الهدوم الشتوي للأغنياء فقط.. أسعار الملابس السنادي هاتوصل كام

اية مقدار زيادة أسعار الهدوم الشتوي السنادي؟..هل في ارتفاع عن السنة اللي فاتت ولا لأ؟..هاتقدر تجيب هدوم الشتا ل اولادك ولا لأ

يلا بينا نعرف الاجابات

الشتا خلاص على الأبواب والناس على مواقع التواصل الاجتماعي بقت بتتناول بسخرية أرقام الملابس الشتوي اللي تم عرضها في بترينات المحلات المختلفة.

واللي شهدت ارتفاع في أسعار الملابس "الشتوية" بشكل كبير، حتى أن بعض المستخدمين تساءلوا  إذا كان يقدروا ياخدوا  "قرض من البنك" علشان يشتروا ملابس الشتا.

والسخرية اللي حصلت من رواد مواقع التواصل الاجتماعي في الموضوع دا.. كان فيه جزء من الحقيقة الصراحة.. ودا لأن أسعار الملابس شهدت ارتفاع كبير.

وممكن الموسم الحالي للشتا يشهد ارتفاعات متفاوتة في أسعار الملابس الشتوي واللي ممكن توصل ل 25 بالمئة.. ودا  تحت وطأة الضغوط التضخمية اللي بتفرض نفسها بشكل واسع على الأسواق.

و الضغوط دي سببها ارتفاع أسعار مستلزمات الإنتاج، بالإضافة لأزمة توافر العملة والفجوة الحالية بين سعر الدولار مقابل الجنيه في السوق الرسمية والسوق الموازية.

في تصريحات صحفية رئيس غرفة صناعة الملابس الجاهزة والمفروشات المنزلية باتحاد الصناعات المصرية، محمد عبد السلام، قال إن أسعار الملابس الشتوية في مصر  هاتشهد ارتفاع هذا الموسم بنسبة تصل إلى 25 بالمئة، مقارنة بأسعار العام الماضي.

والزيادة دي زي ما قال عبد السلام، سببها هو تراجع سعر صرف الجنيه أمام الدولار الأميركي، و ارتفاع أسعار خامات ومستلزمات الإنتاج، ودا كله أدى  إلى زيادة التكلفة.

ورئيس غرفة صناعة الملابس الجاهزة والمفروشات باتحاد الصناعات، توقع أن  ارتفاع الأسعار هايأثر بدوره على إقبال المواطنين على الشراء خاصة مع تراجع القوة الشرائية بشكل كبير، ودا هايخلق حالة من الركود في الأسواق المصرية.

وبالفعل سجلت مجموعة الملابس والأحذية ارتفاعاً نسبته (0.8بالمئة)، في ضوء ارتفاع أسعار مجموعة الأقمشة بنسبة (1.9 بالمئة) ومجموعة الملابس الجاهزة بنسبة (0.6 بالمئة) ومجموعة الأحذية بنسبة (1.2 بالمئة)، في شهر أغسطس مقارنة بشهر يوليو، طبقاً لبيانات الجهاز المركزي للتعبئة العامة للإحصاء.

وكل الزيادات في المنتجات دي وراها أزمة نقص العملات الأجنبية، وكمان خسارة الجنيه المصري نحو نصف قيمته مقابل الدولار منذ مارس 2022.

وضيف على كدا ارتفاع الأسعار عالمياً وزيادة أسعار الوقود، ودي كلها عوامل لها أثر كبير على المواد الخام الرئيسية الداخلة في الإنتاج.

وبالرغم من أن مصر من الدول اللي لها باع طويل في صناعة الغزل والنسيج وصناعة الملابس الجاهزة، لكن معظم المواد الخام سواء كانت الخيوط أو الإكسسوارات الداخلة في صناعة الملابس الجاهزة جزء منها استيراد خارجي.

يعني نقدر نقول لحضراتكم.. أن الشتا دا محتاج منك برضوا تشتري الجاكت الجلد بتاع كل سنة وتلبس تحته أي حاجة.