مفاجأة مدوية عن تعويم الجنية.. إيه اللي هيحصل آخر الشهر؟

رغم صدور كتير من التقارير فى الفترة الأخيرة عن مستقبل الجنيه وعن توقعات المؤسسات الدولية لسعر الدولار الفترة الجاية الا ان مفيش تاقرير واحد حدد معاد معين لصدور قرار خفض قيمة الجنيه.. لكن من ساعات صدر تقرير جديد فجر مفاجأة من العيار التقيل وحدد لأول مرة امتى ممكن الحكومة تاخد قرار تعويم الملة المصرية وكمان قال النسبة اللى هينخفض بيها الجنيه فى مواجهة الدولار.. فيا ترى التقرير استند على إيه ؟ وامتى تحديدا وفقا للتقرير هيصدر القرار الرسمي الخاص بسعر الصرف فى مصر؟ وهل فعلا ممكن الحكومة تستجيب لضغوط صندوق النقد وتعمل تخفيض لعملتها ولا دي مجرد توقعات؟
 
وكالة فيتش سوليوشنز العالمية طلعت النهاردة تقرير أكدت فيه ان البنك المركزي المصري هيخفض سعر صرف الجنيه بحوالي 18.6% مقابل الدولار بنهاية العام الجاري 2023 لسد الفجوة بين السعرين الرسمي والموازي بشرط قدرة الحكومة على جذب تدفقات نقد أجنبي
الوكالة قالت أن الضغط على الجنيه ممكن يخف لو نجحت الحكومة في بيع أصول لمستثمرين أجانب بشكل يحفز تدفقات رؤوس الأموال الأجنبية لمصر.
ورجحت الوكالة في تقريرها حول "مخاطر مصر" عن الربع الأخير من 2023، ارتفاع سعر الدولار إلى 38 جنيه بنهاية 2023 مقارنة بمتوسط سعر 30.96 جنيه في البنوك، وقالت ان تعويم الجنيه هيخلى سعر الدولار فى البنوك يقترب من مستواه حاليا في السوق السوداء للدولار واللي بيحوم حوالين مستويات الـ 40 جنيه للدولار الواحد خلال الأيام القليلة اللى فاتت وفقا لتقديرات الوكالة. 
طب امتى ده ممكن يحصل ؟
فيتش قالت في تقريرها ان تخفيض الجنيه ممكن يحصل نهاية الشهر ده أو أول الشهر الجاي على أقصى تقدير وربطت القرار بنجاح الحكومة في جمع سيولة دولارية كافية للإشارة للسوق بان ده آخر خفض هيحصل للعملة فى مصر.
الغريبة ان الوكالة فى نفس التقرير ما استبعدتش ان قرار تعويم الجنيه يتم تأجيله لما بعد الانتخابات الرئاسية في 2024.
فيتش فى تقريرها شايفة ان العملة المصرية هتعود للارتفاع خلال السنة الجاية وان الدولار بعد ما يوصل الى 38 جنيه هينزل لـ 36 جنيه تانى فى النص التاني من 2024 .. وقالت ان الجنيه مقيم حاليا بأقل من قيمته الحقيقية بنسبة 12%، وهتزيد النسبة بعد عملية خفض الجنيه المتوقعة
الوكالة توقعت اعتماد الحكومة على بيع الأصول لتمويل طلبات الاستيراد المعلقة البالغة 5.5 مليار دولار لكنها قالت أن بيع أصول الدولة بيواجه تحديات وده اللى خلا الحكومة تجمع 1.6 مليار دولار بنهاية يوليو فى وقت كان المفروض تجمع 4.6 مليارات دولار تانية بنهاية 2024.. وأكدت ان التخفيض الناجح لقيمة العملة هيسمح بمزيد من صفقات الخصخصة ويشجع عودة مستثمري المحافظ ل سوق الدين المصري خصوصا مع وصول العائدات إلى مستويات قياسية عالية
تقرير فيتش قال ان صافي الالتزامات الأجنبية على القطاع المصرفي في مصر ممكن يتسع خلال الفترة الجاية في ظل طلبات الاستيراد الكبيرة المعلقة بجانب حيازة الأجانب من أذون وسندات الخزانة اللى لسه مرتفعة وقالت أن وضع صافي الأصول الأجنبية تراجع  من يناير اللى فات في ظل خروج الأموال الساخنة وموجة التشديد النقدي عالميا.
ده اللى قالته وكالة فيتش فى تقريرها فيا ترى فعلا هيكون فيه تعويم جديد ولو فيه هيكون اخر الشهر ده ولا بعد انتخابات الرئاسة فى 2024 .. عموما خلونا نتابع ونشوف وان كانت كل التقارير اللى صدرت قبل كده توقعاتها عن الجنيه ما حصلتش وسعر الدولار مستقر من شهر مارس اللى فات