل بس بطاقات الخصم واسمها– Debit ، ودي غير بطاقات الإئتمان اللي بتعمل بشكل طبيعي.
طيب ايه هي بطاقات Debit ..شوف يافندم دي اسمها بطاقات الخصم اللي بتصدرها البنوك للعملاء اللي عندهم حسابات بنكية وتكون مربوطة بالحساب البنكي والأرصدة المتواجدة فيه سواء جنيه أو دولار أو اي عملة تانية، وهي وسيلة دفع بتستخدم لسحب الأموال مباشرة من حساب المستخدم في البنك، وبتيح البطاقات للأفراد إجراء عمليات شراء وسحب نقدي في المتاجر والصرافات الآلية بكل سهولة، ويتم استخدام بطاقات الخصم دي مع رقم التعريف الشخصي (PIN) لضمان أنها تستخدم فقط من قبل صاحبها.
ممكن حضرتك تسأل إيه الفرق بين بطاقات الإئتمان-Credit وبين بطاقات الخصم Debit.. شوف يافندم بطاقات الكريديت أو فيزا المشتريات هي اللي بتصدرها البنوك لعملائها وفق جدراتهم الإئتمانية وبتكون محدددة المبالغ وبيكون عليها عمولات كبيرة، وهي وسيلة دفع بتستخدم لشراء السلع والخدمات عن طريق استعارة المال من مؤسسة مالية، زي البنوك أو شركات بطاقات الائتمان، وبتيح لحاملها إجراء عمليات الشراء من خلال الإنترنت، في المحلات التجارية، وأثناء السفر، من غير الحاجة إلى حمل نقود، وبيتم تحديد حدود الائتمان المتاحة لكل حامل بناءً على تقدير قدرته على سداد المبالغ المستدانة، يعني بيحطلك مبلغ معين في حساب الكريديت عشان تشتري بيه حسب قدرتك على السداد وبعدها وبعدها حامل البطاقة بيسدد المبالغ المستدانة في فترة زمنية محددة، وإلا هيدفع فوائد على تلك المبالغ.
طيب ياترى كل بطاقات Debit هتوقف .. لأ طبعا حسب مصادر لـ«بانكير» قرارات البنوك بإيقاف المعاملات الدولية في الداخل والخارج بالبطاقات الائتمانية بيسري على البطاقات المُصدرة حديثًا بس وتحديدا بعد 20 ديسمبر الجاري، ولمدة 6 أشهر من تاريخ إصدارها وفيه بنوك خلت المدة 3 شهور بس.
وإن قرار الإيقاف لا يسري على بطاقات Debit القديمة، وهتفضل حدود المعاملات الدولية زي ما هي حسب نوع كل بطاقة.
وزي ماقلنا وحسب كلام المصادر قرارات البنوك المتتابعة صدرت بهدف مواجهة سوء استخدام البطاقات الائتمانية والتحايل وإفراط بعض العملاء فى استخراجها بعد أزمة الدولار، وعشان كده جات التعليمات بوقف البطاقات اللي صدرت من أيام.
وفعلا بدأ أكبر بنكين حكوميين وهما الأهلي وبنك مصر وفق المعاملات الدولية على بطاقات الائتمان داخل وخارج مصر، حيث طبق البنك الأهلي المصري القرار بداية من الخميس 21 ديسمبر لمدة 6 أشهر من تاريخ إصدار البطاقة.
وحسب رئيس قطاع الفروع والتجزئة ببنك مصر بدأ تفعيل إيقاف المعاملات الدولية بالبطاقات الائتمانية المصدرة حديثا من النهاردة الأحد، ونفس الخطوة خدها التجاري الدولي
في وقت اكتفت فيه بنوك تانية زي العربي الأفريقي الدولي والأهلي قطر الوطني بوقف الاستخدام الدولي لمدة 3 أشهر بس من تاريخ الإصدار.
كمان الهيئة القومية للبريد قررت تقليص حدود الدفع الدولي في بطاقات “إيزي باي Easy Pay”، مع وقف السحب الدولي على كل بطاقات حسابات التوفير الصادرة من الهيئة.
وقال مصدر بالهيئة إنه تم وقف التعامل والسحب الدولي على كل بطاقات حسابات التوفير الصادرة من الهيئة، بينما تم تقليص حدود الدفع الدولي لبطاقات “إيزي باي” إلى ما يعادل 2000 جنيه شهريا.
وكان الحد الأقصى للسحب النقدي من ماكينات الصرافة خارج مصر 100 دولار يوميًا، و500 دولار شهريًا عبر بطاقات إيزي باي، مع رسوم تحويل 5%، إضافة إلى 30 جنيه مصري ثابتة لكل عملية تحويل.
وعلى فكرة وقف البطاقات اللي بيستغلها أصحابها في المتاجرة والتحايل مش جديد وسبق وأصدر البنك المركزي المصري في أكتوبر اللي فات تعليمات للبنوك العاملة في مصر بوقف استخدام بطاقات الخصم المباشر للعملاء في الخارج، على أن يقتصر استخدامها داخل مصر فقط، ولحقه بقرار بوقف البطاقات الائتمانية أيضا.
ولكن قرر المركزي المصري في نفس الشهر فتح حدود الاستخدام المقررة بالكامل للبطاقة الائتمانية لأي عميل دون الحاجة لتقديم أي مستندات، بمجرد قيامه بالاتصال بخدمة العملاء بالبنك المصدر.
وخفف البنك المركزي أيضا القيود السابق فرضها على استخدام بطاقات الائتمان في الخارج، وألغى شرط تقديم العملاء لإثبات السفر قبل مغادرتهم.. يعني الموضوع كله ليه علاقة بالاستغلال السيء لأزمة الدولار والتربح منها وكل الاحراءات البنكية بتكون مؤقتة ولأسباب طارئة.
