سوق الذهب على صفيح ساخن.. الأسعار رايحة على فين؟؟ والحكومة ناوية على اية؟؟
قولتلكم ماسمعتوش كلامي.. قولتلكم مرة واتنين وتلاتة اشترو دهب الفترة دي.. علشان سعره هايزيد وبرضوا ماسمعتوش كلامي.. طيب ادخل سيادتك على أي موقع دلوقتي وشوف سعر جرام الذهب وصل كام كدا
طيب ماتدخلش على المواقع هانقولك إحنا.. بص يا فندم وفقًا لآخر تحديث من قبل تسجيل الفيديو دا كانت أسعار الذهب كالتالي
عنك سعر الذهب عيار 24.. وصل لـ 3000 جنيه، ودا العيار الأكثر انتشارًا في دول الخليج.
وعندك سعر الذهب عيار 21.. بلغ 2625 جنيه، ودا العيار الأكثر انتشارًا في مصر.
وعندك سعر الذهب عيار 18 وصل لـ 2250 جنيها.. بينما سعر الذهب عيار 14 بلغ 1755 جنيه.. بينما سعر جنيه الذهب وصل لـ 21000 جنيه وهو وزن 8 جرامات من عيار 21.
طبعًا إحنا بنتكلم عن زيادات كبيرة مقارنة بأول الشهر واللي كان الجرام فيه أقل من دلوقتي بيجي 300 جنيه..
والناس راحت بشكل متسارع لشراء الذهب علشان هو أفضل وسيلة استثمار آمنة في ظل الاضطرابات.. والحقيقة بقى الناس اشترت كمية كبيرة من الذهب علشان عارفة أن قرار تعويم الجنيه قرب.. فـ زبون الذهب قالك.. طيب ما أنا أشتري دهب وأركنه في البيت وبكدا حفظت قيمة الفلوس.. ودا طبعًا رأي سليم لكن ممكن تحفظ الذهب في أماكن مخصصة لكدا ومنها البنوك بدل البيت.
المهم.. التوقعات كلها بتشير إلى إمكانية استمرار أسعار الذهب مش في مصر بس.. لأ دا في العالم كله.
بس مصر بقى.. الحكومة يعني ناوية تعمل حاجة تفرمل من خلالها الارتفاعات الهائلة في أسعار الذهب.
وسمعاك ياللي بتقول ازاي
بص يا فندم.. في كلام ومصدق بنسبة كبيرة.. من شعبة الذهب والمجوهرات بالاتحاد العام للغرف التجارية، واللي ماشي في اتجاه إن في إرادة لمد قرار إعفاء واردات الذهب من الخارج مع العائدين من الخارج.
ولو مش فاكرين.. نفكركم إن مجلس الوزراء كان قرر الأسبوع الماضي، مد العمل بقرار إعفاء الذهب الوارد للمنافذ الجمركية صحبة الركاب القادمين من خارج البلاد من الضريبة الجمركية والرسوم الأخرى فيما عدا 14 % قيمة ضريبة القيمة المضافة على قيمة المصنعية فقط وليس إجمالي وزن الذهب، ودا لمدة 6 أشهر تنتهي في مايو من العام المقبل 2024.
ولو فاكرين القرار دا كان ساهم في استقرار أسعار الذهب بمصر.. ولو تم مد قرار الإعفاء فدا شئ هايل وفي صالح أن الأسعار تظل في المتناول.
ووفقًا لمتخصصين فالقرار دا هايخلق وفرة من الذهب بالسوق المحلي وبالتالي فهو له شق إيجابي في مسألة كبح جماح ارتفاع أسعار الذهب.
وبكرة نشوف مدى تأثير الكلام على أرض الواقع بعيدًا بقى عن التكهنات والتوقعات.
