خسر 4 جنيه في ساعات.. إيه اللي بيحصل في السوق السوداء للدولار
ياترى ايه اللي بيحصل في السوق السودا للدولار وإيه سر التراجع الكبير في الأسعار وسر رعب تجار العملة في الساعات الأخيرة وايه هي الضربة اللي وجهتها الحكومة للسوق الموازية.
معروف إن سعر الدولار في السوق السودا رفع في الايام الأخيرة بسبب استمرار الأزمة وتقرير ديون مصر والـ7 مليار دولار اللي مطلوبين من الحكومة عشان تسددهم في 4 شهور باقين من السنة ودا خلق حالة من الانتعاش إن الحكومة لسه محتاجة دولارات ودا رفع السعرفي السوق السودا للعملة الأمريكية وكمان السعر رفع عشان تأخر إعلان صفقات جديدة في برنامج الطروحات الحكومية.
لكن الجديد إن السوق السودا للدولار في الكام ساعة الأخيرة ضربها الخوف والهبوط الكبير والدولار نزل أكتر من 4 جنيه من 41 جنيه ل 37 و38 جنيه مرة واحدة وفيه تداولات بتم بأقل من كده بحسب المعلومات اللي جاي من السوق.. طيب ايه اللي حصل نهاردة وخلى الدولار الأسود ينهار بالشكل دا.
شوف حضرتك السوق السودا زي أي سوق مالي حتى لو كانت غير شرعية بيحكمها اشاعات وأخبار وأرقام ونتائج وتوقعات بيتحدد على أساسها السعر وغالبا تكون فيه أخبار سلبية الأسعار بتزيد زي مثلا الحكومة تعلن ارتفاع التضخم ونقص السيولة أو وكالة دولية تطلع تقارير سلبية عن ازمة العملة في مصر أو صدور قرارات حكومية متعلقة بارتفاع سعر الدولار ودي كلها بتكون أخبار بتنعش السوق السودا ومعناها إن لسه الأزمة مستمرة والحكومة معندهاش دولارات كفاية ولا الشركات ولا المستوردين والعكس صحيح لما تكون الأخبار ايجابية الاسعار بتنزل في السوق السودا زي إن مفيش تعويم واستقرار أسعار الدولار في البنوك وانتهاء ازمة الافراجات الجمركية وصفقات الطروحات الحكومية وزيادة الاستثمار والتقارير الدولية الايجابية ودا معناه إن الأزمة في طريقها للحل وبالتالي التجار بيتخلصوا من الدولار بالبيع عشان سعره هيبتدي ينزل.
طيب نرجع لسؤالنا ليه الاسعار نزلت في السوق السودا.. الحقيقة فيه أكتر من سبب اولها خطوة انضمام مصر لتكتل بريكس واللي بدأت تؤثر في تعاملات السوق السوداء للدولار، انخفض سعر العملة الأمريكية بالسوق الموازية خلال الساعات اللي فاتت بعد سلسلة من الأنباء الهامة والجيدة، كان أهمها انضمام مصر للتكتل الاقتصادي الشهير وصدور تقارير مطمئنة حول وضع الاقتصاد المصري، وتوقعات من مؤسسات وبنوك دولية تفيد بعدم تراجع الجنيه في القريب العاجل وقرب الإعلان عن صفقات جديدة في برنامج بيع حصص من الشركات الحكومية وطرح شركات جديدة حسب وثيقة ملكية الدولة الأخيرة وهي شركات متوقع تجيب حصيلة ضخمة ودا زي مابنقول بالبلدي كده ضرب السعر في السوق الموازية.
وحسب معلومات من جوه السوق واصل سعر الدولار اليوم التلات تراجعه في السوق السوداء لليوم الثتاني على التوالي وانخفض سعر الدولار في السوق الموازية النهاردة مسجلاً وسجل 37 و38 جنيه سعر الشراء وسعر البيع 40.30 جنيه بعد ماكان وصل لـ41 و42 جنيه في الأسبوع اللي فات.
