دولار الأيام الصعبة.. حكايات مشجعة في قلب الأزمة
طول الوقت بنتكلم عن ناس استغلت أزمة العملة وراحت تتاجر بيها عشان الربح حتي لو هتصعبها على الناس العادية اللي بتشتري بالغالي وبنتكلم عن التجار اللي احتكروا السلع وخزنوها عشان يلعبوا في السعر وعن الناس اللي شوهت وحرضت وسودت الصورة لكن فيه نماذج وطنية بتقول لسه بخير وقفت جمب بلدها في أزمتها ياترى مين الناس دول وازاي وقفوا في الشدة مع البلد.
أول فئة من الناس الطيبة هي المواطن العادي اللي اتحمل ولسه بيستحمل الأوضاع الاقتصادية الصعبة بسبب الغلاء اللي ملوش ذنب فيه وهو دا البطل الاول واللي الرئيس السيسي نفسه شكرهم في خطابه في بني سويف وقال تحمل الناس كان أساس وقفة البلد لغاية دلوقتى.
تاني فئة هي رجال الأعمال الشرفاء اللي رفضوا يتعاملوا مع السوق السوداء للدولار واستحملوا تعطل مصالحهم وبضاعتهم في المواني عشان ما يزودوش الأزمة على بلدهم واللي راحو غيروا دولاراتهم في البنوك الرسمية عشان متروحش ليد تجار الأزمات ومن بين الفئات الأصيلة اللي رفضت تتاجر في أزمة بلدها المصريين اللي رفضوا يتعاملوا مع السوق السوداء للدولار في الغربة عشان حسوا إن دي شياطين الإنس وعاوزين يلموا الدولار عشان مايوصلش الدولة ولا بنوكها وماعملوش زي ناس تانية بصت للمكسب وخلاص.
كمان مصر مش هتنسى اللي رفض يخزن الدولار في بيته ولا يبيعه في السوق السوداء باعلى سعر واعتبر المكسب هنا مشبوه وحرام لانه جاي من مضاربة وفي وسط أزمة وبيأذي ناس تانية كتير.
