اللعب بقي على المكشوف.. السيسي يفضح مخطط التهجير وإسرائيل مرعوبة من تصرف مصري وشيك
لو عاوزين تهجروا الفلسطينيين لمكان أوسع ما عندكم صحراء النقب واسراىيل عاوزة تنقل الصرع من غزة لسيناء ولو حصل مقاومة من الفلسطينيين اسرائيل هتضرب في سيناء للدفاع عن نفسها.. دا كانت الحقيقة اللي كشفها الرىيس السيسي النهاردة للعالم بخصوص مخطط تهجير الفلسطينيين قسريا لسيناء واللي مصر انتبهت ليه بدري اوووي وكان ردها حاسم.. سيناء خط أحمر واللي عاوز يجرب يورينا هيعمل ايه.. ازاي اسرائيل فكرت في خطة سيناء وسط ذروة الصراع وهل فكرة نقل الفلسطينيين كانت جاهزة ومستنين ساعة الصفر وايه الحاجة اللي اسرائيل مرعوبة منها.
النهاردة الرئيس السيسي طلع للعالم كله في مؤتمر صحفي مشترك مع المستشار الألماني أولف شولتس بمقر رئاسة الجمهورية واللي بيزور مصر عشان يشوف حل للازمة والتصعيد في المنطقة وكشف الرئيس السيسي المستور واللي كان بيترتب في السر لمصر وقال إن تهجير الفلسطينيين لسيناء يعني نقل للصراع وإن إسرائيل بعدها هتستهدف الفلسطينيين في غزة لو وقع اي عمل للمقاومة من القطاع يعني العمليات هتنطلق من غزة والرد هيكون على سيناء وطبعا ومستحيل مصر هتقبل اي اعتداء على أراضيها والرد هيكون فوري وقاسي وهنا بقي هيبقي الصراع مصري اسرائيلي والعالم طبعا مش هيستحمل اللي هيحصل وقتها.
الرئيس السيسي ضرب الإسرائيليين تحت الحزام لما قالهم لو عاوزين صحرا آمنة لنقل الفلسطينيين بعيد عن حماس عندكم صحراء النقب تقدروا تودوهم هناك وطبعا الرىيس السيسي عارف كويس جدا اللي بيحصل عشان كده اللعب كان على المكشوف في المؤتمر الصحفي وكشف كل الاوراق وقالهم لو عاوزين المصريين ينزلوا في الشوارع هينزلوا بالملايين وان مصر حدودها هي حدود نار واللي يحاول يتعداها هيتحرق في الجحيم وفلسطين هتفضل قضية العرب وانسوا التهجير وتصفية القضية ومصر مش هتسيب اخواتها.
امبارح كان الرد المصري عنيف على استهداف مستشفى في غزة وسقوط عدد كبير من الضحايا ومصر لغت قمة بين بايدن والسيسي في رسالة محصلتش قبل كده وبتعبر عن حجم الغضب المصري للي بيحصل في غزة وأنه لازم يوقف فورا واللي عمل كده يتحاسب وبقت مصر بتتكلم كالعادة بصوت عالي ويغضب ودا الخطر الحقيقي اللي على اسرائيل وحاولت واشنطن تحتويه بالاتصال بالسيسي اكتر من مرة ومقابلة وزير الخارجية الأمريكي وزعماء أوروبيين سبق وايدوا عدوان اسرائيل ودا. لأنهم عارفين لو القاهرة غضبت وغضبها خرج عن السيطرة المعادلة كلها هتتغير .
سر غضب السيسي من اللي بيحصل إنه كرجل مخابرات وخبرته بيشم ريحة المؤامرات عارف إن مخطط سيناء مش وليد اللحظة وإنه تم إعداده في الغرف المغلقة والسرية وعشان كده كان لازم الرد يبقى حاسم وسريع وقاس.
فيه طبعا جزئية تانية مهمة جدا محدش واخد باله منها في مأساة غزة ومؤامرة التهجير القسري في سيناء وهي إن إسرائيل قلقانة جدا من التنمية الشاملة اللي بتحصل في شبه الجزيرة واللي هتعمرها مصر بملايين البشر وبكده هيبقي المصريين على باب اسرائيل والأراضي المحتلة وطول عمر سيناء حاجز واسع وكبير وفاضي بين المصريين والإسرائيليين لكن لما يبقى المصريين جمبهم على الحدود فهنا اسرائيل لازم تخاف وتحاول تمنع باي شكل التوسع في تنميه سيناء بشكل شامل أو استغلال ثرواتها لأن دا معناه زيادة الكتلة السكانية في الشبه الجزيرة وإسرائيل شايفة دا انتحار بالنسبة لها لأن أي اعتداء وحشي بعد كده على الفلسطينيين هتكون عواقبه وخيمة.
