لو معاك فلوس وخايف تضيع أو تقل مع التعويم والزمن.. هنقولك تعمل ثروة إزاي تأمنك

 
اوعي تفتكر إن مدخراتك عامل أمان كفاية من غدر الايام أو ممكن تحميك ماليا وتنقذك من اي أزمات اقتصادية عالمية أو محلية ودا لأنه مهما كانت قيمة مدخراتك كبيرة فهي بتنقص لو حصل تعويم أو تحرير سعر الجنيه أو سعره نزل قدام الدولار ومدخراتك بتقل بنفس النسبة.. يعني لو الجنيه فقد 25% من قيمته يبقى انت كده فقدت ربع مدخراتك بالظبط.. تعمل ايه عشان تكبر فلوسك مهما كانت قليلة وايه تفضل حاجة مضمونة ممكن تستثمر فيها فلوسك.. في بانكير هنقولك تعمل ايه

عادة في الأزمات الكبيرة للعملة او الاسهم في العالم أو أي تأثر لحركة التجارة الدولية والطاقة اسعار الدولار بترفع في العادة لانه العملة الدولية المعتمدة بين الدولة وبيأثر بالسلب على أسعار العملات المحلية للدول زي ما حصل كده  بعد أزمة كورونا وبعد أزمة روسيا وأوكرانيا والنتيجة الدولار سعره رفع وأسعار السلع زادت وكل حاجة بقت غالية وفي المقابل اسعار العملات زي الجنيه انخفضت قدامه والجنيه مثلا فقد  نص قيمته قدام الدولار وبالتالي قوته الشرائية نزلت النص ومعاه نزلت قيمة المدخرات في البنوك أو إللي تحت البلاطة وعشان كده مفيش حل قدامك غير انك تستمثر مدخراتك أو تحويشة العمر في حاجة تضمن بيها تكبر فلوسك وتعوض اللي راح منها.

في الطبيعي فيه اكتر من مشروع أو طريقة تستثمر بيها الفلوس الزيادة اللي معاك زي الدهب والعقارات والأراضي لأن الحاجات دي بتحتفظ بقيمة الفلوس وتزودها بالظبط كأنك محصنها لو حصل اي هبوط في قيمة الجنيه وال3 حاجات دي بيقولوا عليه استثمار طويل الأجل يعني من 3الى 10 سنين مثلا  عشان تعرف تكسب كويس لان الدهب مهما قعد سعره بيزيد وكمان العقارات والأراضي وبكده تحفظ فلوسك وتنميتها.

طيب دا لو معاك فلوس وسائلها وعاوز تحافظ عليها..طيب لو معاك فلوس وعاوز تشغلها وتاخد منها ربح وفي نفس الوقت تكبر أصل المبلغ تعمل ايه.. دا النوع الرابع لتشغيل واستثمار المدخرات والنوع دا هو اللي بيفضله خبراء الاقتصاد في العالم وفي مصر كمان وهي انك تحط فلوسك في مشروع مربح وفي نفس الوقت أصوله بتزيد زي مثلا تحطها في مشروع تجاري أو تربية دواجن ومواشي أو مثلا مشروع محل ومعمل ألبان أو تفتح كافيه ومطعم مثلا او تجارة تجزئة أو جملة واي مشروع بالشكل دا هتضمن أن فلوسك محفوظة وفي نفس الوقت هتاخد مكسب شهري كويس بالإضافة انك بتعمل مدخرات تانية من عوايد المشروع أو ممكن تعمل من الأرباح مشروع تاني او تتوسع في مشروعك الاصلي وبدل لمحل يبقي معاك اتنين وتلاتة وممكن تضيف وتوسع النشاط بعدين بحسب تضاعف القيمة المضافة من الأرباح.

ليه بننصحك بده دلوقتي وأنك لازم تدخل في أي نشاط ويبقالك مشروعك الخاص.. عشان ببساطة محدش عارف بكره فيه إيه وانت عندك أسرة وولاد والعملة قيمتها بتتغير فلازم يكون عند أمان مالي عشان تضمن بكرة يعدي من غير أزمات معاك والحقيقة موضوع الاستثمار دا بقى فرض على كل واحد فينا ومحدش يكتفي بالراتب أو الوظيفة ويقول أنا في امان لازم يكون ليك دخل تاني وتالت ومعروف عن المصريين حبهم للشغل وبيشيلو المسؤولية وهم ولادهم وعشان كده بنقولك على اقرب طريق ..لو معاك فلوس فلوس ومش عارف تشغلها في ايه او ملكش خلفية في التجارة أو التسويق أو إدارة اي مشروع تقدر تشارك اي حد يكون عنده خبرة انت بفلوسك وهو بخبرته ونسبة من الأرباح.. الخوف مش هيخليك تتحرك من مكانك لازم تغامر مغامرة مضمونة عشان تأمن نفسك وعيلتك من بكرة.

وفي مصر مليانة نماذج لناس بدأت من الصفر في أي مشروع وبقت مليارديرات وملونيرات وكلنا فاكرين الحاج محمود العربي الله يرحمه واللي بدأ إمبراطوريته بقروش والريان اللي بدأ ب50 قرش والفايد وناس كتير غيرهم عملوا ثروات كبيرة وبقوا رجال أعمال كبار وعندهم الاف العمال وممتلكات ملهاش اخر