2 مليار دولار زيادة وفتح هويس الاستثمارات الخليجية.. هدية صندوق النقد لمصر
على مدار شهور طويلة خضع ملف قرض صندوق النقد الدولي لمصر بقيمة 3 مليار دولار لكلام كتير بداية من صرف أول شريحة في أول السنة وبعدها تعثر وتجميد وبعدها مفاوضات وشد وجذب وأخيرا انفراجة وهدية وتحول غريب في ملف القرض.. ايه اللي حصل ولغز الرضا المفاجئ للصندوق على مصر وايه هو الاتفاق الجديد وسر الاستثمارات الخليجية اللي جاية في الطريق.
من يومين طلعنا هنا في بانكير وقلنا تفاصيل عن اتفاق جديد مع صندوق النقد الدولي وإن فيه مفاوضات ناجحة بين الحكومة المصرية والصندوق رغم الإشاعات اللي طلعت وروجها الإعلام المضاد ومواقع التواصل الإخوانية واللي كارهة البلد أن المفاوضات فشلت ومفيش قرض والاقتصاد هينهار بعد تقارير الصندوق ووكالات التصنيف والبنوك الاستثمارية السلبية.. طيب ايه اللي حصل وصدم إعلام الاخوان وخلاهم في حيرة من التسريبات اللي طلعت من الصندوق في الساعات الأخيرة.
اللي حصل حضراتكم إن مصر تاني اهم عميل في العالم عند الصندوق بعد الأرجنتين ومش ممكن تضحي بيها مهما كانت الأسباب وشفنا كلنا إزاي الحكومة المصرية فرضت قرارها برفض التعويم الكامل الجنيه في ظل ظروف اقتصادية غير مواتية وهتسبب صعوبة للمواطنين وقالها الرئيس السيسي علنا مفيش تعويم دلوقتي وبعدها الصندوق حاول يساوم ويلعب على الوقت ويطلع تحذيرات ويضغط لغاية مالقيش فايدة والحكومة مصرة على موقفها فقرر زي ما قال بانكير إنه يدخل في إتفاق جديد مش بس على صرف باقي قرض ال3 مليار دولار لكن المفاجأة إن الصندوق قرر يرفع قيمة القرض ل5 مليار دولار مرة واحدة ودا طبعا مكنش هيحصل لو اقتصاد مصر كان ضعيف أو بينهار زي ما بيقول إعلام الاخوان لأن الصندوق مش بيضيع ملياراته في دولة اقتصادها بينهار.
موقف الصندوق الجديد والتحول الكلي في موقفه كان ليه أسباب كتير جدا أولها إن الحكومة المصرية قدرت تتخلص من حبل القرض اللي كان ملفوف على رقبتها وقدرت توفر مليارات الدولارات من أماكن وقطاعات تانية. وبقي عندها سيولة كافية حتي لو في الحد الأدنى للاستيراد وتلبية مطالب الشركات وسداد الديون ومصر مش عاوزة اكتر من كده دلوقتي القرض مبقاش مشكلة أو مجاش خالص لانه مبقاش ضرورة ملحة ودا اللي خلى الحكومة تتعامل مع الصندوق ببرود أعصاب..
طيب طالما الحكومة قدرت توفر سيولة دولارية كبيرة ليه مصرة على القرض.. شوف حضرتك زي ماقلنا قبل كده في بانكير إن القرض في حد ذاته مبقاش مهم خالص والحكومة وفرت 6 مليار دولار في شهر وحوالي 20 مليار دولار في 7 شهور من فاتورة الاستيراد بس وتوطين الصناعة البديلة لكن الحكومة عينها على الاستثمارات الضخمة اللي هتيجي مصر بعد الاتفاق مع الصندوق زي الاستثمارات الخليجية واللي مصادر في الصندوق قالت إن هيحصل هجوم استثماري من الخليج العربي على مصر بعد توقيع اتفاق الصندوق الجديد ابو 5 مليار دولار ودا غير استثمارات تانية هتيجي بعد الإعلان عن القرض الجديد.. يعني الاتفاق تذكرة دخول رسمية للاستثمار بضمان الصندوق نفسه ودا اللي مخلي الحكومة مصرة على توقيع الاتفاق بس المرة دي من وسع وبشرطها هي.
طيب طالما فيه اتفاق جديد ومراجعة قريبة ايه مصير التعويم.. شوف ياسيدنا التعويم في حد ذاته مش مشكلة لأن كل عملات العالم بتداول حسب العرض والطلب اهم حاجة تقوي العملة بتاعتك بالتصنيع والاستثمار وتقليل الاستيراد وتقليل الاعتماد على الدولار وبعدها الجنيه هياخد حجمه الطبيعي ويصلي طوله وطول ما الحكومة حلت مشكلة التضخم وارتفاع الأسعار مفيش خوف من التعويم والأهم إن يكون عندك موارد دولار ثابتة وبكمية معقولة عشان تلبي اي احتياجات أو تدخل في سوق الصرف وتجبر الدولار على إنه ينزل وسعره يبقى في المعقول.
