التعويم الجديد.. هو الحكومة هتخفض قيمة الجنيه والدولار فعلا هيوصل ٥٥ جنيه؟
هو فعلا فيه تعويم جديد للجنيه؟ وهل الدولار هيوصل ٥٥ جنية؟ وامتى الكلام ده هيحصل؟ وليه أصلا رجع الكلام تاني عن التعويم؟
في الكام يوم الأخيرة رجع الكلام تاني بقوة عن تعويم الجنيه المصري وفيه ناس كتيرة معرفش جابوا معلوماتهم منين كانوا بيقولوا أن التعويم هيحصل خلال ساعات.. فهل فعلا فيه تعويم جديد؟
لو حضراتكم فاكرين من فترة قريبة الرئيس السيسي كان اتكلم عن مرونة سعر الصرف وقال ان مصر بتطبق سعر صرف مرن بالفعل لكن لو مرونة سعر الصرف هتأثر على حياة الناس مش هنخفض قيمة الجنيه حتى لو كان ده بيتعارض مع شروط صندوق النقد الدولي
كلام الرئيس السيسي كان ليه تداعيات كبيرة على السوق السودا للدولار وسعر العملة الأمريكية انخفض بقوة ونزل من ٤١ جنيه إلى مستويات من ٣٦ إلى ٣٨ جنيه.
فهل بلد ممكن يحصل فيها تعويم على المدى القريب هتنهار فيها السوق السودا بالشكل ده؟
مش بس كده معظم تقارير مؤسسات التمويل الدولية بتقول ان مصر مش هتخفض قيمة الجنيه من جديد على الاقل لغاية شهر سبتمبر وشايفة ان الاقتصاد المصري بيتحسن ومصادر الدولار بتشهد نمو والضغط على الاحتياطي النقدي بيقل
يعني من الاخر على الاقل لغاية شهر سبتمبر مفيش تعويم ومفيش خفض لقيمة الجنيه.. وده لان الحكومة شايفة ان المرات اللي فاتت لما خفضت قيمة العملة الهدف الرئيسي وهو خفض معدلات التضخم محصلش بالعكس كمان تكلفة قيمة الديون زادت وبالتالي الدولة شغالة حاليا على تعظيم موارد مصر من الدولار لان كل ما المعروض من العملة زاد كل ما سعر الجنيه هي هيرتفع والدولار هينزل
