مفاجأة البنك المركزي في ملف التعويم.. مش هيحصل الا في الحالة دي!!

طبعا مفيش كلام في مصر كلها دلوقتى الا عن تعويم الجنيه المنتظر ومعظم الناس بقت خلاص قاعدة ومستنية قرار تخفيض قيمة الجنيه في أي لحظة خصوصا وان كل التقاير الدولية اللى طالعة من مؤسسات ليها سمعة وصيت بتؤكد أن فيه تحريك هيحصل في سعر الصرف بعد انتخابات الرئاسة اللى انتهت رسميا بفوز الرئيس عبدالفتاح السيسي بولاية جديدة. فيا ترى هو فعلا فيه تعويم ولا لأ ؟ ولو فيه سعر الدولار متوقع يوصل كام في البنوك؟ وايه المفاجأة المرتبطة بالبنك المركزي في ملف تخفيض قيمة الجنيه؟ وهل لو حصل تعويم هيكون الأخير وهنقضى على السوق السودا للدولار ولا ممكن نرجع نلف في نفس الدايرة تانى ونيجي بعد كام شهر ونقول لازم تخفيض سعر العملة من جديد؟ 
 

 
مفيش شك ان مصر بتعانى من ازمة واضحة في النقد الأجنبي وشح كبير في الدولار وده اتسبب ف ارتفاعات تاريخية في سعر العملة الامريكية وخلا الحكومة تضطر تخفض قيمة الجنيه 3 مرات من مارس 2022 ولحد دلوقتي ورغم كده ومع استفحال الأزمة الدولار كل شوية بيتوحش وسعره وصل في السوق السودا الى مستويات أعلى من 50 جنيه في الوقت اللى سعره في البنوك مستقر عند حدود 31 جنيه وبسبب الفجروة الكبيرة بين السعرين الرسمي والموازي بقا فيه كلام قوي عن ضرورة تحرك البنك المركزي لسد الفجوة دي والقضاء بشكل نهائي على السوق السودا عشان منفضلش بنلف في نفس الدايرة المقفولة ونيجيى بعد شوية نقول محتاجين نعوم تانى 
طب البنك المركزي بيفكر ازاى في الملف ده ؟
بص يا سيدي .. البنك المركزي مش هيفكر أبدا في تخفيض قيمة الجنيه غير في حالة واحدة بس ومن غيرها عمرها ما هيحرك سعر الصرف حتى لو كان ده بيتعارض مع شروط اى مؤسسة تمويلية مصر ببتعامل معاها والحالة دي ضخ من 20 إلي 30 مليار دولار في البنوك ورفع القيود عن تدبير العملة لأن من غير كده لو حصل تخفيض في قيمة العملة محدش هيعرف يسيطر على سعر الدولار وممكن وقتها نسمع أرقام تخوف عن سعر الدولار في مقابل الجنيه يعنى مش يبعيد ابدا تلاقي الدور وصل 100 جنيه أو أكتر وعشان كده البنك المركزي متأنى جدا في الخطوة الجاية فيما يتعلق بسعر صرف الجنيه امام العملات الأحنبية وبيتحرك بحرص شديد وحتى كل الاخبار اللى طالعة من الكواليس بتقول انه حتى لو حصل تحريك لسعر الصرف هيكون تحريك جزئي ومرحلى مش تحرير كامل للصرف زي ما ناس كتير كانت بتقول بس برضوا حتى ده مرتبط بثدرة الدولة على توفير حصيلة دولارية وغطاء دولاري يساعد في تخطي مرحلة تخفيض قيمة العملة
طب والبنك المركزي هيجيب منين 20 ولا 30 مليار دولار ؟
ده سؤال مهم جدا .. البنك المركزي بالفعل شغال على تعظيم العوايد الدولارية من اكتر من مصدر أولها المصادر التقليدية المعروفة زي الصادرات اللى حصل فيها نمو ملحوظ في 2023 ومع الصادرات بيحاول يقلل فاتورة الاستيراد لأقل حد ممكن وتقدر تقول ان فاتورة الاستيراد تراجعت السنة دي بحوالي 15 مليار دولار في اطار خطط التقشف وتقليل الاعتماد على المنتج الأجنبي 
بالإضافة كمان الى العوائد المنتظرة من خطط الطروحات الحكومية وكمان حزم التمويل اللى هتحصل عليها مصر سواء من صندوق النقد الدولى او من الاتحاد الأوربي او حتى من الأشقاء العرب وبعض الشركاء الدوليين 
يعنى كده فيه تعويم ولا لأ ؟ 
الإجابة على السؤال ده هيحددها مدى النجاح في جمع المبلغ اللى قولنا لحضراتكم عليه ومن غير المبلغ ده مش هيكون فيه تحريك لسعر الصرف لأن نتايجه هتكون صعبة جدا على الاقتصاد