رسالة تهديد من السيسي لصندوق النقد.. يا ترى الرئيس يقصد إيه ؟
هنا في بانكير وعلى مدار الكام شهر الأخيرة كنا أول ناس في مصر نقول لحضراتكم ان مصر رافضة لشروط صندوق النقد الدولي خصوصا المتعلقة بسعر صرف الجدنيه قدام الدولار.. وأكدنا ان مصر بتدرس بشكل جدي اعلان رفض الشروط المجحفة اللى طالبها الصندوق خصوصا ان الحكومة سبق ونفذت أغلب الحاجات اللى طلبها ورغم كده اطلبات والشروط ما وقفتش وكل شوية مطلب جديد وإصرار غير طبيعي على تخفيض قيمة العملة رغم ان رئيس الحكومة الدكتور مصطفى مدبولى طلع بنفسه وأكد أن الجنيه مقيم بأقل من سعره بكتير.. وعشان كده النهاردة فيه تطور مهم وخطير في علاقة مصر بصندوق النقد الدولي.. وفيه رسايل كتيرة بين السطور وجهها الرئيس السيسي للمسئولين في الصندوق خلال مشاركته في فعاليات المؤتمر الوطني للشباب بمحافظة الإسكندرية.. فيا ترى الرئيس قال ايه ؟ وايه الرسالة اللي عاوز يوصلها لصندوق النقد؟
لو حضراتكم ملاحظين الرئيس السيسي مش بيتكلم عن الدولار كتير في أحاديثه يمكن ده حصل مرة او مرتين على أقصى تقدير لكن النهاردة خلال زيارته لمحافظة الإسكندرية فتح الرئيس قلبه واتكلم عن الدولار وسعر الصرف وكمان القروض وغيرهم من الموضوعات المهمة اللى بتشغل بال الناس في مصر. الرئيس أتكلم بوضوح وصراحة عن الأزمة الاقتصادية اللى بتمر بيها مصر زيها زي باقي دول العالم وبدأ كلامه برسالة تطمين للمصريين وقال إن الدولة مسيطرة تماما على الأزمة والأمور ماشية في طريقها للحل ، لكن في نفس الوقت البلد محتاجة تحل ازمة الفجوة الدولارية بأي شكل ودا شرط أساسي عن الدولة تتقدم.
الرئيس تطرق كمان لموضوع سعر صرف الجنيه قدام الدولار و في تلميح أقرب للتصريح السيسي شارو على ان مصر غير راضية عن الشروط اللى بيحاول يفرضها الصندوق بخصوص ضرورة تخفيض قيمة الجنيه من جديد.
وقال الرئيس نصا:" احنا مرنين في سعر الصرف لكن لما يتعلق الموضوع بالأمن القومى وشعب مصر يتضرر والأمور تبقى صعبة على الناس لازم نتحرك".
كلام الرئيس النهاردة مالوش اى معنى تانى غير ان مفيش تحرير لسعر صرف الجنيه حتى لو هيتعارض مع أي اتفاقيات تانية عشان خاطر الناس تعرف تعيش.
