دولار وسبيكة دهب التمن والمقابل رقبة مصر.. الطابور الخامس يحدد ساعة الصفر
الفاتحة على الخاين وابن الحرام.. دا عهد المصريين لما ياخدو العهد على بعض والخاين هنا هو اللي ببطعن في الضهر ويهرب ومايعملش حساب وطن ولا دين ولا قرايب وكل همه انتقام أو ثأر أو حقد وعمالة.. الكلام نهاردة عن الطابور الخامس اللي بيوقع البلد ومش حاسس إنه بيوديها للفوضى والدمار وكل أدواته ماوس وكيبورد وموبايل حديث.
من حقك تصدق إن فيه مؤامرة على البلد أو متصدقش لكن لو بصيت وفكرت شوية مع نفسك وشفت اللي بيحصل حوليك هتعرف إن الموضوع كبير ومش أزمة وخلاص والعالم كله ييطحن في بعض والحروب ما بقتش طيارات ودبابات لكن بقت تطبيقات وذكاء اصطناعي مخيف وشبكات عنكبوتية سرية ومافيا معلوماتية الغرب مسخرها لحماية نفسه ومصالحه وفي نفس الوقت بيحارب بيها اعدائه بشدة من غير ما يحرك صاروخ يقدر يسقط بيها أعدائه بآلة رهيبة من التكنولوجيا الحديثة تعالوا شوفوا كام خبر سلبي وكان إشاعة بتطلع في الدقيقة عن مصر وكان ألف بوست خبيث مدسوس بين فضاء السوشيال ميديا وكام بلوجرر اتهيأت له كل الظروف عشان يهاجم بلده ليل نهار وانت تعرف إن الناس دي مابتلعبش وعارفة بتعمل ايه.
كل حرب حتى لو عن بعد زي الحروب اللي قلنا عليها وراء الكمبيوتر أو التليفون بتكون زي الحروب الحقيقية جوهرها صراع مصالح وسيطرة على الأسواق العالمية والناشئة والفقيرة كمان، ودا بجانب التسويق لمشروعات الدول الغربية والولايات المتحدة سواء كانت مشروعات سياسية أو عسكرية أو اقتصادية أو حتى فكرية..، وعاوز تعرف ازاي الامور بتترتب كل الكلام عن تهجير الفلسطينيين من غزة لمصر بدأ الاول على صفحات السوشيال ميديا ووسائل الاعلام الغربية والعبرية قبل ما حتى حد يتكلم بشكل رسمي وحصل تسويق كبير للمشروع وجابوا كمان تفاصيله وحاولوا يقنعوا بيها الرأي العام العربي والعالمي.
حروب الذكاء الاصطناعي الحديثة ظهرت كويس جدا في الأزمة الأخيرة بالمنطقة وشفنا ازاي فيديو مركب أو حقيقي بيغير ميزان الرأي العام الغربي وانتقل من النقيض للنقيض في خلال أيام.. هي دي القوة الجديدة اللي الدول بتتصارع عشان تملكها وامبارح الرىئيس الروسي بوتين حذر من احتكار الغرب لتكنولوجيا الذكاء الاصطناعي وطالب الشركات الروسية بكسر الاحتكار دا.. إذا كانت روسيا بكل قوتها وتقدمها بتشتكي من تأثير الذكاء الاصطناعي عليها فمابالك بالدول الفقيرة أو النامية.
مصر بتعتبر اكتر دول المنطقة وأمكن العالم اللي بتعاني من حروب التكنولوجيا الحديثة واللي فجأة تحولت لأداة لتشويه الدولة المصرية وشفنا وسائل إعلام الإخوان وصفحاتهم على سوشيال ميديا ازاي بتقلب الأكاذيب لحقايق وازاي بتسخدم التكنولوجيا الحديثة في تركيب الفيديوهات والمقاطع والأصوات وتروجها وكأنها حقيقية زي ما حصلت كتير ونشروا تسجيلات قالوا عليها تسريبات لمسؤولين مصريين عشان يضربوا اسفين بين الناس وحكومتهم ورئيسهم ودلوقتي بقي سهل جدا تركب صورة اي شخص على جسم وتقلد الصوت واللهجة كمان من خلال تطبيقات حديثة جدا وسهلة وتطلع بيان أو تسريب منسوب إليه... اللي بيحصل في مصر من هجوم إلكتروني منظم وممنهج دا مش صدفة ولاعشوائي بالعكس دا طابور خامس هو عارف بيعمل ايه وحملاته بتزيد وهتزيد وهتوصل الذروة قبل انتخابات الرئاسة بساعات.. ومش مهم تيجي في الدولار أو الدهب أو الأسعار أو الإشاعات أو تقارير سلبية أو افلام وثائقية مزيفة أو دراسات غير محايدة أو توقعات خبيثة.
طيب حد ممكن يطلع ويقول لنا وهو بيتفرج على الفيديو طابور خامس ايه ومؤامرات ايه هو انت حياتك كدولة حاجة الدول ولا الأجهزة تخاف منها... هنرد ونقول لحضرتك ايوا مصر عندها كل حاجة تخليها هدف لكل متآمر وحاقد كمان .. عندها دولة جديدة اتبنت بكامل مرافقها واستثمار هيكون الأضخم في المنطقة واقتصاد مفيش حاجة قادرة توقعه ولسه هينطلق وعندك قناة السويس وطرق التجارة الدولية وعندك الضبعة النووي وقوات مسلحة هي الأقوى في المنطقة وعندك رئيس مابيخافش وعارف قوة وحجم دولته الحقيقي وإنه يقدر يواجه العالم ولما بيغضب بيحذر مرة واحدة بس ويحط خطوط حمراء.. عندك دولة تقدر توقف العالم وتقعده تاني.
