لو بتتعامل مع البنوك.. هنقولك أهم 10 مصطلحات لازم تكون عارفها

 
لو بتروح البنك كتير وبتتعامل مع موظفي البنوك هتلاحظ انه وبحكم شغلهم جوه البنك أوقات طويلة بيكون ليهم مصطلحاتهم الخاصة بس احنا مابنفهمش كلامهم بشكل كبير إلا بعد تكرار مشوار البنك أكتر من مرة، عشان كده احنا هنقولك على شوية مفاهيم من قاموس البنوك بيقولها موظف البنك وانت ممكن تبقى مش عارف معناها.

الحساب الجاري

والبداية هتكون من أنواع الحسابات المختلفة اللى بتقدمها البنوك وخلينا نقول لحضرتك مطلح كل حساب ومعناه ايه؟ 
وأول حاجة هي السحاب الجاري وده حساب عن طريقه بتعمل سحب وايداع من غير ما يكون فيه أي فوايد على ايداعاتك، زي الحساب اللي بتقبض بيه مرتبك، و ممكن تطلع دفتر شيكات على الحساب ده وممكن كمان يتم فتح الحساب ده للأشخاص الاعتباريين زي الشركات.

حساب التوفير

أما حساب التوفير فده عن طريقه بتقدر تعمل سحب وايداع عليه براحتك بس بينزل فايدة على الفلوس اللي موجودة كل سنة، وممكن تنزل كل شهر او كل 3 شهور او كل 6 شهور او كل سنة على حسب نوع حساب التوفير و تقدر تستفسر من البنك العائد بينزل كل قد ايه، والحساب ده ممكن يتفتح للقُصّر عن طريق الوصي.
وفيه نوع تانى من الحسايات هو الحساب الجاري المدين وده حساب جاري بيتفتح بضمان وديعة أو شهادة استثمار، والميزة الأساسية فيه ان لو الرصيد المتاح في حسابك يساوي صفر فـتقدر تعمل حاجة اسمها سحب على المكشوف، وهي انك تسحب اي مبلغ المهم مايكونش يساوي أو أكتر من مبلغ الضمان، وتسدد المبلغ بفايدة و عمولة محددة، وتقدر تسدد دفعة واحدة على عكس القرض اللي لازم تسدده على هيئة أقساط وإلا هتدفع عمولة سداد مبكر. 
ومن المطلحات اللى ناس كتير ما تعرفهاش رقم الحساب المصرفي الدولي أو الايبان وده بديل لرقم الحساب عشان يسهل عليك عمليات تحويل الفلوس من بره مصر ويسرع تنفيذها وكمان يقلل من الأخطاء اللي كانت بتحصل قبل كده وبسببها بتتأخر عملية التحويل.

نظام سويف

أما مطلح نظام سويف فهو عبارة عن نظام مراسلة عالمي للتعاملات المالية، وبيتم استخدامه من خلال أكثر من 11 ألف بنك ومؤسسة مالية في أكتر من 200 دولة حول العالم لتحويل الأموال بينها إلكترونيًا لما يميزة من سرعة التنفيذ وحماية المعاملات وقلة التكلفة.

وفيه كمان مصطلح شراء المديونية وده  باختصار معناه انك ممكن تختار بنك يسدد ديونك اللي عند بنك تاني "بيشتري الدين اللي عليك"، وده مفيد في حالات كتير زي مثلا لو حبيت تاخد قرض من بنك وانت عليك اقساط في بنك تاني، فـ بدل ما تبقى بتسدد الأقساط لبنكين، البنك الجديد "بيشتري الدين" اللي عليك عشان تسدد كل حاجه في مكان واحد.

ماكينة البي او اس

ونروح لماكينة البي او اس .. ودي ماكينات نقاط البيع اللي عن طريقها بتدفع فاتورتك في أي محل ببطاقات الدفع سواء خصم مباشر أو ائتمان، وبتشتغل بخط أي شركة من شركات الموبايل ولو انت صاحب محل ممكن تطلبها من أي بنك.
اما مصطلح تسطير الشيك فده معناه انه ممكن اللي بيكتب الشيك يعمل سطرين متوازيين في الشيك، وده معناه ان الشيك ده ماينفعش يتصرف كاش ولازم فلوس الشيك تنزل للمستفيد في حسابه وكمان الشيك ده لازم يتصرف في اليوم اللي مكتوب على الشيك ماينفعش قبل كده.

تظهير الشيك

وفيه كمان تظهير الشيك وده معناه  لو عايز تصرف الشيك اللي معاك من ماكينة ال إي تي ام هيتطلب منك "تظهيره" ودي معناها انك تكتب على ضهر الشيك اسمك مرتين لو انت المستفيد من الشيك ده، وممكن المستفيد يظهر الشيك لشخص تاني ويقدر كل مستفيد يكرر الموضوع ده لعدد لا نهائي من الأشخاص.

ونروح لمصطلح صندوق الاستثمار وهو عبارة عن وعاء مالي رأس المال فيه بيتحسب بالملايين وملك لعدد كبير من المستثمرين، وبيديره متخصصين وخبراء في التداول في البورصة دورهم انهم يدرسوا كويس ايه الشركات اللي ممكن يستثمروا فيها وعلى الأساس ده بياخدوا قرارات البيع والشراء مكانك وده بيقلل عليك مخاطرة التداول بدون خبرة كافية لو انت لسة بتبتدي في مشوار الاستثمار.