البنك المركزي هيعمل ايه بعد 10 ايام؟.. قرارات آخر السنة

 
يا ترى البنك المركزي هيعمل ايه بعد 10 ايام؟ وايه القرار اللى الأسواق بتنتظره قبل نهاية 2023 ؟ وايه تأثيرالقرار ده على أسعار الدهب والدولارفى 2024 ؟ وايه خطة صناع السياسة النقدية للتعامل مع ازمة شح العملة فى السنة الجديدة؟ وايه القرارات الجريئة والحاسمة اللى ممكن تصدر فى الاتجاه ده؟
 

 
خلاص بعد 10 ايام هيعقد البنك المركزي آخر اجتماع ليه فى 2023 للنظرفى اسعار الفايدة وحسم مصيرها وسط توقعات كبيرة بالابقاء على السعر الحالي زيما هو بسبب تراجع معدلات التضمفي اخر تقرير للجهاز المركزي للتعبئة والاحصاء .. وطبعا تثبيت سعر الفايدة هيكون ليه تأثيرات ايجابية على السوق وعلى اسعار السلع بشكل عام لكن رفعها هيأثر على السوق وممكن يساهم فى ارتفاع الأسعار.. والمرة دي اجتماع لجنة السياسة النقدية بيتزامن مع توقعات بتخفيض جديد فى قيمة العملة بسبب التقارير اللى بتطلع من المؤسسات الدولية كل شوية واللى خلت بقا فيه يقين عند ناس كتير ان مصر هتعمل تعويم جديد للجنية بعد انتخابات الرئاسة اللى بتجرى حاليا وهتنتهي بعد بكر.
طب ليه التوقعات بتخفيض قيمة العملة المصرية بتزيد يوم بعد يوم ؟ 
بص يا سيدي فيه ضغط كبير جدا على الجنيه بسبب تراجع قيمته في اخر سنتين وبسبب ان مصر بتستورد معظم احتياجاتها من الخارج وبالتالي الدولار عليه اقبال كبير جدا في الوقت اللى حجم تصنيع مصر وصادراتها مش بالضخامة اللى ممكن تعمل توازن في ميزان المدفوعات وبالتالي كل شوية سعر الدور بيرتفع وسعر الجنيه بينخفض وده بيعمل فجوة تمويلية كبيرة في الموازنة العامة وبيخلى الحكومة تتضطر للاستدانة من الخارج لسد الفجوة دي أو تلجأ لبيع أصول مملوكة للدولة لمستثمرين أجانب أو صناديق استثمار عربية وأجنبية لتوفير سيولة دولارية وفى ظل استمرار أزمة نقص العملة لأسباب كتير جدا كل يوم الفجوة بين السعر الرسمي للدولار في البنوك وسعره في السوق السودا بتزيد ومعاها بتزيد التكهنات والتوقعات حوالين خفض جديد في قيمة العملة المصرية.. والأقرب لحد دلوقتى ان هيكون فيه تحريك في سعر الصرف خلال الشهور القليلة الجاية. 
طب وسعر الفايدة هيرتفع هو كمان ولا لأ؟ 
يوم 21 ديسمبر الجاي  هيحصل اجتماع مهم جدا في البنك المركزي.. والاجتماع ده هيكون ليه تأثير كبير جدا على الأسواق وعلى حركة المال والأعمال.. وفى الاجتماع ده هتبحث لجنة الساسة النقدية مصير أسعار الفايدة في اخر اجتماع ليها في 2023 .. بس ليه بنقول ان الاجتماع أهم اجتماع فى 2023  وليه متوقع تحصل فيه مفاجآت وايه علاقة ده بالتقارب اللى حصل بين الحكومة المصرية وصندوق النقد.
زي ما احنا عارفين لجنة السياسة النقدية بتجتمع يوم الخميس كل 6 أسابيع، والجدول الزمنى لاجتماعات اللجنة لغاية آخر  السنة بيكون معلن على الموقع الإلكتروني للبنك المركزي.. وبيعرض على لجنة السياسة النقدية التقارير والدراسات الاقتصادية والمالية اللى بتعدها وحدة السياسة النقدية بالبنك المركزى وبتتصمن الدراسات آخر التطورات المحلية والعالمية وبتقدر كافة المخاطر المرتبطة باحتمالات التضخم قبل اتخاذ أي قرار، وبيتم على الجانب المحلى، متابعة مجموعة من المتغيرات منها  التضخم، أسعار الفائدة، التطورات النقدية والائتمانية، أسعار الأصول ومؤشرات القطاع الحقيقي.
وعلى الجانب الدولى بيتم دراسة ومتابعة معدلات النمو والتضخم العالمية وأسعار الفائدة العالمية والتوقعات المستقبلية.
وايه تأثيرر قرار اسعار الفايدة على الأسواق ؟ 
قرار الفايدة ده واحد من أهم القرارات اللى بتحدد السياسة النقدية اللى بيتبناها البنك المركزي ورفع اسعار الفايدة بيكون ليه تداعيات خطيرة على حجم الدين الحكومى الداخلى وده لأن الحكومة هي أكبر مقترض من البنوك ورفع الفايدة بيعني رفع اعباء خدمة الدين كمان مع رفع الفايدة ده بيكون ليه تأثير على الاستثمار وعلى الانتاج لأن كل ما الفايدة بترفع المستثمر بيفضل يحط فلوسه فى أدوات الدين اللى بتحققه ربح مضمون وفايدة عالية من غير ما يصرف جنيه واحد على مقر لشركته أو رواتب الموظفين أو حتى فواتير الكهرباء والميا والغاز
ولو تم رفع سعر الفايدة فده هيكون ليه تاثير سلبي على سوق الدهب مثلا لأن الناس ساعتها خيارها الاستثمارى الأول هيكون الاستثمار في أدوات الدين الحكومية والاستفادة من العائد المرتفع لشهادت الادخار واذون الخزانة والسندات كمان الدولار سعره هيرتفع لأن اى أنباء عن اقتراب تخفيض في قيمة العملة المحلية بيزود سعر العملة الأمريكية خصوصا في السوق السودا ومع ارتفاع الدولار هتزيد تكلفة كل السلع والخدمات