سر العلاقه بين صندوق النقد وتعويم الجنيه .. خبير يكشف مفاجأة

مفيش حديث يعلو على حديث تعويم الجنيه في الوقت الحالي بين خبراء الاقتصاد والمال.. ياترى ايه علاقة صندوق النقد الدولي بقرار التعويم والمفاوضات مع الصندوق وصلت فين مين اللي هياخد قرار التعويم وامتى هيكون القرار.
 

معروف إن تحرير سعر الجنيه أو التعويم الكامل كان نحل نقاش بين صندوق النقد الدولي والحكومة المصرية وقت الاتفاق على قرض ال3 مليار دولار ونقدر نقول إنه كان شرط أساسي للحصول على القرض وفعلا الحكومة حررت الجنيه بشكل جزئي بعدها لكن  واضح إن الصندوق مصر على التحرير الكامل الجنيه ودا سبب تجميد صرف الشريحة التانية من القرض وبعدها دخلت الحكومة المصرية في مفاوضات تانية مع الصندوق للوصول لحل وسط يضمن صرف باقي القرض.

كبير محللى استراتيجيات الاستثمار في شركة ثاندر لتداول الأوراق المالية هاني جنينة قال كلام مهم جدا بخصوص المفاوضات مع الصندوق وهي إن مصر نفذت معظم متطلبات المراجعة مع صندوق النقد الدولي لكن غير معلوم بالتحديد هل سيتم الاتفاق على المراجعة في سبتمبر ولا لأ، ولغاية اللحظة دي لم تتم المراجعة الأولى رغم اتخاذ الدولة لقرارات مهمة لإرضاء الصندوق منها  رفع سعر الفايدة وافساح المجال لدخول القطاع الخاص في الاقتصاد بشكل أكبر واتفاق على بيع الأصول بالمبالغ المطلوبة، لكن الطلبات الخاصة بدعم الوقود والكهرباء وسعر الصرف لم تنفذ بعد، والخبير الكبير شايف إن الشهر الحالي هو الاختبار الأخير لإجراء المراجعة وصرف بقية الدفعات من عدمه.

ولأن التعويم مطلب أساسي الصندوق قال إن من وجهة نظره هيتم خفض للجنيه في أقرب وقت لكن مش عارف هل  هيتم خفضه أو تحرير سعر الصرف بشكل كامل، ام لا وهو شايف من واقع خبرته إن الخطوة مطلوبة نتيجة الفجوة بين السوقين الرسمية والموازية للعملة واللي بتقدر بنحو 20% تقريبا.

وأضاف إن ما سبق يؤيد إنه هيكون هناك خفض للجنيه لكن التوقيت قرار سياسي في المقام الأول واقتصادي فى المقام التاني نظرا لتبعاته على مستوى التضخم، لأن مصر بتعاني من معدل تضخم مرتفع من سنتين وهيحصل تأثيرات حال خفض الجنيه لأن معظم السلع مقيمة بالسعر غير الرسمي للدولار لكن توجد سلع أساسية مقومة بالسعر الرسمي زيخ الدواء والوقود والخبز والتراجع للجنيه هيكون ليه تأثير كبير على أسعار السلع الأساسية.
خلاصة راي الخبير الاقتصادي ويوافقه عدد كبير من الاقتصاديين إن التعويم آت لامحالة لكن توقيته بيد موافقة القيادة السياسية لأن ليه علاقه بحياة الناس وحياتهم المعيشية وكمان الاتفاق مع صندوق النقد الدولي دلوقتي مهم جدا عشان فتح الباب أما المستثمرين بعد توحيد سعر الصرف واللي أصبح أمر ملح جدا رغم تبعاته الصعبة.