مفاجأة في السوق السوداء النهاردة.. وفزع في الصاغة بعد نبؤة ساويرس

متابعينا الكرام في كل مكان أهلا وسهلا بكم على منصات بانكير وتحليل جديد لأهم الموضوعات الاقتصادية محليا ودوليا وقراءة جديده في أخبار الدولار والذهب والأسواق واللي قدمتها وحدة بانكير للأبحاث والتقارير على مدار اليوم السبت 23  ديسمبر 2023.

منصات بانكير قدمت النهارة تقارير مهمة كتير وكانت البداية من سوق الدهب وحالة الانفلات والفوضى في الأسعار وطرح التقرير سؤال.. هل تتحقق نبوءة ساويرس عن الدهب؟... وهل ممكن سعر الجرام يوصل لمراحل صعبة ..

وبنفكركم من حوالى 4 أو 5 أيام كده رجل الأعمال نجيب ساويرس قال تصريح مهم جدا عن مستقبل الدهب محدش خد باله منه ولا ركز معاه رغم انه تصريح خطير وبيكشف مستقبل المعدن النفيس رايح على فين .. والتصريح ده أهميته انه بيرسم طريق لكل واحد بيفكر يستثمر في الدهب لأن ساويرس قال فيه توقعاته لسعر الدهب عالميا والأمور ممكن توصل لفين في السنة الجديدة .

لما سألوا نجيب ساويرس عن توقعاته لمستقبل الدهب قال إنه بيعتبر من أهم الملاذات الآمنة لتجنب مخاطر سعر الصرف وأكد انه بيتوقع وصول سعر أوقية الدهب عالميا إلى 2400 دولار خلال الفترة الجاية .. وأكد كمان أنه من المفترض ارتفاع احتياطي مصر من الذهب بنحو مليار إلى 2 مليار دولار نتيجة زيادة سعر الدهب، ومعني كلام ساويرس إن العيار 21 ممكن يوصل 4 الاف جنيه.

طبعا تصريحات ساويرس مهمة جدت لانه  كمان بيقولك من دلوقتى ومن قبل ما 2024 تبدأ أصلا إن سعر الدهب خلال سنة هيزيد حوالى 350 دولار مرة واحدة في الاوقية يعني تقدر تستثمر وإنت مطمن.

التقرير التالي اللي عرضته منصات بانكير كان بخصوص مفاجأة البنوك للعملاء بعد قرار تثبيت الفايدة..

زي ما احنا عارفين البنوك كانت يوم الخميس على أعصابها قبل قرار المركزي المصري ما يطلع بتثبيت الفايدة لأن أي زيادة في الفايدة ببساطة كده البنوك هي اللي بتشيلها لأن رفعها بيحمل بنوك تدفع زيادة على عوائد أو فوائد للشهادات اللي طرحتها قبل كده عشان دا البنوك تنفست الصعداء يوم الخميس بعد قرار لجنة السياسة النقدية.

نرجع لمفاجأة البنوك للمصريين وهي خاصة بطرح شهادات ادخار جديدة زي ما قال بانكير قبل كده وبعائد قياسي ودا لأن قرار المركزي بتثبيت الفائدة هيساهم في إبقاء البنوك على نفس معدل العائد على شهادات الادخار والودائع بين البنوك المنافس

وحسب المعلومات البنوك بتستعد لطرح شهادات جديدة بأسعار فائدة مرتفعة بعد تثبيت المركزي للفائدة وممكن توصل زي ما قلنا ل30% ودا هيتوقف على حسب حالة كل بنك و مدى احتياجه لمدخرات جديدة لتعزيز مستويات السيولة عنده أو الحفاظ على عملائه الحاليين وأسعار الفائدة في البنوك المنافسة ودا اللي بيأكده خبراء البنوك.

وحدة أبحاث بانكير عرضت تقرير مهم على منصاتها بيسلط  الضوء على مصير مفاوضات مصر مع صندوق النقد بعد قرار المركزي بالتثبيت واستبعاد التعويم.

وبحسب الخبراء قرار تثبيت أسعار الفائدة في مصر للمرة التالتة على التوالي بيشير غالبا إلى تغير كبير في مطالب صندوق النقد الدولي من الحكومة المصرية اللى بتجري مفاوضات حول زيادة برنامج التمويل اللي تمت الموافقة عليه في ديسمبر 2022 بقيمة 3 مليار دولار.

وفي تقرير حديث، كانت وكالة "بلومبيرج" أشارت إلى أن الحكومة المصرية اقتربت من التوصل إلى اتفاق مع صندوق النقد الدولي لتوسيع برنامج الإنقاذ اللي بتبلغ قيمته 3 مليار دولار ليصل إلى 6 مليار دولار ونقلت الوكالة عن مصادر أن المفاوضات لسه مستمرة لزيادة حجم برنامج التمويل.

التقرير الأخير على في لايف النهاردة بخصوص اللي حصل في السوق السودا للدولار بعد قرار التثبيت وملف التعويم لأنهم مرتبطين ببعض.
وحسب الأخبار اللي جاية من السوق السودا .. بعد ساعات من تثبيت "المركزي" لسعر الفايدة على الإيداع والاقراض للمرة التالتة على التوالي شهد سعر الدولار في السوق الموازية تحركات طفيفة لكن رغم كده فيه شلل وارتباك واضح بيضرب تجار العملة والمضاربين على الدولار خصوصا وانهم اتفاجئوا من قرار المركزي وكانوا متوقعين رفع أسعار الفايدة على الأقل 300 نقطة أساس وفيه ناس كتير منهم كانوا بيروجوا ان الدولار بعد قرار رفع الفايدة هيقفز الى 55 جنيه ويمكن ده اللى خلا عمليات تنفيذ بيع وشراء العملة في السوق الموازية تراجعت بشكل ملحوظ في الكام ساعة الأخيرة.

لكن المؤكد ان سعر دولار السوق السودا مش هيتراجع بعد قرار تثبيت الفايدة وحاليا الأنظار هتبدأ تتجه لاجتماع لجنة السياسة النقدية في فبراير الجاى واللى بنسبة كبيرة هيشهد أكبر زيادة في أسعار الفايدة خصوصا لو استمر التضخم في ارتفاعه وفشلت كل الإجراءات في احتواء ارتفاعات الأسعار.

أما بخصوص التعويم فزي ما قولنا لحضراتكم قبل كده مش هيحصل الا في حالة واحدة بس وهى إن البنك المركزي يجمع سيولة دولارية كبيرة كغطاء لأى خفض محتمل في قيمة العملة وده لسه محصلش لحد دلوقتى صحيح فيه محاولات وفيه تحركات بتحصل لجمع المبالغ المطلوبة .