خفافيش الظلام.. تحركات مريبة في السوق السوداء للدولار
يا ترى ايه اللى بيحصل فى السوق السودا للدولار فى مصر؟ وليه سعر العملة الأمريكية بيرتفع فى الساعات الأخيرة؟ ومين خفافيش الظلام اللى مستغلين انشغال الدولة بدعم قضية عادلةة زي قضية غزة وبيلعبوا فى سوق صرف العملات الأجنبية؟ وايه تأثير استمرار العدوان الاسرائيلي على مستقبل الجنيه؟ وهل ممكن تحصل قرارات مفاجئة لضبط سوق الصرف ولا مفيش جديد غير بعد انتخابات الرئاسة؟
فى الكام ساعة الأخيرة فيه تحركات مريبة جدا بتحصل فى السوق الموازية للعملة وبسبب التحركات دي ارتفع سعر الدولار أمام الجنيه المصري إلى مستويات قياسية جديدة محصلتش قبل كده .. واستغل تجار العملة والمضاربين انشغال كل أجهزة الدولة المصرية بدعم القضية الفلسطينية وواصلوا تلاعبهم لرفع سعر العملة الأمريكية وتحقيق مكاسب كبيرة.. واستغلوا كمان بعض الاجراءات اللى خدتها البنوك بخصوص حدود السحب من البطاقات فى الخارج وشهد سعر الدولار بالسوق السوداء ارتفاعات ملحوظة بالتزامن مع إجراءات جديدة من البنك المركزي المصري بشأن استخدام بطاقات الخصم والائتمان في المعاملات الدولارية.
وفى نص الاسبوع اللى فات أصدر البنك المركزي تعليمات جديدة للبنوك العاملة بوضع حد أقصى شهري لاستخدام البطاقات الائتمانية وفقا لما يقرره كل بنك
البنك المركزي أصد التعليمات دي بناءً على الملاحظات الأخيرة حوالين إساءة استخدام بعض المضاربين للبطاقات بطرق غير مشروعة والقيام بسحوبات نقدية من الخارج دون السفر فعليا وكان لازم يكون فيه تحرك للحفاظ على السيولة الدولارية وكمان خنق السوق السودا اللى بيعاد من خلالها بيع الدولارات اللى بيتم سحبها من بره مصر.
اللى بيحصل فى السوق السودا للدولار تزامن مع استطلاع لوكالة رويترز عن مستقبل الجنيه خلال الفترة الجاية ووفقا لتوقعات اللى شاركوا فى الاستطلاع فمن المتوقع تراجع قيمة الجنيه امام الدولار وان سعر العملة الأمريكية فى البنوك الرسمية هيوصل الى 35 جنيه بحلول نهاية ديسمبر.. ورجح المشاركين فى الاستطلاع وصول الدولار إلى 37.06 جنيه بنهاية 2024، وإلى 39.02 بنهاية 2025.
وفى ال 48 ساعة اللى فاتت خفضت وكالة التصنيف العالمية، ستاندرد آند بورز التصنيف السيادي طويل الأجل لمصر إلى "-B" من "B"، مشيرة إلى تزايد ضغوط التمويل على البلاد.
وبتواجه مصر تحديات اقتصادية أدت إلى سلسلة من تخفيضات قيمة العملة وتضخم قياسي مع ارتفاع تكاليف الواردات الأساسية بعد الحرب الروسية الأوكرانية.
وقالت ستاندرد آند بورز إن التخفيض بيعكس التأخير المتكرر في تنفيذ الإصلاحات النقدية والهيكلية وسط توقعات بان الضغوط التضخمية هتفضل مرتفعة خلال الشهور الجاية
