خلي بالك موظف البنك هياخد فلوسك وأنت هتشكره

أية حكاية التارجت ونسبة الموظف من القروض والشهادات؟ هل الموظف بيتعرض لضغوط علشان يطلع منك بفلوس ولا هو دا شغله؟

عالم البنوك مش زي ما أنت فاكر.. بدل وناس قاعدة مرتاحة لأ دا أمر مختلف تماماً عن اللي أنت بتشوفه.. اللي ورا الكواليس في ضغط ذهني وعصبي كبير.. وفي حاجة اسمها تارجت.

والتارجت دا يعني كم أو مقدار المعاملات اللي الموظف ملزم أنه ينفذها.. ودا بيتم من خلالك أنت العميل.. يعني الموظف هايحقق التارجت من خلالك أنت.. لأنه هايحاول يقنعك بعمل قروض .. عمل شهادات.. عمل كارت مشتريات وغيره.

طيب حد هايسأل ويقول طيب والموظف هايستفاد اية من كدا.. هانقوله.. إن في مكافأة  بيحصل عليها الموظف في حال أنه تمكن من تحصيل جزء من أموال كانت بتتتصنف  بأنها متعثرة أو حتى معدومة بالنسبة للبنك.. وفي بنوك بتمنح موظفيها  مكافأة تصل ل  10% أحيانا من قيمة الأموال المستردة.

الموضوع محتاج شرح أبسط

طيب بص يا فندم.. دلوقتي البنوك.. خلينا نقول البنك الواحد بتتصاعد فيه المنافسة بين الموظفين علشان يجذبوا العملاء، ودا علشان يتم استقطابهم وتقديم خدمات بنكية إضافية ليهم.. يعني ممكن الموظف يقنعك بأنك تاخد قرض مثلا.. فتوافق فهو يستفيد بنسبة محددها البنك له.. أو يقنعك ب كارت مشتريات.. أو شهادة استثمار وغيره.

وفي بعض البنوك بتتحايل على زبائنها.. ودا من خلال فرض رسوم أكبر على مشترياتهم، ودا في حال ماكنش في حساباتهم المصرفية فلوس تكفي أو تغطي مشترياتهم.

كمان لازم تعرف أن كارت المشتريات اللي موظف البنك بيفضل يقنعك بيه.. دا مش علشان أنت عميل كيوت مثلا ولا حاجة.. دا عشان لما تيجي تشتري حاجة بالبطاقة ففي 
جزء   من المبلغ المدفوع هو عمولة للبنك.. يعني هو  مستفيد من عمليات التسوق اللي بيقوم بيها.

كمان لما الموظف بيفضل يزن على ودنك.. علشان تاخد 
بطاقة ائتمان من البنك.. فهو  بيحاول  أنه يقنعك بالاشتراك في خدمة تأمين،  والخدمة بتخسرك مصاريف ورسوما مالية، واللي بيستفيد منها هو البنك.

في حيلة كمان بتعملها البنوك علشان تاخد منك فلوس.. وهو إن الموظف يقنعك بالدفع المبكر للقرض اللي أنت خدته.. بس هو برضوا مابيقولكش أن البنك غالبا بيفرض عليك رسوم على السداد المبكر بما.

موظف البنك اللي هايفضل يزن على ودنك علشان تاخد بطاقة الائتمان.. مش هايقولك برضوا على أنك لو لغيتها هايتم رفع نسبة الفائدة على أي قرض مالي أنت بتطلبه.

خلي بالك وماتعملش حاجة إلا لما تفهم أبعادها كويس