20 مليار دولار وتصفير الديون.. بايدن يحاصر السيسي لبيع سيناء وزعيم مصر يرد بـ عرض مرعب
هو ايه بيحصل حولينا ويعني ايه دولة تتعرض لابتزاز اعلامي وسياسي عشان تأجر جزء من أرضها لشعب تاني عشان عنده مشاكل وعاوز يحرر أرضه وايه المنطق الغريب .. وياتري ايه اللي بيتقال في إعلام الغرب وحكاية ال20 مليار دولار وتصفير الديون وتوصية لصندوق النقد ومؤسسات التمويل بدعم مصر
حد فينا كان يتخيل إن أمريكا وإسرائيل ودول غربية هيجي يوم عليها تعرض على مصر مزاد مليارات الدولارات وامتيازات تانية عشان تسيب حتة من سيناء والعرض يبقي علانية وعلى عينك يا تاجر والقضية كمان تبقى نقاش في برامج التوك شو والبرامج الحوارية والفضائيات والموضوع يبقي حديث العالم.. للاسف دا اللي بيحصل دلوقتي وكل المؤامرات على سيناء بقت خطيرة ومحل نقاش علني كمان إنها تتحول لوطن بديل للفلسطنيين في قطاع غزة وممكن في المستقبل ينضم ليهم فلسطيني الضفة الغربية وتنتهي القضية الفلسطينية بكمبوند كبير في سيناء.
والغريب في قصة الوطن البديل دا إن الغرب مصدق نفسه إن دا ممكن يحصل ومصر تتنازل أو تستضيف مليون أو 2 مليون فلسطيني أجبروا على مغادرة وطنهم اللي بيدافعه عنه من سنين عشان اسرائيل تعيش في أمان وتضمن إن حلم يكون للفلسطينيين دولة انتهي للأبد، والأغرب إن التسريبات واللي بتتعرض على برامج التوك شو والبرامج السياسية في أوروبا والولايات المتحدة وعلى لسان مسؤولين كبار كمان بتتكلم على عروض بالمليارات تلقتها مصر عشان تتنازل عن أرضها وكمان الموضوع بقي فيه تحليل سياسي يبرر انتقال الفلسطينيين للعيش في سيناء وزيد من الشعر بيت دول كمان بينتقدوا موقف الرئيس السيسي لما رقص رفض قاطع وشايفين إنه بكده بيرمي الفلسطينيين في النار عشان رافض ينقذهم من الغارات الإسرائيلية وكأن مصر هي اللي بتضربهم.
ووصل الأمر إن مسؤولين غربيين وفي اسرائيل يشرحوا خطة نقل أو تهجير الفلسطينيين لسيناء أو لأي حتة في مصر وقالوا إن عدد الشقق الفاضية في 6 أكتوبر والعاشر من رمضان هيستوعب النازحين الفلسطينيين وهيكون عددهم مليون أو أقل.. والأغرب أنهم شايفين إن العدد دا مش مشكلة ومصر عندها 9 مليون لاجئ عربي مش هيحصل حاجه لو بقي 10 مليون وكمان مصر بتستقبل كل سنة 2 مليون طفل جديد يعني معندهاش مشكلة تستقبل المليون الزيادة.. وكمان الموضوع مش هيبقي صعب على مصر لأنه مع النزوح أو التهجير هيكون فيه عروض سخية لمصر واتقالت في برامج ووسائل إعلام كبيرة وعالمية زي دفع الولايات المتحدة 20 مليار دولار لمصر وكمان تصفير كل ديونها الخارجية يعني حوالي 165 مليار دولار وباقة العرض فيها كمان دعم من صندوق النقد الدولي ومؤسسات التمويل والتصنيف الدولي للاقتصاد المصري ودا غير الدعم العربي اللي هيجي من الخليج وأوروبا للاستثمار في مصر.. يعني زي ما نقول كده بايدن هيخلصك من كل مشاكلك مرة واحدة مقابل توافق على استضافة الفلسطينيين وإتمام مهمة ضم غزة لإسرائيل.
طبعا رد مصر كان واضح وصريح ولا يقبل الغموض من أول دقيقة وهي إن سيناء واي شبر من أرض مصرية مش عرضة للمساومة ولا يقبل النقاش وغير مطروح في الأساس يعني مصر مش بتقعد تتكلم في الموضوع دا ولا تسمح لحد يتكلم فيه وكان امبارح فيه رد مختلف من السيسي على موضوع الوطن البديل دا وكل العالم شافه وسط جيشه في الفرقة الرابعة مدرعة وعرض خاص من الجيش التالت بالسويس. وده كان الرد العملي يعني اي محاولة مصر جاهزة للتعامل الفوري.. وبخصوص الفلسطينيين مصر وطن لكل العرب وفيه فلسطينيين كتير ليهم سنين في مصر لكن الوضع والهدف هنا بيختلف تماما لأن اللي هيحصل جريمة في حق شعب و طن وشهداء راحوا في سبيله وحلم مشروع لإقامة دولة مستقلة على أرضهم ومصر اللي دفعت آلاف الشهداء على مر التاريخ عشان القضية الفلسطينية مش هتكون هي اللي هتصفيها.
