لية الجنيه المصري مزعل العالم ؟

الجنيه تقريبا مزعل العالم كله ومفيش سيرة غير هيعوم ويغرق امتي، وكأنه مفيش عملات بتنزل وتطلع غيره في العالم.. وشفنا الصندوق والبنك الدولي وبنوك عالمية واستثمارية سايبة كل اللي وراها وبتتكلم عن تعويم الجنيه ومعاده وليه متأخر.,.

وصل الأمر بالجهات المالية الدولية إنها تحذر وتهدد لو معامش الجنيه الكائنات الفضائية هتغزو الأرض ومديرة الصندوق تحذر من انهيار الاحتياطي والبنك الدولي بيهدد لو متعومش الدنيا هتخرب في مصر.

فريد بلحاج نائب الرئيس للشرق الأوسط وشمال أفريقيا في البنك الدولي، طلع وهدد وخوف كالعادة  واتكلم بردة عن الأزمات  في الشرق الأوسط عشان يحط مصر في جملة مفيدة و قال إن مصر من بين 3 دول بتعاني من أزمات في المنطقة مع تونس ولبنان رغم إنه مفيش وجه مقارنة من ناحية حجم ونوعيىة الاقتصاد المصري مع دولتين عدد سكانهم قد محافظة في مصر، لكن المطلوب اسم مصر يدخل في أي حاجة سلبية.

وعشان التزييف يبقي مقبول رجع بلحاح في كلامه شوية وقال كلمتين حلوين وهو إن مصر كانت ماشية كويس جدا من سنين في طريق إصلاحي جيد، لكن النهاردة بتواجه عدة أزمات، ومنتتظرين إن الحكومة المصرية تدارك الأزمات وتعود الأمور إلى مسارها الصحيح.

وتوقع إن الأزمات عن الاقتصاد المصري هتنفرج قريب وإن مصر عندها عدد كبير من الخيارات لدى مصر، عشان تخرج من أزماتها وعندها كمان تجارب سابقة في أعوام 2014 و2015 و2016 هتديها مرونة في عبور الأزمات.