كله هيبقي إلكتروني.. مدبولي يشكل حكومة حرب لمواجهة التلاعب في الأسواق
الحكومة ليها شهور طويلة بتحارب مافيا التجار والتلاعب في الأسواق وبتطلع تصريحات وقرارات كل شوية عشان تضبط السوق لكن مكنش فيه فائدة ويرجع التجار يتحكموا تاني قي الأسعار وحجب السلع ولغاية ما جت فضيحة الفساد في وزارة التموين والحكومة عرفت مين اللي بيلعب في السوق وإن فيه فساد كبير جدا وتربح واستغلال نفوذ وإن الموضوع مش سلع وتجارة لكن دا تربح وملايين بتروح لجيوب المحتركين واللي وراهم .
النهاردة الحكومة عملت زي انتفاضة كده والدكتور مدبولي عمل زي اجتماع حرب على التجار المتلاعبين في الأسعار وخد قرارات وخطوات جريئة لضبط أسعار السلع بالأسواق، ومنها تكليف الدكتور مصطفى مدبولي رئيس مجلس الوزراء، بتغليظ العقوبة على كل من يحتكر أو يخفي السلع عن المواطنين، وتكليفه بإعداد تعديل تشريعي بهذا الشأن، وتشكيل لجنة دائمة لمتابعة حركة الأسواق، بشكل مركزي، وعلى مستوى المحافظات.
كمان كلف رئيس الوزراء، بسرعة عقد اجتماعات مع مسئولي اتحاد الصناعات المصرية، والغرف التجارية، للتوافق على تكلفة الإنتاج وهامش الربح للسلع الرئيسية اللي هيتمّ تحديدها، لضمان وصولها إلى المستهلك بالسعر العادل.
وشملت القرارات الاستمرار في ضخ المزيد من الكميات من السلع بالأسواق والمجمعات التجارية تحقيقاً للوفرة والاتاحة.
وكمان تكليف بتشديد وإحكام الرقابة على الأسواق من خلال تكثيف الحملات الرقابية.مع التواجد الميداني بشكل مستمر من جانب مختلف الجهات الرقابية.
مدبولي قرر كمان تشكيل لجنة دايمة تابعة لمجلس الوزراء لمتابعة أسعار السلع الغذائية الاستراتيجية بشكل دوري.. وإعداد تقارير أسبوعية للتحقق من عدم تجاوز الأسعار لتلك السلع.
وقرر مدبولي كمان دراسة استصدار قرار من مجلس الوزراء بتحديد السلع الغذائية الرئيسية لفترة زمنية محددة، ودا وفقا لمواد قانون حماية المستهلك.
وأخيرا قرر مدبولي استحداث نظام الكتروني لمتابعة تداول السلع، بما يتيح تتبعها من مكان توريدها الأصلي وصولًا للمستهلك النهائي ورصد توقفها في مخازن أو أماكن خارج منظومة التداول.. ومدبولي أعلن كمان إن الأولوية دلوقتي بزيادة حجم الاستثمارات في المناطق اللوجيستية للسلع الغذائية الاستراتيجية ودي اهم حاجة قالها رئيس الحكومة النهاردة على لسان وزيرة التخطيط لأن مشكلة مصر الكبيرة أساسا في قلة وتواضع صناعة الغذاء عامة أو السلع الغذائية رغم إن مصر سوق ضخم جدا وسوق مستهلك ولو فيه صناعات غذائية ضخمة مفيش حد يقدر يتحكم في الأسعار ولا كمام يحجبها عن الناس.
