سوق الدهب رايح فين بعد العيد.. شوف هتشتري امتى
كلنا شفنا اللي حصل في سوق الدهب في الشهور اللي فاتت والأسعار اللي ضربت في السما وبعدين انهارت في الأيام الأخيرة والحقيقة ناس كتير مش عارفة مصير أسعار الدهب الفترة اللي جاية ولاتشتري وتبيع امتى وخايفة من المفاجآت.. ايه اللي هيحصل في الدهب بعد العيد وامتى. تشتري وامتى تبيع.
عشان نفهم سوق الدهب كويس يبقي لازم نعرف ايه اللي بيأثر على أسعاره عشان لما نشوف الأسباب نبقى عارفين السوق رايح فين ونتوقع الأسعار وساعتها هتعرف تشتري امتى وتبيع امتى.. شوف حضرتك لو رجعنا للأسباب اللي رفعت أسعار الدهب في الشهور الأخيرة وذروتها واللي جرام الدهب كان داخل على ال3 آلاف جنيه هتعرف إن الأسعار ضربت عشان اكتر من سبب أولها نقص المعروض وارتفاع الطلب والضبابية في سوق الدولار وتعويم الجنيه فكانت النتيجة الناس خافت على قيمة فلوسها ومدخراتها تقل عشان كده اشترت بفلوسها دهب وخزنته عشان تحتفظ بقيمة الفلوس لأن الدهب مش بيخسر لو صبرنا عليه على الأقل سنة ومبعنهوش ولأن الناس كلها فكرت بطريقة واحدة ومع عقلية القطيع حصل هجوم على الصاغة ومع قلة المعروض ووقفت الواردات ايام ذروة أزمة الدولار سعر الدهب طار في السما.
ولما الأسباب بتاعة ارتفاع الأسعار راحت أسعار الدهب نزلت زي ما احنا شايفين لأنه بقى فيه معروض كبير وطلب أقل وابتعاد شبح التعويم وانفراجة في الدولار واستقرار أسعار سوق الصرف وعشان كده بنقولك انسب وقت للشراء هو دلوقتي والأسعار بتنزل وبخصوص مستقبل سوق الدهب بعد العيد فأكيد حالة هيتراوح بين حالة الاستقرار والانخفاض وده نتيجة استقرار العوامل اللي قلنا عليها ولأن مفيش تعويم قبل اغسطس اللي جاي وهو معاد اجتماع البنك المركزي المصري واللي بياخد قرارات بناء على مؤشرات السوق وهيحسم مصير التعويم وبناء عليه هيتحرك سوق الدهب ارتفاعا أو انخفاضا.
كمان فيه عامل تاني خارجي بيأثر على سعر الدهب وهو سعره عالميا وكل مانزل بره كل ما أسعاره هتستقر في السوق المحلي وعالميا الطلب من البنوك المركزية بيقل عن الاول وفيه بنوك رئيسية ابتدت تبيع جزء من احتياطي الدهب بتاعها ودا انعكس على مؤشرات الأسعار وتوافر المعروض.
وبالنسبة لوقت البيع فلازم تعرف حضرتك أن المعدن الأصفر استثمار طويل الأجل يعني كل ما تصبر عليه كل ماكان مكسبك بيزيد ومش من مصلحتك تبيع دلوقتي لأن الأسعار في النازل ولازم على الأقل تستني من سنة ل3 سنين لولا ماتبيع.
