الدولار هيوصل100 جنيه!!.. إيه اللى هيحصل بعد انتخابات الرئاسة؟
هو سعر الدولار فعلا هيوصل 100 جنيه ؟ وهل الأوضاع الاقتصادية متدهورة أوي كده؟ وامتى مصر هتاخد قرار تخفيض العملة ؟ وايه علاقة اللى بيحصل في سوق صرف العملات بالانتخابات الرئاسية الجاية؟ ومين القطاعات اللى هتستفيد من تعويم الجنية مرة رابعة خلال أقل من سنتين؟ وليه الكلام كتير أوى حاليا عن مستقبل الجنيه المصري؟ وليه مفيش كلام جديد عن زيارة بعثة صندوق الدولي لمصر واجراء المراجعة الأولى لقرض ال 3 مليار؟
في الأيام الأخيرة زاد بشكل ملحوظ الكلام عن مستقبل الجنيه المصري.. وطلع أكتر من تقرير لمؤسسات تمويل ووكالات تصنيف دولية بيتوقعوا انخفاض قيمة العملة المصرية خلال الفترة الجاية مع استمرار الضغط على احتياطي العملة الأجنبية في ظل أزمة نقص عملة واضح بتعانى منه مصر من مارس 2022 ولحد دلوقتي.. وووسط كل الكلام ده طلعت تصريحات لبعض الخبراء بتقول ان سعر الدولار هيوصل ل 100 جنيه خلال 2024 لما مصر تعمل تعويم حر بشكل كامل.. فهل الكلام ده صحيح وهل ممكن سعر العملة الأمريكية يوصل للرقم ده ؟
قبل ما نجاوب على الأسئلة دي لازم نكون عارفين ان سعر الدولار في البنوك المصرية مستقر من شهر مارس اللى فات يعنى داخل في 6 شهور عند مستوى ال 31 جنيه والبنك المركزي بالتنسيق مع الحكومة قدروا خلال الفترة دي يوفروا السيولة الدولارية المطلوبة للشركات والمستوردين بالإضافة الى توفير اكتر من 30 مليار دولار للافراج عن البضايع اللى كانت متخزنة في الموانئ وطبعا ده كان ليه انعكاس على السوق السودا للدولار اللى هي كمان تأثرت وتراجع سعر العملة الأمريكية مع انباء إيجابية عن جمع ما يقرب من 5 مليار دولار خلال الشهور الجاية من بيع بعض الأصول ضمن برنامج الطروحات الحكومية.
امال ايه حكاية الدولار هيوصل الى 100 جنيه ؟
الحقيقة دي تصريحات شخصية لبعض الخبراء مش مبنية على الواقع خالص لأن حتى التقارير الدولية اللى طلعت اتكلمت عن تخفيض سعر الجنيه بتتراوح توقعاتها بين 15 الى 20 % انخفاض يعنى احنا بنتكلم على 6 جنيه زيادة في سعر الدولار الواحد على اقصى تقدير يعنى اعلى رقم ممكن يوصل ليه سعر الدولار هو 37 جنيه وبالمناسبة ده السعر اللي بيتباع بيه الدولار في السوق الموازية في الأيام الأخيرة
وخد دي كمان .. أحد التقارير الدولية اللى صدرت مؤخرا قالت ان الجنيه هيرجع سعره يزيد تانى وحتى لو تم خفض قيمته في النص التانى من 2024 هيرجع يرتفع تانى قدام الدولار والعملة الأمريكية سعرها هيتراجع الى 34 جنيه تانى من جديد
طب هل الأوضاع الاقتصادية متهورة أوي كده عشان ناس تقول الدولار هيوصل ل 100 جنيه ؟
مصر زيها زي معظم دول العالم بتعانى بسبب تداعيات الحرب الروسية الأوكرانية والتراجع اللى حصل في سلاسل الامداد والارتفاعات الكبيرة في أسعار الطاقة والحبوب لكن الحمد لله لحد دلوقتى الأمور تحت السيطرة وفيه تحسن كبير بيحصل في معظم القطاعات وده مش كلامنا دي تقارير دولية بتتوقع حجم نمو كبير جدا في مصر خلال السنين الجاية وعشان كده صعب جدا بل يكاد يكون مستحيل ان الدولار يوصل للسعر ده
طب هو فيه تعويم ولا لأ ؟ ولو فيه القرار هيصدر امتى ؟
الرواية الرسمية في مصر بتقول ان مفيش تعويم للجنيه هيحصل على المدى القريب لكن فيه تقارير دولية وتوقعات لخبراء بتقول ان تخفيض قيمة الجنيه امر حتمى مش اختيارى عشان مصر تقدر تسد الفجوة التمويلية اللى عندهاوتقدر تاخد باقي قرض ال 3 مليار من صندوق النقد الدولي.. ومعظم التوقعات بتقول ان تخفيض قيمة العملة مش هيحصل قبل انتخابات الرئاسة اللى هتتم في اول 2024
حد هيسأل يقول ايه علاقة الانتخابات بسعر الصرف؟
خد بالك ان الاقتصاد مش بعيد ابدا عن اللى بيحصل في عالم السياسة والادراة السياسية في مصر بتحاول تلعب على عنصر الوقت وتديها نفسها فرصة لتوفير سيولة دولارية تخليها حتى لو مضطرة لتخفيض قيمة الجنيه يكون عندها رصيد من العملة الأجنبية يمنع اى تدهور ممكن يحصل في سعر صرف الجنيه، بالإضافة كمان ان دولة مقبلة على انتخابات رئاسة صعب تتحمل قرار جديد حاليا بتعويم الجنيه لأن ده هيكون ليه تداعيات كبيرة جدا على السواق وأسعار السلع هتقفز قفزات جنونية
وده يفسرلك ليه الكلام كترت دلوقتى تحديدا عن مستقبل الجنيه المصري خصوصا ان فيه دول وأجهزة مخابرات وجماعات مش عاوزة يكون فيه استقرار في مصر قبل الانتخابات الرئاسية الجاية
طب وايه القطاعات اللى هتستفيد لو حصل تعويم ؟
فيه قطاعات كتير هتستفيد من تحريك سعر الصرف اهمهم البورصة واسهم الشركات الكبيرة بالإضافة كمان للشركات والمستوردين لأنه في حالة حدوث تحرير لسعر الصرف وتدفق الأموال الأجنبية للاقتصاد المصري وبالتالي حل مشكلة السيولة الدولارية، وقتها هتقدر الشركات استيراد الخامات اللازمة لزيادة إنتاجها اللي تأثر سلبا بشح العملات الأجنبية.
