الذهب سعره ارتفع.. هل لسه الوقت مناسب لشراء الذهب في مصر؟

طب دلوقتي سعر الذهب واخد في وشه وطالع.. هل برضوا نستثمر فيه ولا لأ.. وهل دلوقتي وقت مناسب لشراء الذهب وتخزينه بغرض الاستثمار في المستقبل.. واية رأي المتخصصين وتجار الدهب في الموضوع دا.. يلا بينا نعرف.

سعر الذهب دلوقتي لأشهر وأكثر جرام بيتم تداوله وهو 21 وصل عند 2725 .. ويمكن اتغير واحنا بنتكلم دلوقتي.. وطبعًا دا سعر عالي على كتير من الناس.. والسؤال هنا.. هل نفضل نشتري دهب ولا لأ؟؟

علشان نحسم الموضوع دا.. مراسلينا خدو بعضهم وراحوا سألوا تجار الدهب.. واللي أكدوا أن الوقت الحالي مناسب برضوا لشراء الذهب.. سواء بغرض الزينة أو للاستثمار.. ودا بالرغم من تسجيله لأرقام قياسية زي ما قولنا.

رأي التجار والمتخصصين في الموضوع دا.. هو أن الذهب بالرغم من ارتفاع سعره في الوقت الحالي لكنه برضوا هو مخزن قيمة بمعنى أنه مستحيل يخسر.

إحنا قولنا إن رأي التجار أكيد يعني هايحفز الناس على شراء الذهب.. ودا طبيعي علشان هما هايستفيدوا من أي حالة رواج للبيع.. وعلشان كدا طالعنا تصريحات لمسئولين بشعبة الذهب بالغرفة التجارية.. زي نادي نجيب سكرتير عام شعبة الذهب السابق.. واللي أكد أن  أسعار الذهب شهدت زيادات متتالية في الفترة الأخيرة ونتيجة للأحداث العالمية فهي هاتكمل في اتجاه الصعود.. وأن لسه الوقت الحالي مناسب لشراء الذهب لأنه السند الحقيقي في أوقات الأزمات.

طيب أكيد حضرتك هاتقول .. واية السبب في ارتفاع أسعار الذهب بوتيرة عالية اوي الفترة اللي فاتت كدا؟؟

والإجابة هو أن سعر الذهب شهد ارتفاعات متتالية في السوق المحلي نتيجة الارتفاع العالمي، وارتفاع سعر الدولار مقابل الجنيه في السوق الموازي في ظل حالة التخبط اللي شهدها السوق المحلي.

والمتخصصين شايفين أن استمرار ارتفاع أسعار الذهب مرهون باستمرار زيادته عالميا، وزيادة الطلب عليه في السوق المحلي.

لكن يبقى الذهب هو أفضل وسيلة تحوط آمنة واستثماره مهم على المدى البعيد