البنك الدولي يستفز مصر من جديد ويطالب بتعويم الجنيه.. والحكومة ترد مستحيل واخبطو دماغكم في الحيط
هي التصريحات السلبية والتقارير المبالغ فيها عن الاقتصاد المصري هتخلص امتي وليه التصريحات المستفزة نبرتها بتزيد وايه اللي حصل نهاردة ويعني هو التعويم اللي هينقذ العالم من كل الكوارث للي فيه وليه كل الوكالات والمؤسسات المالية سابت اللي وراها ومركزة اوووي مع مصر . .. ايه الحكايه
طبعا بانكير عرض بالتفصيل والأدلة علاقة وكالات التصنيف الائتماني الدولية بمؤسسات المال السياسي في الغرب ودور جماعة الإخوان المحظورة في تمويل اي حاجة سلبية عن مصر ودي مش شماعة بنعلق عليها أي أخطاء دي معلومات صحيحة وفيه أدلة وارقام بتأكد إن فيه تمويل سري للوكالات دي وفيه توجيه لبنوك استثمارية كبيرة عشان تضخم الخطر في مصر وتقلب الإيجابي سلبي وترسخ النظرة التشاؤومية عن المؤشرات الاقتصادية المصرية وان دائما المستقبل هيكون فيه مشكلة عشان الاستثمارات توقف والنمو يتأثر وفي النهاية الدولة المصرية تتعطل خطط التنمية فيها ومتوصلش للي كانت بتخططله، ودا بيحصل فعلا لأننا مش عايشين في عالم ملائكة بالعكس احنا عايشين في عالم كله صراع وتآمر وأجهزة خفية بتدير الدول ومنظمات سرية بتحكم الشركات والمؤسسات المالية العالمية وفيه لوبي دائما بيتحكم في مصير العالم واسهل حاجة تتعمل دلوقتي اني اطلع توقعات سلبية وتشويه لأي إنجاز اقتصادي.
النهاردة فريد بلحاج، نائب رئيس البنك الدولي لشؤون منطقة الشرق الأوسط وشمال أفريقيا، استفز مصر بتصريح جديد وقال إن مرونة سعر صرف الجنيه المصري ضرورية لتخفيف الضغط على الاقتصاد وكأن العالم خلص كل مشاكله ومش فاضل غير التعويم المصري والحقيقة الموضوع بقي مستفز جدا وزاد عن حده وزي ما بيقولوا أهل مكة اعلم بشعابها ومصر قالت مفيش تعويم دلوقتي لأن الأمور اتحسنت جدا في أزمة الدولار والحكومة مبقتش مخنوقة زي الاول.. لكن البنك الدولي وصندوق النقد الدولي عايزين طبعا يشتغلوا ويتاخد منهم القروض بشروطهم ياما هنضربك كام تقرير سلبي يوقعوا اقتصادك ودا بقر ظاهر جدا الفترة دي بعد إصرار الحكومة على عدم التعويم.
الغريبة إن تصريحات بلحاح جت لوسيلة إعلام خليجية ولدولة بتسعى للاستحواذ على حصص في شركات مصرية ومن مصلحتها طبعا تروج لاي حاجة سلبية عن الاقتصاد المصري وأن التعويم يحصل دلوقتي قبل بكرة عشان تستفيد من هبوط الجنيه وتاخد الحصص في الشركات برخصة تراب.. بنقول لحضراتكم هي دايرة مصالح وفيها كل حاجة واردة وعشان كده مصر صاحية كويس جدا اللي بيحصل وسايبة اللي يقول يقول وماشية في خطة توفير الدولار وبيع الأصول وتعظيم موارد الدولة وترشيد الاستيراد وارتفاع الاحتياطي النقدي..والصندوق والبنك الدولي يخبطوا دماغهم في الحيط ومصر بلغت رسمي مفيش تعويم غير لما تكون فيه ضرورة وخطر على الاقتصاد لكن المؤشرات اللي أصدرها البنك المركزي المصري بتقول إن الموقف العام للاقتصاد المصري بيتحسن بشكل كبير جدا.
