أكتر ملف شاغل بال السيسي.. مطير النوم من عينيه ومش هيسكت غير لما يحقق اللى عاوزه

 
يا ترى ايه أكتر ملف شاغل بال الرئيس السيسي؟ وايه اللى عاوز يحققه فى الملف ده؟ وهل فعلا يقدر يحقق حلمه اللى ممكن ينقل مصر فى حتة تانية خالص ؟ وايه العقوبات اللى ممكن تقف قدام تحقيق حلم الرئيس السيسي؟ والأهم ايه الأدوات اللى بتملكها مصر وتقدر تخلي السيسي يعمل اللي بيتمناه ويقفل واحد من أكتر الملفات اللى مسببة مشاكل ووجع دماغ لمصر بقالها أكتر من 100 سنة؟ 
 

 
من أول يوم لوصول الرئيس عبدالفتاح السيسي لكرسي الرئاسة وهو مهموم بملف واحد بس ونفسه يغمض عينه ويفتحها يلاقي مصر حسمت الملف ده واتخلصت من أعباؤه للأبد وعشان كده السيسي شغال على الملف ده وبيشرف عليه بنفسه وخلال الكام سنة اللى فاتوا بيخطط ويفكر فى حلول جذرية تحرر مصر من التبعية وتخليه تبقا من ضمن العشرة الكبار فى العالم.
والملف اللى طير النوم من عين الرئيس هو ملف ديون مصر الخارجية واللى وصلت لمستويات محصلتش قبل كده والرئيس بيسعى بكل الطرق ان مصر تتخلص من الديون دي وخصوصا لما تعرف ان فوائد الدين وفقا لآخر موازنة بتبلغ حوالي 1.2 تريليون جنيه وبتمثل أكتر من 37 % من إجمالي المصروفات وكمان أقساط الدين أكتر من تريليون جنيه بنسبة نحو 30 % من إجمالي المصروفات.. ومستحيل بلد عاوزة تنهض وتقوم ممكن تكمل وهي مكبلة بكل الديون دي وبتدفع أكتر من 30% من موازنتها خدمة ديون
نيجي بقا للمهم يا ترى ايه الحاجات اللى الرئيس شغال عليها لتخليص مصر من كابوس الديون المتلتلة دي كلها؟ 
فى الحقيقة الرئيس السيسي شغال على اكتر من ملف لتوفير سيولة دولارية كبيرة تمكن مصر من سداد التزاماتها وفى المستقبل كمان ممكن تعمل وفرة كبيرة وتنهي بشكل كامل على أزمة نقص العملة الأجنبية وتخيل لما تقدر تسدد الديون هتوفر كام مليار دولار كل سنة بترميمهم على الأرض لما بتدفعهم كفوايد للقروض مع ان اصل القرض زي ما هو وساعات كمان بيزيد.
وأول ملف الدولة باشراف مباشر من الرئيس شغالة فيه كويس فى الاتجاه ده ملف دعم السياحة و شهدت السياحة المصرية توافد وزيارات تاريخية في عهد الرئيس عبدالفتاح السيسي على المقاصد السياحية المختلفة خلال النص الأول من 2023 وقفزت مؤشرات النمو السياحي الي أكتر من 7 مليون سائح وده  رقم بيحقق لأول مرة في تاريخ سياحة مصر ومتوقع تحقيق 15 مليار دولار السنة دي عوائد سياحية 
والرقم الكبير فى الزيارات السياحية ده اتحقق بعد عدد كبير من الحملات الترويجية للمقاصد السياحية داخل مصر ومتوقع السنة الجاية مصر تحقق رقم يقترب من ال 20 مليار دولار من السياحة. 
أما تانى ملف ويعتبر الملف الأهم فى توفير سيولة دولارية للبلد فهو ملف دعم الصناعة للوصول الى حلم ال 100 مليار دولار صادرات خلال السنين الجاية ، ومؤخرا شهد الرئيس السيسي افتتاح وتدشين مشروعات مبادرة تطوير الصناعة "ابدأ".
وقال السيسي إن الحكومة المصرية مستعدة للشراكة مع المستثمرين بمشروعات مبادرة "ابدأ" بنسب تتراوح بين 30 إلى 50 % بهدف تشجيع رجال الصناعة وطمأنتهم والوقوف بجانبهم وتحمل جزء من المخاطرة.
وأكد السيسي تدخل الدولة الفوري لحل أي عقبات تواجه المستثمرين ورجال الصناعة حال تعرضهم لأي مشكلة مع بذل كافة الجهود للوصول بعائدات الصادرات المصرية إلى 100 مليار دولار قبل مرور 5 سنوات لتحقيق التنمية بالبلاد.
وبتهدف مبادرة "ابدأ" لإضافة استثمارات بقطاع الصناعة المصرية بما يقارب 200 مليار جنيه، وتوفير حوالي 150 ألف فرصة عمل مباشرة وغير مباشرة خلال السنوات الـ 4 سنين الجاية 
مش بس كده فيه كمان تفكير فى وضع مصر على خريطة الاستثمارات الجنبية المباشرة والدولة شغالة كويس جدا على ملف الطروحات الحكومية واللى من خلاله هيتم بيع حصة الحكومة فى عدد كبير من الشركان سواء لصناديق استثمار أجنبية أو مستثمرين استراتيجيين. .
من الحاجات المهمة اللى السيسي شغال عليها لحل ملف الديون الخارجية زيادة حصيلة تحويلات المصريين بالخارج بعد التراجع الكبير اللى حصل فيها .. ووفقا لآخر احصائيات رسمية تراجعت تحويلات المصريين العاملين في الخارج خلال العام المالي 2022-2023 بنسبة 30.8% على أساس سنوي
وكشف بيانات البنك المركزي المصري بشأن معاملات الاقتصاد مع العالم الخارجي، خلال العام المالي 2022-2023، تراجع تحويلات المصريين العاملين في الخارج خلال العام المالي الماضي، إلى 22.1 مليار دولار، مقابل 31.9 مليار دولار في العام المالي السابق.
والرئيس بتنسيق بين الحكومة والبنك المركزي شغالين حاليا على حلول وحوافز جديدة لعودة تحويلات المصريين الى سابق عهدها وكمان مضاعفتها خلال السنين الجاية وده هيوفر مورد دولاري مهم جدا للدولة.
وخد بالك ان خطة تعظيم المصادر الدولارية بتشمل كمان تعظيم عوائد قناة السويس ، وتجاوزت إيرادات قناة السويس السنة دي  أكتر من 10 مليار دوولار بزيادة نحو 30 % عن السنة اللى فاتت. 
وفيه مشروعات وخطط لتطوير المنطقة الاقتصادية للقناة هتدخل لمصر سنويا مليارات الدولارات وهتساهم فى سد الفجوة التمويلية الكبيرة فى الموازنة العامة.