حرب العملات تشتعل.. ضربة بوتين القاتلة للدولار
الحرب بين الروس والأمريكان بقت عيني عينك.. وكل طرف بيحاول ينهى على الطرف التاني.. امريكا استغلت غزو روسيا لاوركانيا أسوأ استغلال وحجزت على أرصدة بمليارات الدولارات للروس.. وطردت موسكو من نظام سويفت المالي العالمي.. ومن يومها والروس حطوا الأمريكان فى دماغهم.. ومن خلال تجمع بريكس بتحاول روسيا توجيه ضربة قاتلة للدولار واستحداث عملة احتياط عالمية جديدة.. مش بس كده موسكو فى الساعات الأخيرة وجهت ضربة قاتلة للعملة الأمريكية.. فيا ترى ايه اللى حصل وايه تأثيره على الدولار؟
الرئيس الروسى فلاديمير بوتين أصدر مؤخرا مرسوم جديد بسداد تمن الصادرات الزراعية الروسية بالروبل بدلا من الدولار فى إطار التخلى عن العملة الأمريكية.
الرئاسة الروسية قالت في بيان ليها النهاردة أنه بناء على المرسوم يمكن للمشترين الأجانب فتح حسابات خاصة مقومة بالروبل أو بعملات معينة تانية غير الدولار في بنوك روسية معتمدة للغرض ده واستخدامها في عمليات تسوية الصادرات الزراعية.
وهتدخل الإجراءات الجديدة حيز التنفيذ في 1 نوفمبر القادم وهيتوجب على الحكومة الروسية في غضون 30 يوم تحديد قائمة المنتجات الزراعية الخاضعة للمرسوم .
وفي وقت سابق أشارت نائبة رئيس الوزراء الروسي إلى أن المرسوم هيساهم في تسهيل دخول الدول الصديقة سوق الأغذية الروسية وهيحمي المصدرين الروس والدول الصديقة من أثر العقوبات اللى فرضتها امريكا واوربا على الصادرات الروسية.
وطبعا قرار زي ده خطوة جديدة فى سبيل التحرر من هيمنة الدولار الامريكي على حركة التجارة ومش روسيا بس اللى عملت كده فيه أكتر من اتفاق حصل فى الفترة الخيرة لمبادلة العملات بين دول وبعضها زي اللى حصل مع الهند والبرازيل والامارات ودول تانية كتير خلاص قررت الخروج من سطوة العملة الأمريكية.
