أخطر 3 لقاءات في 2023 .. ماذا تخبئ مصر للعالم في الشهور القادمة؟
في الساعات الأخيرة حصل 3 لقاءات مهمين جدا في العاصمة الصينية بكين القاسم المشترك في ال 3 لقاءات دول هو محافظ البنك المركزي المصري حسن عبدالله اللى بيقود حاليا تحركات قوية هتغير قواعد اللعب في سوق الصرف وهتقضي على أزمة الدولار في أقرب وقت وهترسم خريطة جديدة للتعاملات في سوق الصرف وهترجع جزء كبير من هيبة الجنيه المفقودة.. فيا ترى ال 3 لقاءات دول كانوا مع مين؟ وايه الاتفاقات اللى تمت فيهم ؟ وايه تأثيرها على الاقتصاد وأزمة الدولار في مصر؟
حسن عبدالله محافظ البنك المركزي بدأ من كام زيارة مهمة جدا للعاصمة الصينية بكيت بدعوة من محافظ محافظ البنك الشعبي الصيني لحضور الاحتفال باليوم الوطني الصيني واحتفالات منتصف الخريف، وعلى هامش الفاعلية المهمة دي عقد المحافظ 3 اجتماعات في غاية الأهمية الاجتماع الأول مع رئيس بنك التنمية الجديد وده تقدر تقول عليه كده الذراع الاستثمارية لتحالف بريكس اللى بيضم 5 من كبار الدول هم الصين وروسيا والهند وجنوب افريقيا والبرازيل .. والاجتماع التاني كان مع محافظ البنك الشعبي الصيني وده البنك المركزي المسئول عن السياسة النقدية في الصين .. اما الاجتماع التالت فكان مع محافظ مصرف الامارات المركزي.
طب أهمية الاجتماعات دي ؟
بص يا سيدي البنك المركزي شغال على مشروع كبير جدا لمبادلة العملات وال 3 مسئولين اللى قابلهم حسن عبدالله مصر بقالها فترة بتعمل معاهم مفاوضات لتوقيع اتفاقيات في الاطار ده وعندك مثلا بنك التنمية الجديد ده اللى يعتبر البديل لصندوق النقد الدولى وبيمنح تمويلات للدول الأعضاء بفواسد مخفضة وشروط ميسرة ومصر مع بداية 2024 هتنضم رسميا لبريكس وهتقدر تحصل على برامج تمويل من بنك التنمية الجديد.
كمان الصين واحدة من أهم الدول المؤسسة لبريكس وحجم التجارة بينها وبين مصر كبير جدا وبيوصل لحوالي 17 مليار دولار وطبعا توقيع اتفاقية مبادلة مع بكين هيخلى مصر تقدر توفر المبلغ ده لأن اى حاجة هتشتريها من الصين هتدفع سعرها مش بالدولار زي ما كان بيحصل قبل كده يعنى فيه 17 مليار دولار من فاتورة الاستيراد هتتشال من على كاهل البنك المركزي وده رقم كبير جدا
ومش بس الصين فيه اتفاقيات مبادلة عملات مع الهند وروسيا واليابان ودول تانية كتيرة هيتم الاتفاق عليها في الفترة الجاية.
وفى اللقاء الأخير مع محافظ مصرف الامارات المركزي وقع حسن عبدالله اتفاقية ثنائية مهمة جدا مع الإمارات لمقايضة الدرهم الإماراتي والجنيه المصري.
وبتتيح الاتفاقية للطرفين مقايضة العملات المحلية بقيمة إسمية تصل إلى 5 مليارات درهم إماراتي و42 مليار جنيه مصري.
وبتأتي اتفاقية مبادلة العملات بين مصر والامات في إطار التعاون المستمر بين البلدين ودعمًا لأواصر التعاون وبتعتبر عملية المقايضة حجر الأساس في دعم التعاون المالي بين البلدين بالعملة المحلية.
طب هل ده كفيل لحل أزمة نقص العملة ؟
ده مهم جدا .. لكن طبعا فيه حاجات تانية مهمة البنك المركزي شغال عليها ومنها طبعا مؤشر الجنيه اللى محتمل بنسبة كبيرة يصدر قبل نهاية 2023 والمؤشر ده هيفك الارتباط بين الجنيه وبين الدولار وهيخلى قيمة العملة المصرية مربوطة بسلة من العملات التانية زي اليورو والاسترليني والروبل واليوان وكمان بعض المعادن النفيسة زي الدهب والفضة وغيرهم
يعنى كده أزمة الدولار هتخلص ؟
بص الأزمة اكيد مش هتخلص يسن يوم وليلة لكن اللى بيعملوا البنك المركزي مؤخرا سمع بقوة في السوق السودا للدولار وفى الساعات الخيرة سعر العملة المريكية في السوق غير الرسمية انهار وبدل ما كنا بنسمع عن تخفيض قيمة الجنيه البوصلة دلوقتى رايحة ناحية هبوط كبير في سعر العملة الأمريكية في السوق السودا
طب وباقي الموارد الدولارية ؟
الحمد لله فيه طفرة كبيرة بتحصل في قطاع مهم زي السياحة ومتوقع القطاع يحقق السنة دي عوايد حوالى 15 مليار دولار وده أعلى رقم تحققه السياحة في تاريخ مصر وكمان فيه نمو هائل في عوايد قناة السويس والصادرات وباقي قطاع واحد فيه شوية مشاكل البنك المركزي شغال عليه وهيكون فيه مفاجأة كبيرة للمضاربين فيه وهو تحويلات المصريين في الخارج اللى تراجعت بشكل ملحوظ في الشهور الأخيرة بسبب عصابات الدولار اللى بتستولى على التحويلات من بره بره وبتشتريها من المصريين في الخارج وبتعت تمنها بالجنيه لأهل المسافر
