إيه اللي الحكومة مخبياه عن الناس في أزمة الكهربا؟
يا ترى ايه اللى الحكومة مخبياه عن الناس في أزمة الكهربا؟ وهل السبب المعلن من جانب المسئولين هو السبب الحقيقي لقطع التيار كل شوية؟ ولحد امتى هيستمر موضوع تخفيف الأحمال ده؟ وايه سبب إجازة يوم الحد للموظفين طول شهر أغسطس؟ وهل درجات الحرارة الشهر الجاي هتكون أعلى من الشهر ده؟
مفيش حاجة شاغلة الناس في مصر في اخر أسبوعين اد موضوع الكهربا اللي بتقطع كل شوية.. والناس مش عارفة ايه اللى بيحصل وايه السبب اللى خلا الحكومة فاجأة تقرر تطبيق خطة تخفيف أحمال.. وليه أزمة الكهربا رجعت تاني بعد حوالى 8 سنين كانت خلاص الناس نسيت فيهم اللى كان بيحصل في 2013 ؟
واللي زود الطينة بالة كام حاجة حصلوا الأسبوع اللى فات خلو الناس تبدأ تقلق ويساورها الشكوك حوالين اللى بيحصل في أزمة انقطاع الكهربا زي مثلا ان رئيس الحكومة الدكتور مدبولى طلع وقال للناس ان الأزمة كان المفروض تخلص على نص الأسبوع اللى فات لكن بعدها مسئولين في وزارة الكهربا قالوا ان الازمة مكملة في شهر أغسطس واتضح بعد كده ان كلام الوزارة هو اللى صح ورئيس الوزراء طلع تانى بنفسه وأصدر قرار بعمل موظفي الحكومة من البيت يوم الاحد طوال شهر أغسطس لتخيف الأحمال الكهربائية في المصالح الحكومية وترشيد استهلاك الكهربا
والسؤال هنا يا ترى الحكومة مخبية حاجة عن الشعب في أزمة الكهربا؟
وفقا لتصريحات رئيس الحكومة الدكتور مصطفى مدبولي فسبب أزمة قطع الكهربا وتخفيف الأحمال ان استهلاك الكهربا في مصر زاد بصورة كبيرة وأدى إلى زيادة حجم استهلاك الغاز اللازم لإنتاج الكهرباء وإلى ضغط شديد على الشبكات الخاصة بيه وده أدى إلى انخفاض ضغوط الغاز في الشبكات الموصلة لمحطات الكهرباء... رئيس الوزراء قال كمان ان تخفيف الأحمال مستمر لغاية ما يتم الوصول للضغوط العادية لشبكة الغاز
ووزير الكهرباء والطاقة المتجددة، محمد شاكر أكد هو كمان ان إجراءات تخفيف الأحمال "مؤقتة"، وأنها خطوة ضرورية بتستهدف الوصول للضغوط العادية لشبكة الغاز المستخدم في إنتاج الكهرباء.
وحسب تقديرات رسمية مصر محتاجة حوالي 135 مليون متر مكعب من الغاز يوميا من أجل انتظام التيار الكهربائي وتشغيل كافة الوحدات بالإضافة إلى 10 آلاف طن من المازوت في ضوء وجود وحدات ومعدات تعمل بالغاز ووحدات تانية بتعمل بالوقود التقليدي ولو تم توفير الكميات دي الأزمة هتخلص فورا.
وبسبب موجة الحر الشديدة سجلت محافظات مصر أعلى استهلاك من الكهرباء في أيام شهر يوليو 2023، بناء على بيانات من وزارة الكهرباء والطاقة المتجددة.
