مشروع عملاق بمليار دولار.. إيه اللي بيحصل في جبل المقطم

 مصر عندها إمكانيات هائلة في فرص الاستثمار الناجح والمربح وكل يوم بيتم توقيع مشروعات بمبالغ ضخمة، ومن المشروعات دي مشروع تطوير جبل المقطم أو مدينة النور ودا مشروع عالمي وهيغير شكل الاقتصاد المصري وكفاية أقولك إن استثماراته مليار دولار امريكي وهيجيب 60 مليارجنيه إيرادات لما يخلص والمشروع أتوقع بالفعل.. ياترى إيه حكاية مشروع القرن في مصر وإزاي هيغير شكل المنطقة
 

مشروع مدينة النور أو A City of Light زي مابيسموه هو مشروع معماري ضخم بينفذه تحالف مصري سعودي بين شركة النصر المصرية و شركة سكوب التابعة لمجموعة السويلم السعودية وباستثمارات زي ماقلنا بتزيد عن مليار دولار يعني المشروع بيزيد عن تلت قرض صندوق النقد الدولي، وبيتحملها كلها الجانب السعودي يعني مصر مش هتدفع دولار من جيبها، والمشروع الهدف منه تحويل جبل المقطم الى وجهة سياحية عالمية باستغلال كون الجبل أعلى نقطة بالقاهرة وبيكشف كل معالم العاصمة المصرية يعني وانت في المقطم بتشوف مصر كلها.

المشروع العالمي حط تصميماته مكتب المهندس المعماري العالمي نورمان فوستر  ودا نفس المهندس اللي عمل تصميمات مركز مجدي يعقوب للقلب الجاري تنفيذه أعلى هضبة أهرامات الجيزة.
مشروع المقطم العملاق عبارة عن ممشى ومسار دراجات وحديقة  وسلسلة مطاعم وكافيهات، وكمان بيضم منطقة بازارات تجارية ومدينة ملاهي ترفيهية وجسر زجاجي  وفيه كمان منطقة تليسكوب لهواة الفلك ورصد النجوم يعني تقدر تشوف أي كوكب وانت هناك بالإضافة إلى سينما مفتوحة وجيم ومنتجع صحي وكمان حي سكني جديد ونادي رياضي ومولات تجارية.. شفتوا أد إيه المشروع ضخم وهيغير موازين الفكر الاقتصادي وي فايدة الاستثمار المباشر اللي اتكلمنا فيه كتير قبل كده.

وزير قطاع الأعمال المصري محمود عصمت سبق وقال إن المشروع بداية مرحلة جديدة من مراحل المشروع العملاق لتطوير كورنيش المقطم بإجمالي عوائد تزيد على 60 مليار جنيه، وإن المشروع في إطار استراتيجية الوزارة اللي بتتوافق مع وثيقة سياسة ملكية الدولة بدعم القطاع الخاص وفتح المجال أمامه ليحتل مكانته الطبيعية في قيادة الاقتصاد القومي جنبا إلى جنب مع القطاعين التعاوني والحكومي.

المشروع من غير شك نقلة نوعية لمنطقة المقطم وبيقام على مساحة 2 مليون متر في موقع متميز يطل على أهرامات الجيزة وقلعة صلاح الدين والقاهرة الفاطمية ومتحف الحضارات، وبتكلفة تبلغ أكتر من 32 مليار جنيه يضخها المستثمر السعودي دولارات.