إيه اللي هيحصل في مصر في شهر أكتوبر؟

يا ترى ايه اللى هيحصل في مصر في شهر 10 ؟ وليه كل التقارير الخارجية بتقول ان فيه تغيير كبير هيحصل في الشهر ده ؟ وايه علاقة الحدث المتوقع بالاقتصاد والاسعار ؟ وهل الحكومة مستعدة تواجه تداعيات اللي ممكن يحصل؟
 
لو حضراتكم فاكرين من فترة قريبة كده بنك أمريكي شهير طلع تقرير وقال ان خلاص مولد تخفيض الجنيه انفض وان مفيش تعويم هيحصل قبل نهاية شهر سبتمبر الجاي، البنك ده أكد ان الضغط على الجنيه قل شوية مع تحركات الحكومة اللى نجحت في توفير سيولة دولارية من عدة قطاعات منها بيع أصول مملوكة للدولة وكمان الانفراجة اللى حصلت في عوايد السياحة واللي حققت نمو غير مسبوق في النص الأول من 2023 بالإضافة لملف الصادرات وتحديدا صادرات الغاز اللى مصر ماشية فيه كويس جدا وبتحقق نجاحات كبيرة.
وده كان في عز ما كل التقارير الدولية بتأكد ان مصر هتضطر من جديد لتخفيض قيمة عملتها انصياعا لشروط صندوق النقد الدولى عشان تقدر تاخد باقي قرض ال 3 مليار دولار اللى اتفقت عليه مع مسئولي الصندوق في نهاية 2022 وكان من أهم شروطه تطبيق سعر صرف مرن للجنيه قدام العملات الأجنبية.. ورغم ان مصر فعلا بتطبق مرونة سعر الصرف لكن ده لسه مش عاجب الصندوق وعشان كده الرئيس السيسي طلع واتكلم بنفسه في موضوع الدولار وقال اننا بنطبق سعر صرف مرن لكن لو ده هييجي على حساب الناس فمصر مش هتخفض قيمة الجنيه خصوصا انه في ال 3 مرات اللى حصل فيهم تخفيض الهدف الأساسي وهو مواجهة التضخم ما اتحققش بل بالعكس التضخم كل يوم بيزيد في مصر والأسعار زي ما كلنا عارفين بقت نار.

طب ايه اللي ممكن يحصل بعد نهاية سبتمبر الجاي؟ 
السؤال ده جاوبت عليه وكالة رويترز من خلال استطلاع شارك فيه عدد كبير من خبراء الاقتصاد توقعوا العملة المصرية  في شهر اكنوبر وقالوا ان سعر الدولار هيسجل 34.8 جنيه مع نهاية 2023 بعد ما كانت توقعاتهم السابقة وصول الدولار الى 34 جنيه بنهاية العام. 
واتوقع توقع الاقتصاديون في استطلاع رويترز انخفاض الجنيه إلى 36.95 أمام الدولار بنهاية 2024 وإلى 38.90 جنيه للدولار في 2025.
وشهد سعر الدولار في السوق السود تخبط كبير خلال الأيام القليلة الماضية، وسيطر الارتباك على المتعاملين بالسوق الموازية بعد عدد من الأنباء الهامة بشأن الاقتصاد المصري بشكل عام، وتوقعات سعر الدولار أمام الجنيه الفترة القادمة بشكل خاص.

وتراجع سعر الدولار بالسوق السوداء أمام الجنيه بعد تصريحات رئيس الوزراء مصطفى مدبولي، المتعلقة بتعزيز الموارد الدولارية وخطة الطروحات الحكومية، واللي طمأنت المستثمرين بشأن مستقبل الاقتصاد المصري في الفترة الجاية.
وزي ما احنا عارفين ان دولار السوق السوداء بيتراجع كما بتكون فيه أنباء مطمئنة حول وضع الاقتصاد ، أو صدور توقعات من مؤسسات وبنوك دولية تفيد بعدم تراجع الجنيه في القريب العاجل، وب يرتفع العرض ويقل الطلب في الحالة دي . والعكس صحيح، بيرتفع الدولار ويزداد الطلب كلما كانت الأنباء سلبية وغير مطمئنة.