دولار الموازية بينهار.. ايه اللي بيحصل في السوق السوداء ؟

يا ترى ايه اللى بيحصل في السوق السودا للدولار في الساعات الأخيرة؟ وايه تأثير كلام الرئيس السيسي عت مرونة سعر الصرف على المضاربة على العملة؟ وهل اللى حصل في مؤتمر اسكندرية امبارح ممكن يكون نهاية لأزمة العملة الأجنبية في مصر؟ وازاي الحكومة هتواصل مطاردة تجار العملة؟ وايه توقعات سعر الدولار الفترة الجاية؟ 

السوق السودا للدولار تلقت في الساعات الأخيرة ضربة قوية وموجعة بعد تصريحات الرئيس السيسي اللى أتكلم فيها عن تعويم الجنيه ومرونة سعر الصرف وموقف مصر من المفاوضات مع صندوق النقد الدولي .. وانهارت أسعار الدولار في السوق السودا مع إشارات الرئيس ان مصر مش هتنفذ مطالب الصندوق الخاصة بتخفيض قمة العملة 
وامبارح الرئيس السيسي كان واضح وصريح لما قال صراحة ان مرونة سعر الصرف أمن قومي وان مش من المحتمل خفض قيمة العملة مرة تانية على المدى القريب وقال ان خطوة خفض قيمة الجنيه ممكن تضر بالأمن القومي والمواطنين.
وخفضت مصر قيمة الجنيه حوالي 50 % من مارس 2022 بعدما أدى الغزو الروسي لأوكرانيا إلى تخارج المستثمرين الأجانب من سوق أدوات الخزانة المصرية ووجود نقص حاد في العملة الأجنبية.
وبتعانى السوق السودا من امبارح من تراجع الدولار مع زيادة التوقعات بتماسك الجنية واستعادته لقوته بعد صدور اكتر من تقرير بيؤكد ان مفيش اى تراجع في قيمة الجنيه ، واختفى المضاربين وتجار العملة ومفيش دلوقتى تنفيذ لأي عملية سواء بيع أو شرا
ووعدت مصر بالسماح للعرض والطلب بتحديد سعر العملة في إطار حزمة إنقاذ وبرنامج تمويل من صندوق النقد الدولي قيمته 3 مليار دولار من خلال اتفاق تم توقيعه في شهر ديسمبر اللى فات. 
وسعر الصرف الرسمي في مصر ثابت عند حوالي 30.90 جنيه للدولار بقالوا أكتر من 3 شهور.. والنهاردة بعد تصريحات الرئيس هبط سعر العملة الامريكية في السوق الموازية من 38 جنيه الى مستويات 33 و34  جنيه ونص بعد ما كان عدا ال 40 جنيه في الأيام اللى فاتت. 
وفى كلمته امبارح قدام المؤتمر الوطني للشباب قال الرئيس :"نحن مرنين في سعر الصرف... لكن عندما يتعرض الموضوع لأمن مصر القومي وإن الشعب المصري يضيع.. لا".
وأضاف "بتكلم بجد. الموضوع ده أنا أقوله على الهواء. عندما يكون تأثير سعر الصرف على حياة المصريين وممكن يضيعهم، لا ما نقعدش في مكانا، لا ما نقدرش".
وأكد السيسي أن ارتفاع أسعار السلع والخدمات يرجع إلى خفض قيمة الجنيه في ظل اعتماد الطلب الاستهلاكي على الخامات والسلع المستوردة.
وقال السيسي كمان : "في الأعوام الماضية كنا نشتري من السوق -سندات دولارية- 3 أو 4 مليارات دولار، ونضعهم في البنك المركزي كي نحافظ على الاحتياطي لتوفير طلبات 3 أو 4 شهور، لكن ده تسبب في زيادة الديون، ولن نعيد الشراء مرة أخرى".
وكانت السوق السوداء شهدت تخبط وارتباك بين المتعاملين على وقع قرارات وتصريحات حكومية مطمئنة، وتقارير دولية بتفيد بأن الجنيه مش هيتراجع في القريب العاجل، وده أدى إلى تراجع الدولار في السوق السوداء لمستوى الـ 36 جنيه للدولار الشهر الماضي.