إيه سر الحملة الشرسة والتقارير السلبية عن الاقتصاد المصري.. فتش عن المستفيد

في الفترة الأخيرة وتحديدا من ساعة اعلان الرئيس السيسي ترشحة لانتخابات الرئاسة الجاية ومؤسسات مالية وبنوك ووسائل إعلام ومواقع إعلام اطلقت حملة شرسة على الاقتصاد المصري وإزاي بينهار وكأن في العالم كله مفيش مشاكل غير في مصر.. ايه اللي بيحصل وايه هو سر الحملة على الدولة المصرية عامة واشمعنا الاقتصاد اللي مركزين عليه.

الأمور كانت ماشية عادية زي ماقلنا والدنيا كانت وردي في الاقتصاد المصري بحسب التقارير الدولية ومكانش فيه غير مشكلة الخلاف مع صندوق النقد الدولي غير كدا كانت اشادات بقدرة الحكومة المصرية على زيادة الايرادات الدولارية وتقليل الفجوة في سوق الصرف واستقرار الأسواق المالية وكمان قدرتها في محاصرة السوق السودا للدولار وارتفاع تدفق الاستثمارات وتعظيم القيمة المضافة لواردات الدولار من القطاعات الاقتصادية بجانب نجاح الحكومة في ترشيد فاتورة  الاستيراد بشكل كبير وفر مليارات الدولارات لكن فجأة الدنيا اتقلبت لما أعلن الرئيس السيسي خوض الانتخابات الجاية والناس نزلت أيدته في كل الميادين.

طبعا الحملات المضادة لمصر واستغلال أزمة الدولار والاسعار والديون وغيرها في تسخين الشارع  معروف مصدرها في مصر لو دورت على المستفيد وأولهم تنظيم الاخوان المحظور واللي شايل راية الهجوم والتشويه والتسخين على مصر وطبيعي حملاتهم تزيد جدا بعد قرار الرئيس السيسي ودا لانهم مش قادرين ينسوا موقفه معاهم وتدميره لخطة بيع مصر للمرتزقة وتجويع الشعب والانتقام وتصفية الحساب مع المصريين كلهم.

الغريبة إن كل الهجوم على الاقتصاد خاص بالدولار والديون وان مصر بتوقع حرفيا والأغرب إن الأرقام واضحة وصريحة واعلنها البنك المركزي امبارح وبتقول إن التدفقات الدولارية بتزيد وأزمة الدولار تحت السيطرة وفيها انفراجة كبيرة على أخر السنة وعدد الأسباب المنطقية وأعلن عن خطة تقليل الاعتماد على الدولار من خلال اتفاقيات مبادلة العملة مع دول كتير هتوفر مليارات الدولارات ودخول البريكس وكمان ارتفاع وتيرة التصدير وانخفاض فاتورة الاستيراد لـ57 مليار دولار غير شاملة المواد البترولية وغيرها من الاجراءات اللي بتقول إن الدولار مهما ارتفع فمسيرة لزوال.. طيب ليه الحملات.. شوف حضرتك الحملات دي ماشية معانا حتى لو بقينا اغنى من أمريكا ومش هسيسبوا فرصة إلا ويستغلوها لمهاجمة مصر سواء الإخوان أو مؤسسات مالية دولية تابعة لجهات ودول ليها مصالح عكسية مع تقدم مصر وازدهارها.
وبالنسبة لقرض الصندوق فهو مبقاش مشكلة ملحة بالمقارنة بالمبلغ اللي لسه هيتصرف بعد الاتفاق، والصندوق نفسه اكد إنه هيجري محادثات مهمة مع مصر بعد اقرار المراجعة الاولى والتانية يعني الصندوق حريص على مصر أكتر من حرص مصر على القرض لكن الذباب الاكتروني للاخوان بيصدر المشهد إن مصر هتجوع لو مخلصتش الاتفاق مع صندوق النقد.