10 مليار دولار من الامارات لمصر
فاكرين لما أهل الشر وصفحاتهم على مواقع السوشيال ميديا والتواصل الاجتماعي طلعوا وقعدوا. يصرخو ويقولو إن الخليج رفع ايده عن مصر وجمدوا الاستثمارات وإن الشركات السعودية والإماراتية والقطرية بتهرب من مصر وخلاص مصر هتتعرى ماليا والاقتصاد هينهار وقتها ناس خافت وصدقت لكن اللي حصل بعد كده كدب كل الإشاعات والتضليل بتاع الجماعة إياها وبالعكس الاستثمارات الخليجية زادت وبنتكلم على مشروعات بالمليارات في الفترة الأخيرة ولسه وزير الصناعة السعودي كان في مصر واتكلم في تعاون استراتيجي على أعلى مستوى للتكامل الصناعي بين البلدين ولسه وزير المالية القطري مأكد إن قطر ملتزمة باستثمارات بالمليارات في مصر في مختلف المجالات دا غير الشركات الخليجية اللي شغالة في البلد.. لكن النهاردة تم الإعلان عن مشروع القرن في مصر بتمويل إماراتي وباستثمارات 10 مليار دولار.. ايه حكاية المشروع دا وهيكون في أي مجال.
من ساعات قليلة أعلن الرئيس التنفيذي لشركة أبوظبي لطاقة المستقبل والشهيرة بمصدر، محمد الرمحي، التوقيع على مصر عقد مشروع ضخم لانشاء مشروعات في طاقة الرياح مع تحالف تقوده مصدر الإماراتية باستثمارات تبلغ 10 مليارات دولار وقال الكلام ده في تصريحات إعلامية على هامش توقيع الاتفاقية.
طبعا حجم الاستثمارات في المشروع ضخم جدا ودا بيبين أهميته للسوق المصري والعائد الاقتصادي المنتظر بجانب فرص العمل اللي هيوفرها المشروع العملاق والقدرة الإضافية للطاقة الكهربائية في مصر، وممكن حد يسأل ازاي شركة إماراتية هتستثمر المبلغ الضخم دا في قطاع مصر عندها فائض منه وهو الكهرباء ودا الحقيقة سؤال في محله لكن اللي مش واخدين بالنا منه هو إن مصر دلوقتي بقت سوق كبير للكهربا واللي بدأت تصدرها للسعودية والأردن والعراق وأوروبا كمان من خلال شبكات دولية لتصدير الطاقة واللي ظهر إنها سوق واعد والاستثمارات فيه مربحة جدا واللي اكيد الشركة الإماراتية عملت دراسة جدوى كويسة قبل ما تحط المبلغ الضخم دا واللي قيمته بتزيد عن قرض صندوق النقد الدولي باكتر من 3 أضعاف.
المشروع الاماراتي الضخم في التوقيت دا ليه دلالة مهمة جدا وهي جاذبية السوق المصري للاستثمارات الضخمة خاصه من دول الخليج العربي واللي حاصل زي هجوم استثماري عليه في الشهور الأخيرة بسبب المميزات الكتيرة اللي أقرتها الحكومة المصرية وفي مقدمتها الرخص الذهبية والمشروع بحجمه الكبير ده هيفتح عيون شركات تانية عالمية عشان تيجي تستثمر في مصر لأن راس المال بياف في العالم كله ويشوف الشركات الضخمة زي مصدر الإماراتية بتشتغل في إنه سوق ويجري وراها لأنه بيثق في اختيار الشركات الكبيرة في الأسواق اللي بتختارها.
كمان المشروع الضخم ده بيدي إشارة مهمة إن الحكومة المصرية ماشية في الطريق الصحيح وإن فيه استثمارات تانية جاية في الطريق في كل المجالات ودا أكيد بيدي ثقة كبيرة عند الحكومة في مواجهة أزمة الدولار وبتديها قوة في المناورة والمرونة والاريحية في التعامل مع صندوق النقد الدولي وغيره من المؤسسات المالية الدولية وبتخلى مصر في موقف قوة في أي تفاوض جاي.
