ساعات الحسم.. إيه اللى بيحصل في الكواليس بين مصر وصندوق النقد؟

في الأيام الأخيرة حصلت تطورات مهمة في ملف المفاوضات بين مصر ومسئولى صندوق النقد الدولي.. وبدأن نسمع كلام وتصريحات من الطرفين عن اقتراب موعد المراجعة الأولى لصندوق النقد.. فيا ترى ايه اللى بيحصل في الكواليس بين مصر والصندوق؟ وايه الاتفاق اللى تم الوصول ليه ؟ وايه حقيقة طلب مصر رفع القرض من 3 الى 5 مليار دولار؟ وايه التطمينات اللى مصر قدمتها للصندوق؟ وهل فعلا فيه تخفيض لقيمة الجنيه بعد نهاية انتخابات الرئاسة ؟ وهل تطورات الأوضاع في فلسطين ممكن يكون ليها أي تأثير على الاتفاق بين مصر وصندوق النقد خلال الفترة الجاية؟
 

 
من كام يوم الدكتور محمد معيط وزير المالية قال انه بيتوقع الإعلان عن مراجعة صندوق النقد الدولي لمصر قبل نهاية 2023 .. وأكد ان الحكومة المصرية مستمرة في مسيرة الإصلاحات الهيكلية من خلال تبنى سياسات متوازنة بتُراعي البعد الاجتماعي، وبترتكز على الالتزام بالانضباط المالى والتعامل الإيجابي مع الآثار السلبية اللى فرتضها الأزمات العالمية المركبة وما نتج عنها من ضغوط تضخمية غير مسبوقة
وزير المالية شدد على حرص مصر على التنسيق المستمر مع صندوق النقد الدولي لتعظيم سبل التعاون المشترك بشكل يساعد على تحقيق المستهدفات التنموية والمالية والاقتصادية.. وقال ان الحكومة كمان حريصة على تعميق مشاركة القطاع الخاص في النشاط الاقتصادي بحزمة من الحوافز والإجراءات المتكاملة ومنها تأسيس بنية تحتية قوية ومرنة وإلغاء المعاملة التفضيلية للجهات والشركات المملوكة للدولة ودخه تحقيقا لمبدأ تكافؤ الفرص، وتعظيم القدرة التنافسية بين القطاعين العام والخاص، فضلًا على إطلاق «وثيقة سياسة ملكية الدولة» اللى بتستهدف زيادة مساهمات القطاع الخاص في الناتج المحلى الإجمالي وبرنامج «الطروحات الحكومية»، اللي طرحت من خلاله الحكومة 35 شركة مملوكة للدولة في 19 قطاع اقتصادي من أجل المزيد من الفرص المتاحة للاستثمارات الخاصة.
معيط كشف عن تحديد الشركات المؤهلة اللى هيتم طرحها خلال الفترة من أكتوبر 2023 إلى يونيه 2024 بقيمة تقديرية تصل إلى 4 مليارات دولار.
بعد تصريحات وزير المالية بايام قليلة طلع تقرير من صندوق النقد أكد فيه مسئولي الصندوق وجود تعاون وثيق مع مصر، لتحديد مواعيد مناقشة المراجعة لبرنامج التمويل اللى قيمته وصلت الى 3 مليار دولار .. وأشاد التقرير بالتقدم والنجاح اللى أحرزته مصر في الإصلاحات وكمان توقع استمرار معدلات التضخم المرتفعة في مصر خلال 2023 و2024 وقال ان مرونة سعر صرف الجنيه أساسية لحماية الاقتصاد.
التقارب اللى حصل بين مصر والتصريحات المطمئنة من الطرفين، خلت ناس تدور ورا اللى بيحصل في الكواليس وايه الاتفاقات والتربيطات اللى بتتعمل ونقلت وكالة بلومبرج عن أشخاص مطلعين ما قالتش لا اسمهم ولا مناصبهم أن مصر بتجري محادثات مع صندوق النقد الدولي بشأن تعزيز برنامج التمويل بتاعها الى أكتر من 5 مليار دولار. 
والمصدرين اللى بلومبرج نقلت عنهم تفاصيل المفاوضات مع الصندوق أكدوا ان مصر واثقة من قدرتها على التغلب على العقبات اللي بتواجه حزمتها الحالية من خلال معالجة المخاوف بما فيها سياسة العملة وسوق الصرف. 
المصادر اللى اتكلمت مع الوكالة الدولة قالت إن أي إعلان عن زيادة محتملة عن  مبلغ الـ 3 مليار دولار اللي تم الاتفاق عليه السنة اللى فاتت مش هتحصل الا بعد ما مصر تكمل المراجعة الأولى للقرض واللى كان المفروض تتم في شهر مارس اللى فات لكن تم تأجيلها لشهر سبتمبر وبرضوا ما تمتش بسبب خلافات كانت بين الحكومة المصرية ومسئولى الصندوق حوالين تخفيض قيمة الجنيه مرة رابعة ومصر كانت رافضة اى تخفيض في قيمة عملتها وشايفة أصلا ان الجنيه مقيم بأقل من سعره في حين ان مسئولي الصندوق شاسفين ان فيه خلل في سوق الصرف بدليل الفرق الشاسع بين السعر الرشمي للدور وسعره في السوق السودا للعملة.

ووفقا لبلومبرج من المحتمل زيارة بعثة صندوق النقد الدولي لمصر لبدء المراجعتين الأولى والتانية في نهاية شهر أكتوبر وخلال الزيارة دي هيتناقش الجانبين الخيارات المطروحة للخروج من أزمة قص العملة وضبط سوق الصرف والقضاء على السوق السودا للدولار.
وحسب التسريبات اللى تمت فمفيش اى تخفيض في قيمة الجنيه قبل انتخابات الرئاسة اللى مفروض هتتم في ديسمبر يعنى لو فيه تعويم هيكون في الربع الأول من 2024 ومش قبل كده باى حال من الأحوال وده فيه اتفاق عليه بين الحكومة ومسئولى الصندوق من حيث المبدأ وهيتم وضع التصور النهائي للموضوع بعد وصول بعثة الصندوق للقاهرة خلال الأيام الجاية.
طب هل اللى بيحصل في فلسطين واستمرار العمليات الوجشية ضد المدنيين العزل من قبل جيش الاحتلال الإسرائيلي ممكن يكون ليها تأثير على الاتفاقات اللى بتحصل؟ 
اللى بيحصل في فلسطين هيكون ليه تأثير كبير على الأسواق وتحديدا الدهب وكلنا شفنا ارتفاع اللى حصل في سعر الدهب من بعد الاعتداءات الإسرائيلية على اهل غزة لأن وقت الاضطرابات الناس بتروح للدهب باعتباره استثمار آمن .. لكن اللى بيحصل مش هيكون ليه تاثير على اتفاق مصر مع صندوق النقد