العائد يصرف مقدماً.. بنوك بتقدم شهادات ادخار بفوائد خرافية
ميزة شهادة الاستثمار.. أنه بيجيلك عائد كل شهر.. استثمار مريح يعني.. فلوس بتحطها في البنك.. وبيجيلك فلوس منها كل شهر.. ودا من غير ما تبذل أي مجهود.. والنهاردة هانتكلم عن أعلى شهادات الادخار اللي طرحتها البنوك الفترة اللي فاتت.
الشهادت أحسن من الودائع لأنها بتجبلك عوائد أكبر بصفة منتظمة.. لكن ماتقدرش في الغالب تلمس الفلوس اللي اشتريت بيها الشهادة دي إلا بعد ما يعدي 6 شهور من وقت شرائها.
وعامة يعني شهادة الإدخار.. هو استثمار طويل الأجل.. يعني فلوس أنت مش عايزها دلوقتي فابتربطها فى شهادة واللي بتكون سنة وأحيانًا اتنين وأحيانًا تلاتة.. وفي اكتر من كدا لكن مش متداولة دلوقتي.
السؤال الأهم في الموضوع اللي هو محور كلامنا النهاردة هو .. اية هي أعلى شهادات استثمار في مصر دلوقتي.
بص يا فندم وركز معايا علشان هانقول كلام مهم.
عندك في بنك التنمية الصناعية عائد خراااافي كدا.. وهو أنك بتاخد ٣٩٪ من أصل المبلغ اللي اشتريت بيه الشهادة.. ودا بتاخده مرة واحدة بنظام التراكمي.
بشكل مفصل.. أنت لو عملت الشهادة بتاعة بنك التنمية ب ١٠٠ ألف هاتاخد العائد بتاعك تاني يوم بنسبة ٣٩٪ من أصل الشهادة.
ودي شهادة مميزة للناس اللي عايزة فلوس بسرعة
وفي عندك برضوا.. شهادة الإدخار اللي بيطرحها البنك الأهلي المصري.. ودي شهادة ثلاثية.. يعني مدتها 3 سنين.. والعائد بيكون شهري.. يعني كل شهر هاتخد العائد بتاعك.
وماتقلقش.. العائد هاتاخده في الشهر التالي لشراء الشهادة.. المهم أنك لازم تعرف أن الحد الأدنى لشراء شهادة الادخار دي هي 1000 جنيه ومضاعفاتها.
والعائد على الشهادة دي زي ما قولنا بيتصرف شهري واللي نسبة الفايدة عليها تبلغ 19%.
وفي نفس البنك.. تقدر برضوا تشتري شهادة ادخارلكن ذات عائد متغير.. ودي اللي بتصل مدتها لـ 3 سنين.. والعائد بتاعها برضوا بيتصرف شهري .. واللي بيتم احتسابه من الشهر التالي لشراء الشهادة.
المهم أن الحد الأدنى لشراء الشهادة دي هو 1000 جنيه ومضاعفاتها.. ونسبة الفايدة عليها بيصل في السنة الأولى لـ 22%، وفي السنة الثانية لـ 18%، وفي السنة الثالثة بيبلغ 16%.
كمان قدامك حل تاني.. وهو أنك تشتري شهادة القمة اللي بيطرحها بنك مصر .. واللي مدتها بتصل لـ 3 سنين.. وقيمتها بتبلغ ألف جنيه ومضاعفاتها.. والميزة بقى في الشهادة دي أن الفايدة بتاعتك هاتاخدها بشكل دوري وثابت.. يعني كل شهر فلوسك في جيبك.
والفايدة على الشهادة دي 19%.. والعائد بتاعها بيصرف شهريًا.
