فنكوش اثيوبيا ومعجزة السيسي.. مش أي حد يبني دولة
العبرة بالفعل .. دا مثل مصري معروف يعني اللي يتكلم غير اللي بينفذ والفعل غير الكلام.. ايه اللي حصل في مصر وإثيوبيا وازاي السيسي بنى دولة في أقل من 10 سنين وليه أبي أحمد فشل ودولته على وشك الإفلاس
الانجازات هي الفيصل في حكم بين رئيس ورئيس وفيه فرق كبير بين اللي بيني دولة زي ما قال الكتاب من الصفر وبين اللي بيبيع الوهم والفنكوش لشعبه.. ليه بتقول كده .. عشان مش شماتة في حد وكل دولة ليها ظروفها لكن عشان نعرف اللي حصل في مصر مكانش صدفة لكن كان فكر وتخطيط وإدارة فاهمة بتعمل إيه ولسه هتعمل ايه وازاي قدرت تكسر الريح الشديدة لأن عودها بقي صلب في أقل من 10 سنين.
تعالوا نشوف اللي حصل في اثيوبيا وهي دولة عندها مقومات طبيعية ضخمة جدا مقارنة بمصر وكفاية أراضيها الزراعية وجي ابي احمد سوق نفسه إنه منقذ إثيوبيا وكان مشروعه لدولته وللناس عنده سد النهضة اللي بدأ فيه في غفلة من مصر واستغل الظروف وانشغال مصر بأحداث 2011 والمهم إعلام الإخوان نصبوا ابي احمد بطل وازاي بيعمل نهضة في بلده لغاية ما وقعت الدولة في اول اختبار حقيقي والنهاردة اقتربت إثيوبيا من التخلف عن سداد التزامات الخارجية يعني مش هقدر تسدد ديونها وهتعلن إفلاسها ودا بعد انتهاء محادثات مع حاملي سنداتها الدولية البالغة مليار دولار دون التوصل لاتفاق الجمعه اللي فاتت.
اعلام الإخوان وكثير من الاقتصاديين اعتبروا إثيوبيا واحدة من أكتر الاقتصادات الواعدة في أفريقيا، لكن تراكم أعباء كلفة جائحة كوفيد-19 خلاها تتخلف في سداد التزاماتها تخيل أزمة واحدة مرت بيها إثيوبيا ووقعت اومال لو مرت باللي مرت بيه مصر كانت عملت ايه ومش قادرة تسدد مليار دولار.
تعالي بقي شوف مصر واللي في عز ازماتها سددت ط 52 مليار دولار مرة واحدة من أقساط وفوائد التمويلات المستحقة عليها، خلال العامين الماليين (2021 - 2022) و(2022 - 2023)، وهما أكتر سنتين مر فيهما العالم بتحديات اقتصادية صعبة.
وقال وزير المالية إن مصر سددت خلال النصف الأول من العام المالي الجاري، وحتى 30 يونيو الماضي 25.5 مليار دولار، وكشف إن الديون اللي سددتها الدولة بخلاف 22 إلى 23 مليار دولار من الاستثمارات قصيرة الأجل اللي خرجت من مصر خلال الأعوام الماضية يعني مصر سددت كل المبالغ دي في 6 شهور بس وفي نفس الوقت الدولة موقعتش وفضلت واقفة وبتستورد بحوالي 70 مليار دولار وفي نفس الوقت شغالة في خطط التنمية وكمان بتحارب سوق سودا ومضاربين ومؤامرات خارجية خبيثة وبتواجه مخاطر خطيرة على كل حدودها تقريبا وفي نفس الوقت استضافت ملايين اللاجئين ولسه واقفة علي رجليها.
كل اللي حصل في مصر وإنها تواجه كل التحديات دي من غير ما توقع مكانش معجزة ولا حاجة لكن كان شغل على مدار 9 سنين أشغال شاقة وطنية لبناء الدولة ولرئيس مش بينام وحكومات هزمت الزمن والعقل وخلي مصر صاحبة اقوى مشروع تنمية في الدول الناشئة وكل المشروعات اللي اتعملت كانت ضرورية عشان البلد تنطلق ولسه مصر هتنور اكتر واكتر مع السيسي اللي مايعرفش كلمة معلش ولا مستحيل ولا بكرة.
