فلاحة مصرية تلقن الإخوان والخونة درس قاسي في السياسة والوطنية.. معاك يا سيسي حتى لو العيشة صعبة ومفيش حاجة تعوض البلد
مفيش بلد في التاريخ ولا العالم زي مصر في حاجات كتير أولها الترابط بين ناسها واحترام الكبير والجدعنة وقت الشدة والرحمة وقت القدرة شعب غريب ليه كتالوج خاص بيه.. مهما كانت ظروفه صعبة لكن بيوفر اللقمة عشان يستر اللي بيستجير بيه.. مايعرفش الغدر ولا بيساوم على حق واللي يجي على أرضه وعرضه يبقي انتحر .. شعب كده بسيط وراقي لكن شرس وعنيد ومايسبش في الساحة حقه..
مفيش شعب زي الشعب المصري في علاقته مع جيشه ورئيسه .. ناس لما بتحس بالخطر بتعمل حواليهم طوق يحميهم.
في مقطع فيديو ثواني معدودة لخص علاقة الشعب برئيسه وجيشه لما اتنين ستات مصرياتة في قرية ريفية وسط الفلاحين بيتكلموا على اللي بيحصل في غزة من جرائم وقالت واحدة فيهم بس الريس يفتح الطريق ويقول يالا احنا نروح ناكلهم بسناني ونحمي الأطفال واحنا مع رئيسنا حتى لو المعيشة غالية مفيش حاجه تساوي النومة في أمان في بلدنا.. دا اللي قالوه ستات من الريف البسيط واللي جسدوا كل معاني الوطنية المصرية والسياسة وردوا على كل الفتن اللي بتحاول تكره الناس في رئيسها وجيشها من غير ما حد يقولهم قولوا كده لكن عبروا على اللي جواهم بفطرتهم الريفية الأصيلة.
ستات مصر كعب رجليهم برجالة قلعت برقع الحيا وبيهاجموا وطنهم ليل نهار في فضائيات غريبة وعاوزين يشوفوه خراب.. جماعة وتنظيم عمره ماكان مصري ولا بينتمي للشعب دا وكل هدفه يحرض ويكذب ويتآمر عشان البلد دي ماتقومش ويردد زي البغبغان ليل نهار إن مصر هتفلس والحكومة بتهرب والاقتصاد ضايع..لكن فشلوا وربنا رد كيدهم في نحورهم، والشعب عرف مين معاه ومين بيحاربه وبيحارب رئيسه وجيشه وكان رد المصريين قوي وشجاع ومتوقع ضد حملات التشويه والخسة والنذالة.
الشعب في الشدة نسي الدولار والغلاء والظروف الصعبة ووقف مع رئيسه ومصدقش أي حاجة من الأخبار المضللة وفتن الإخوان وأهل الشر وحلف الشيطان وعرفوا إن الحملات دي متعمدة ومقصود بيها الضغط على الدولة والرئيس عشان الناس تتفض من حوليه لكن العكس هو اللي حصل والمصريين علموهم درس العمر وإن البلد دي اهلها واهلها بس في رباط ليوم الدين ومحفوظة في كتاب ربنا وقال عزوجل ادخلوا مصر إن شاء الله آمنين. وقيل عنها في الحديث مصر كنانة الله في أرضه من أرادها بسوء قسمه الله.
لو على الشدة وجدعنة المصريين تقدر ترجع للتاريخ وتعرف في عز بلدهم ماكانت طالعة من هزيمة وتشوف طول ست سنين أدوا قوتهم وعيالهم للجيش ومقالوش العيشة صعبة وكان كل همهم الأرض ترجع.. وزمان كانت الست تقول لولدها اللي في الجيش متجيش إجازة غير لما تحارب وتحرر الأرض ولا همهم اسعار والسلع مش موجوده ولما اختفى السكر المصريين حطوا في الشاي حلاوة وشربوه بس كرامتهم ترجع ورجعت ودلوقتي قالوها نأكلها بدقة وعيش حاف مع السيسي.
