عاجل وبشكل رسمي.. مصر تبدأ أولى خطوات التحرر من هيمنة الدولار

 
لو حضراتكم فاكرين احنا هنا على منصات بانكير المختلفة قولنالكم ان مصر شغالة في أكتر من اتجاه للتحرر من هيمنة ونفوذ الدولار.. وده بعد أزمة نقص العملة الأجنبية اللى بتعانى منها من وقت اندلاع الحرب الروسية الاوكرانية ولحد دلوقتي.. وفيه تحركات بتتم على أعلى مستوى لحل الأزمة دي بشكل نهائي خصوصا وان تأثيرها على حياة المصريين ما بقاش خافي على حد.. وفى الساعات الأخيرة مصر بدأت رسميا أولى خطوات التحرر من سيطرة الدولار والخطوة دي لو ربنا كتبلها النجاح مصر هتخلص من صداع ازمة نقص العملة ويمكن للأبد كمان؟ 
 
ابراهيم عشماوي مساعد أول وزير التموين ورئيس بورصة السلع أعلن أن وزارة التموين بتعتزم إجراء التعاملات بين مصر وروسيا بالعملة المحلية بدلاً من الدولار بالتزامن مع سعي مصر إلى الانضمام لتكتل "بريكس" اللى بيحاول إنشاء عملة جديدة تنافس الدولار في تسوية المعاملات الدولية.
مساعد وزير التموين أكد أن الوزارة اتقدمت باقتراح لوزارة الخارجية المصرية من أجل الشروع في تطبيق التعاملات بالعملات المحلية مع روسيا... وقال أن التنفيذ هيحتاج لتوافقات دولية بين البنك المركزي المصري والمركزي الروسي.
عشماوي أكد كمان أن الأمن الغذائي لمصر هو "أمن قومي"، خصوصا في ظل الظروف اللى بيشهدها العالم حاليًا مع تعليق اتفاق الحبوب بين روسيا وأوكرانيا... وقال إن بعض الدول ممكن  تلجأ للبحث عن بدايل تانية  زي إبرام العقود الآجلة أو تثبيت أسعار الاستيراد بالاتفاق مع بنوك استثمارية، بهدف الحد من التذبذب في الأسعار.
ويأتي ذلك بالتزامن مع معاناة مصر مؤخرًا من شح بالعملات الأجنبية، وبالتالي بيرجح البعض ان الخطوة دي ممكن تكون بمثابة انفراجة بالأزمة على المدى البعيد بشأن الخروج من عباءة الدولار والتمهيد لإدراج الجنيه المصري في التعاملات الدولية، خصوصا وأن دول "بريكس" عندها نفس الهدف، وهو التحرر من هيمنة الدولار والتعامل بالعملات المحلية الخاصة بهم.

وأصبحت مصر بشكل رسمي عضو جديد في بنك التنمية الجديد اللي أنشأته دول "بريكس"، بعد ما صديق الرئيس عبدالفتاح السيسي، على القرار رقم 628 لسنة 2023 بشأن الموافقة على اتفاقية تأسيس بنك التنمية الجديد التابع لتجمع "بريكس" ووثيقة انضمام مصر إلى البنك.