الضرب هيزيد.. تصعيد جديد ضد الدولة المصرية والسيسي المطلوب
طول ما انت قوي وليك مخالب في المنطقة ونفوذ بدأ يكبر هتلاقي أعدائك بيكتروا من حواليك وكل ماتيجي فرصة تكبر أكتر هتلاقيهم بيزيدوا الهجوم والتصعيد والتآمر والتشويه ودي طبيعة الخونة والمنافسين واللي مش عايزينك تكبر عن اللازم أو تعدي الخطوط اللي تهدد مصالحهم.. ايه سر الهجوم الشديد على الدولة المصرية في الأيام الأخيرة وليه الحملات بتزيد وليه الحملات دي بتستخدم الاقتصاد بالذات عشان تضربك منها كدولة.
من يوم ما راحت جماعة الإخوان في غرف النسيان والزنازين وثبوت تآمرهم، والحرب على الدولة المصرية موقفتش لحظة ولا حتى بين الشوطين، ونصبوا الرئيس السيسي العدو الأول ليهم وهو العضمة اللي واقفة في زورهم، لانه هو الراجل اللي اتلم حوليه المصريين وقت الشدة وفوضوه يعمل اللازم عشان البلد ترجع لصحابها، ومن يوما والإخوان ومعاهم مشروع الشرق الاوسط الجديد وإمارات وولايات الجهاد الوهمي في حالة عداء صريح على مدار الساعة مع رئيس مصر بعد ما أجهض كل أحلامهم في استعباد شعوب المنطقة وبيع مصر لجماعات المتاجرة بالدين ورهنها في سوق الإسلام السياسي وتحولها لأفغانستان تانية.
وفي الأيام الأخيرة استعرت الحرب والحملات ضد الرئيس السيسي والدولة المصرية وعلى فكرة هتزيد الفترة اللي جاية بشكل كبير، طبعا حضراتكم عارفين ليه ,, أيوا عشان انتخابات الرئاسة قربت وأكيد المصريين مش هيفرطوا في قائد أنقذهم أكتر من مرة وخلى مصر قوة إقليمية كبيرة ومستقبلها في السما وأعاد اكتشاف امكانياتها، والحقيقة جماعة الإخوان مش عارفة تتعلم من الدرس واستغربت ليه المصريين بردوا لسه بيأيدو الرئيس السيسي رغم ارتفاع الاسعار الكبير جدا وظروف المعيشة الصعبة.. مش قادرين يفهموا إن المصريين أذكياء وعارفين إن الازمة عالمية وإن اللي حققه السيسي في البلد معجزة بكل المقاييس وإنه مكتبش على أي مشروع اسمه لغاية دلوقتي، وهي نفسها جماعة الشر مش عارفين كيميا المصريين اللي بيحبوا اللي يحكمهم يكون قوي وجريء وعنيد.. يعني من الأخر الناس كانت عايزة بطل يشتغل عشانهم ومايخافش ولقيوه في شخص السيسي.
كل حملات الاخوان والاعلام المدفوع وصفحات السوشيال ميديا اللي بتمول من فلوس الإرهاب، هدفها دلوقتي تشويه كل الانجازات الاقتصادية ونشر فكرة إن المشروعات دي ضيعت البلد وخربت الاقتصاد بدليل أزمة الغلاء وصعوبة المعيشة والمطلوب حشد رأي عام كاره للدولة والحكومة وناقم على النظام من خلال مواد فيليمة مفبركة وشفتي وهتشوفو الفترة الجاية فيديوهات كتير لمظاهرات مزيفة وقديمة وفيديوها لناس بتحكي عن الغلاء واللي باع ابنه واللي رهن مراته واللي طفش في صحرا الربع الخالي وكلها فيديوهات معمولة في استديوهات الجماعة وهدفهم خلق حالة من الرفض الشعبي بالتشكيك في اللي جاي وكله عشان تجهض أو توجه الناخبين في الانتخاابات الجاية.. ودا فكر بيقول بردوا إن الجماعة لسه بتمارس الغباء السياسي بحذافيره ومفهمتش عقلية المصريين.
